Acts 4

Mossi Moore (KÃAB-PAALGÃ KOE-NOOGO)

← Chapter 3 Jump to: Chapter 5 →

1A Pɩyɛɛr ne a Zã sẽn da ket n gomd ne nebã, maan-kʋʋdbã ne wẽnd-doog gũudba naab la Saduusẽ-dãmba waame.

2Bãmb sũyã puuga wʋsg ne tẽn-tʋmdba yiibã sẽn da zãmsd nebã la b moondẽ n yetẽ tɩ neb nins sẽn tũud a Zezi wã na n vʋʋg n bas a kũum wala a Zezi sẽn vʋʋg n bas kũuma.

3La b yõga tẽn-tʋmdbã n kɩs gũudbã tɩ b gũ-b hal tɩ beoog vẽege, bala wĩndga da zoe n kẽeme.

4Baoosgo, neb nins sẽn da wʋm koe-moonegã, wʋsg tẽeme. Neba sẽn tẽ wã sõor kolga tus a nu.

5La vẽkembeoogo, Zuif-rãmba nanamse la kãsem-dãmba ne tõog karen-saam-dãmbã,

6la maan-kʋʋdbã kãsem a Ãnn ne a Kayif, la a Zã la a Alegsãndr la neb nins fãa sẽn da ya maan-kʋʋdba kãsem-dãmb buudã tigma taab Zeruzalɛm.

7Bãmb talla a Pɩyɛɛr ne a Zã n wa n yals bãmb sʋk n sok-b tɩ yaa ne pãng bʋg wala yaa ne ãnna yʋʋr la b maan bõn-kãnga.

8Dẽ, a Pɩyɛɛr sẽn pid ne Sɩɩg-sõngo, yẽ yeel-b lame yaa:

9Zuif-rãmba nanamse ne kãsem-dãmba, b sẽn sokd tõnd rũnna n dat bãng maan-neerã tõnd sẽn maan koamsã, la sẽn yɩ to-to tɩ rao-kãng paam maagrã.

10Yãmb fãa ne Israyɛl neba fãa bãng-y neere, tɩ yaa ne Nazarɛt dao a Zezi Kirist yãmb sẽn ka da-pɩk zug tɩ Wẽnnaam vʋʋg-b n bas kũuma yʋʋre, n kɩt tɩ rao-kãnga paam laafɩ zãng n yas yãmb fãa taoore.

11Wa gʋls sõamyã sẽn yetã, a Zezi yaa: "Kugr ninga yãmb a tãn-metbã sẽn da zagsã, la kug-kãng n lebg roogã pãng kugri."

12Fãagr ka be ne ned a to sã ka a Zezi ye. Tɩ bõe, Wẽnnaam ka kõ ned yʋʋr a to ninsaalba sʋk dũniyã zug tɩ tõnd tõe n tũ m paam fãagr ye.

13La bãmb sẽn yã a Pɩyɛɛr ne a Zã pɛl-kɛgengã, b yɛɛsame, tɩ bõe, b ra bãngame t'a Pɩyɛɛr ne a Zã yaa nin-zaals sẽn ka paam zãmsgo. La b ra bãngame t'a Pɩyɛɛr ne a Zã ra tũuda a Zezi.

14Kaorengã yɛl-bʋ-kaoodbã sẽn yã rao ningã sẽn paam maagrã t'a yik n yas a Pɩyɛɛr ne a Zã sɛɛgẽ wã, b ra ka tar sẽn na leok ye.

15La b kõo a Pɩyɛɛr dãmb noor tɩ b yi kaoreng yɛl-bʋ-kaoodba roogẽ. La kaoreng yɛl-bʋ-kaoodbã yẽsa ne taab n yeel yaa: Tõnd na n maana nin-kãensa bõe?

16Bala, Zeruzalɛm neba fãa bãnga vẽeneg tɩ nin-kãensa maana bõn-bãn-kãsenga, la tõnd ka tõe n kɩɩs bõn-kãng ye.

17La sẽn na n yɩl tɩ yel-kãnga ra saag neba sʋk n paase, wa-y tɩ d gɩdg-b tɩ b ra leb n gom ne ned ba a yen a Zezi yʋʋrã yell ye.

18Dẽ, b boola a Pɩyɛɛr ne a Zã n yeel-b tɩ b ra leb n tol n gom la b zãms nebã ne a Zezi yʋʋr ye.

19La a Pɩyɛɛr ne a Zã leok-b lame yaa: Yaa tɩrg Wẽnnaam nifẽ tɩ tõnd sak yãmb n yaool n bas Wẽnnaam? Bɩ yãmb mens togse.

20Bala, tõnd ka tõe n ka gom bũmb ninga tõnd sẽn yã la d wʋma yell ye.

21La kaoreng yɛl-bʋ-kaoodba leb n lenga a Pɩyɛɛr dãmb n leb n bas-b n ka tõog n paam bũmb sẽn na n sɩbg-b ye, b sẽn zoet nebã yĩnga. Tɩ bõe, neba fãa ra pẽgda Wẽnnaam bũmb ninga sẽn maana yĩnga.

22Bala, rao ninga maagrã sẽn yɩ bõn-bãndã da tara sẽn yɩɩd yʋʋm pis-naase.

23La b sẽn yiis a Pɩyɛɛr ne a Zã n base, bãmb kẽnga b ba-biis a taaba nengẽ, n tɩ togs-b bũmb ning fãa maan-kʋʋdba kãsem-dãmba ne kãsem-dãmba sẽn da yeel bãmbã.

24Tẽedba sẽn wʋm yõwã, b lagma taab n pʋʋs Wẽnnaam n yeel yaa: Zu-soaba, yãmb n naan yĩngr la tẽnga, la ko-kãsengã, la bũmb nins fãa sẽn be b pʋsẽ wã,

25yãmb n kɩt tɩ tõnd yaab a Daviid sẽn ya yãmb tʋmtʋmda gom ne Sɩɩg-sõng pãnga, n yeel tɩ: "Yaa bõe yĩng tɩ buud toay-toayã sũy puudẽ, la yaa bõe tɩ nebã set sedb sẽn ka võore.

26Dũniyã rĩm-dãmba segla b mens zabr yĩnga, la nanamsã lagma taaba, n na n zab ne Zu-soabã la ne bãmb Kiristã."

27Tɩ bõe, Herood ne a Põns Pilat sɩd lagma taab Zeruzalɛm ka, ne bʋ-zẽmsã la ne Israyɛl nebã n zab ne yãmb tẽn-tʋmd-sõng a Zezi yãmb sẽn yãkã.

28Woto, bãmb pidsa bũmb ninga fãa sẽn zems yãmb sẽn da pĩnd n yãk ne y pãnga la y ratma.

29La moasã, Zu-soaba, kelg-y b zabr goama. La y kõ y tẽn-tʋmdbã raood kãseng tɩ b moon yãmb koɛɛgã.

30Tẽeg-y y nug n kɩt tɩ neb paam maagre, tɩ bõn-bãna la bãna maan ne y tẽn-tʋmd-sõng a Zezi yʋʋre.

31La bãmb sẽn pʋʋs n sɛ, bãmb sẽn da tigim taab roog ningã rigmdame. La b fãa pida ne Sɩɩg-sõngo. La b moona Wẽnnaam koɛɛgã ne raoodo.

32Neb wʋsgã sẽn ya tẽedbã sũyã la b yama fãa ra yaa a yembre. Bãmb ned ba a yen dag n ka yet tɩ bũmb nins yẽ sẽn so wã yaa a meng rẽnd ye. La paoongã fãa ra yaa bãmb fãa n so.

33La tẽn-tʋmdbã ra kɩta Zu-soaba a Zezi vʋʋgrã kaset ne pãn-kãsenga. La bark kãseng ra sigda bãmb fãa zutu.

34La bãmb sʋka ned ba a yen da ka naong soab ye, bala, neb nins fãa sẽn da tar pʋto, wall rotã koosa bãmb fãa, n dɩk b sẽn koosã ligd n tall n wa.

35La b kɩta tẽn-tʋmdba ligdã, la b pʋɩta ligdã tɩ ned kam fãa paam sẽn zems a sõngre.

36La a Zozɛf, tẽn-tʋmdbã sẽn pʋd a soab yʋʋr t'a Barnabas sẽn dat n togs tɩ ned sẽn belsd a taaba. Yẽ yaa Levi buudu la a yita Sɩpr.

37Yẽ koosa a pʋʋg n tall ligdã n wa rɩgl tẽn-tʋmdba taoore.

← Chapter 3 Jump to: Chapter 5 →