Acts 21

Mossi Moore (KÃAB-PAALGÃ KOE-NOOGO)

← Chapter 20 Jump to: Chapter 22 →

1La tõnd sẽn bas bãmba, d kẽe koom-koglg n loog n kẽng tɩrg n ta Kos. La vẽkembeoogo tõnd taa Rood, n yaool n yi be n kẽng Patara.

2Tõnd yãnda koom-koglg beene sẽn dag n dabd Fenisi, tõnd yaool n kẽe yẽnda n kẽnge.

3Tõnd sẽn kẽng n kolg Sɩpre, tõnd bas-a-la goabg n kẽng Siiri sẽne n na yeg Tɩɩr n tɩ sig zĩig ning koom-koglgã sẽn tog n sik a zɩɩbã.

4Tõnd yãa tẽedb beene la tõnd paa ne bãmb rasem a yopoe. La Sɩɩg-sõng wilga bãmb tɩ b yeel a Poll t'a ra kẽng Zeruzalɛm ye.

5La rasem kãens loogr zugẽ, tõnd loogame. La b fãa ne b pagbã la b kambã yãaga tõndo, hal n yi tẽnga pʋgẽ. Tõnd yĩgimda koomã noor n pʋʋse.

6Dẽ, tõnd sẽn pʋʋs taab wẽnd-na-taas n sɛ, tõnd kẽe koom-koglgẽ wã, la b lebgame n kuil b yiyã.

7Tõnd sẽn kẽn ne koom-koglgã n sɛ, tõnd yii Tɩɩr n kẽng Tolemayiis n tɩ pʋʋs ba-biisã la d zĩnd ne bãmb beene daar a yen.

8Vẽkembeoogo, tõnd loogame n ta Sezaare. Tõnd siga koe-moaand a Filip zakẽ. Yẽnda yaa neb a yopoe wã b sẽn da tũus Zeruzalɛmã nin-yende.

9La yẽ ra tara kom-pugli a naas sẽn nan ka mi rao ye, n ya Wẽnnaam no-rɛɛsdba.

10Tõnd paa Sezaare rasem wʋsgo, la Wẽnnaam no-rɛɛs a yen yʋʋr sẽn boond t'a Agabus yii Zude n wa tõnd nengẽ.

11Yẽ rɩka a Poll sẽbdgã n sẽb a nao ne a nus n yeel yaa: Ade, Sɩɩg-sõng yetame tɩ Zuif-rãmbã na n sẽba ned ning sẽn so-a sẽbd kãnga wã a woto Zeruzalɛm, n ning-a bu-zẽmsa nusẽ.

12Tõnd ne neb nins sẽn be Sezaare wã sẽn wʋm bõn-kãnga, tõnd kosa a Poll t'a ra kẽng Zeruzalɛm ye.

13La a Poll leokame: yaa bõe n tar yãmb tɩ y yãbd n na n sãam mam sũuri? Bala, mam seglame n sɛ, la ka sẽbrã yĩng bal ye. M seglame me n na n ki Zeruzalɛm Zu-soab a Zezi yʋʋrã yĩnga.

14La yẽ sẽn ka sak tõnd sẽn datã, d bas-a lame la d yeel tɩ Zu-soabã maan b raabo.

15Rasem kãens sẽn looge, tõnd segla d teed n kẽng Zeruzalɛm.

16Sezaare karen-biis kẽer me yãaga tõndo. B talla tõnd n tɩ ta rao a yen sẽn yit Sɩpr t'a yʋʋr boond t'a Nazõ yiri. Yẽ yaa karen-bi-kʋdre. Yaa yẽ zakẽ la tõnd tog n zĩndi.

17Tõnd sẽn ta Zeruzalɛm, ba-biisã reega tõnd ne sũ-noogo.

18Vẽkembeoogo, a Poll kẽnga a Zak yir ne tõndo, la a Zezi tẽedba kãsem-dãmb fãa tigma beene.

19A Poll sẽn pʋʋs-b n sɛ, a sɩngame n togs bãmb bũmb nins fãa Wẽnnaam sẽn tall yẽnda n maan bu-zẽmsã sʋkã.

20Bãmb sẽn kelg a Poll goama, b pẽga Wẽnnaam la b yeel a Poll yaa: Ba biiga, yãmb yãame, Zuif-rãmb tus wʋsg n lebg tẽedba, la b fãa wɩngda ne a Moyiis tõogã.

21Mik b ra kɩtame tɩ bãmb tẽed tɩ yãmb zãmsda Zuif-rãmb nins fãa sẽn be bu-zẽmsa sʋkã n yet-b tɩ b wẽnemd n bas a Moyiis tõogã, la b ra kẽes b kamba bãongo, la b ra tũ mininda ye.

22Dẽ wã, d na n maana wãna? Bala, neb wʋsg na n sɩd wʋmame tɩ y waame la neb kʋʋng na n tigmame.

23Woto yĩnga, bɩ y maan bũmb ninga tõnd sẽn na n yeel-y wã. Tõnd tara raop a naas sẽn maan pʋleng ne Wẽnnaam.

24Peeg-y-ba, n naag ne-b n sak miningã n yɩlg-y mense, la y yao yaoodã, tɩ b põng b zutã. Dẽ neba fãa na n bãngame tɩ bũmb nins fãa b sẽn wʋm tɩ b gomd yãmb wɛɛngẽ wã ka sɩd ye, la tɩ yãmb meng sakda a Moyiis tõogã.

25Sã n ya ne bu-zẽms nins sẽn lebg tẽedbã, tõnd gʋls-b lame n yeel-b tɩ b ra wãb rũms nemd b sẽn maan maoong n kõ wẽn-naands ye, la b ra rɩ zɩɩm, la b ra wãb rũng sẽn sãrg nemd ye, la b ra maan wɩɩbd ye.

26Vẽkembeoogo, a Poll peega nin-bãmba b naasã n naag ne-b n yɩlg-b mense, n yaool n kẽ wẽnd-doogẽ wã n togs nebã bãmb yɩlgrã rayã sẽn na n baas wakat ninga, la wakat ning bãmb ned kam fãa sẽn na n wa ne a kũun tɩ b maan maoongã.

27Rasem a yopoe wã sẽn kolg pidsgu, Zuif-rãmbã sẽn yit Azi soolmã sẽn yãa a Poll wẽnd-doogã pʋgẽ, b rãmba neb kʋʋngã gilli, n yõk a Polle,

28n kelemd n yetẽ yaa: Israyɛl neba, wa n sõng-y-do! Ad rao ninga sẽn zãmsd neba fãa zĩiga fãa tɩ b kɩɩs Israyɛl buudã, la b kɩɩs a Moyiis tõogã la zĩ-kãnga, la a kɩtame meng tɩ Gɛrk-rãmb kẽ wẽnd-doogẽ wã n kɩt tɩ zĩ-sõng-kãnga rẽgme.

29Bala b rag n yãa Efɛɛs rao a Torfim t'a tũud a Poll tẽngã pʋgẽ, la b tagsdame t'a Poll tall-a lame n kẽ wẽnd-doogẽ wã.

30Tẽngã fãa rãmbame, la neb yii zĩiga fãa n zoe n wa. B yõka a Poll n tɛ-a n yiis wẽnd-doogẽ wã, la b pag kuɩlemsã tao-tao.

31La b sẽn dat kʋ a Pollã, b wa n togsa sodaas tusr naaba tɩ Zeruzalɛm fãa dãmbame.

32Wakat kãng bala, yẽ yãka sodaase, la sodaas koabg nanamse, n zoe n kẽng neba nengẽ. Nebã sẽn yã sodaas tusr naaba ne sodaasã, b basa a Poll pãbre.

33Dẽ, sodaas tusr naaba kolgame n yõka a Poll n kɩt tɩ b balg-a ne bãens a yiibu. La a yaool n sok a Poll sẽn ya ned ninga, la a sẽn maan bũmb ninga.

34La neb kʋʋngã sʋka, kẽer kelemdame n yet tɩ woto, tɩ kẽer yet bũmb a to. Dẽ, bʋrgã sẽn ya wʋsg tɩ sodaas tusr naabã ka tõe n bãng sẽn ya sɩdã, a yeelame tɩ b tall a Poll n kẽng gãosgẽ wã.

35La a Poll sẽn ta rʋʋdgã, yɩɩ tɩlɛ tɩ sodaasã tebg yẽnda, neb kʋʋngã sẽn maood n dat n maan a Poll pãnga yĩnga.

36Bala, b fãa ra pʋgdame n kelemdẽ n yetẽ tɩ b kʋ-a.

37La wakat ning b sẽn tar a Poll n kẽed gãosgẽ wã, a Poll yeela sodaas tusr naabã yaa: M tara noor tɩ yeel-y bũmbu? La sodaas tusr naabã sok-a lame yaa: Fo mii Gɛrk goamã?

38Rẽnd fo ka Ezipt ned ninga sẽn dag n wa-a ne rãmbg pĩndã, n peeg nin-kʋʋdb tus a naas tɩ b tũ-f n kẽ weoogã wɛ?

39A Poll leokame yaa: Mam yaa Zuif, m doga Tars sẽn be Silisi soolem, m yaa tẽn-kãseng neda. M bõosd-y lame tɩ y kõ-maam noor tɩ m gom ne nebã.

40La sodaas tusr naabã kõ-a-la noore, la a Poll yik n yalsa rʋʋdgã zug n zẽk a nug n zãas neba, la bʋrga sɛɛme, tɩ lebg sɩddd. Dẽ, yẽ gomã ne bãmb ne hebre-rãmb goamã.

← Chapter 20 Jump to: Chapter 22 →