Acts 19

Mossi Moore (KÃAB-PAALGÃ KOE-NOOGO)

← Chapter 18 Jump to: Chapter 20 →

1A Apolos sẽn wa n be Korẽntã wakate, a Poll pɩʋʋga soolem nins sẽn be zugẽ wã n kẽng Efɛɛse. A Poll yãa karen-biis kẽer be,

2n sok-b tɩ b sẽn tẽ wã, b paama Sɩɩg-sõngo. La b leoka yẽnda tɩ bãmb zɩɩ n wʋm tɩ b gomd tɩ Sɩɩg-sõng n be ye.

3T'a Poll sok-b tɩ rẽ wã lisg ninga b sẽn deegã yaa bʋgo? Tɩ b leok tɩ yaa a Zã lisgã.

4Dẽ, a Poll yeel-b lame yaa: A Zã rag n lisda neb nins sẽn tek-b yam n kos sugrã, la b rag n yeta Israyɛl nebã tɩ b tẽ ned ningã sẽn na n pʋgl a yẽnda n wa wã. Sẽn dat n togs t'a Zezi.

5Bãmb sẽn wʋm a woto, b kɩtame tɩ b lis-b koomẽ ne Zu-soab a Zezi yʋʋre.

6A Poll tika bãmb ne a nusi, la Sɩɩg-sõng siga b zutu. Bãmb sɩngame n gom gom-zẽna n togs bãngr goama.

7Nin-kãens fãa sõorã ra kolga piig la a yiibu.

8A Poll kẽe karen-doogẽ wã n gom ne Pɛl-kɛgenga, la yẽ moona Wẽnnaam soolem koɛɛgã kiis a tãabo n maood n dat n wilg sẽn kelgd-b yẽ wã tɩ yaa sɩda.

9La neb kẽer riglima b sũyã n tõgdg tɩ b ka na n tẽ ye. La b gom Zu-soaba sor wẽng neb wʋsgã taoore. Dẽ, a Poll yii bãmb sʋk, n peeg karen-biisã toor n kẽng a Tiranuus kaorengã roog pʋg n zãms-b daar fãa.

10Bõn-kãng kaoosa yʋʋm a yiibu, hal tɩ Zuif-rãmba ne Gɛrk-rãmba la neb nins fãa sẽn be Azi soolma wʋm Zu-soabã koɛɛgã.

11La Wẽnnaam maana bõn-bãn-kãsems ne a Poll nusi.

12Hal tɩ b rɩgs pɛɛla wala fut sẽn da sɩɩs a Poll yĩngã n ningd bãad-dãmba zut la b paamda maagre, la sɩ-wẽnsã yit n basd-b lame.

13Tɩt rãmb kẽer sẽn da ya Zuif buud n ya gõaadb makame n na tall Zu-soab a Zezi yʋʋrã n dig zĩn-dãmb tɩ b yi n bas bãad-dãmba. Tɩtã rãmb yeela sɩ-wẽnsã yaa: Ne a Poll sẽn moond Zezi ningã wã yʋʋre, mam yeta yãmb tɩ y yi.

14Neb nins sẽn dag n maand a woto wã yaa Zuif-rãmba maan-kʋʋdbã kãsem a yen yʋʋr sẽn boond t'a Seva kom-dibli a yopoe.

15La sɩ-wẽnga leok-b lame yaa: Mam mii a Zezi, la m mii a Poll sẽn ya ned ninga. La yãmba, yãmb yaa ãnna rãmba?

16La sɩ-wẽngã sẽn tar ned ningã yikame n yẽeg-b n zab ne-b n tõog-b fãa ne pãng hal tɩ b zoe n yi ro-kãng pʋg bɛɛl la ne sãmpoaga.

17La Zuif-rãmba ne Gɛrk-rãmba sẽn da be Efɛɛs fãa wʋma bõn-kãnga: La rabeem yõka b fãa, la Zu-soab a Zezi yʋʋrã paama waoogre.

18Neb nins sẽn tẽ wã wʋsg dag wat n togsda b sẽn da maan bũmb ninsã neba taoore.

19La bãmb neb wʋsg sẽn da be bãmb sʋkã n ya bag-bʋgdbã talla b sɛbã n wa n yõog bugum neba fãa taoore. La b geela sɛba ligd n mik tɩ taa wanzuri ligd tus pis nu.

20Woto kɩtame tɩ Zu-soaba koɛɛg saag ne pãnga la tõogre.

21Bõn-kãens zugẽ, a Poll yãka yam n na pɩʋʋg Masedoan ne Akayi n kẽng Zeruzalɛm, la a yet tɩ yẽ sã n ta beene, yaa tɩlɛ t'a kẽng Rom tẽng me.

22A Poll tʋma a sõangdb a yiib tɩ b kẽng Masedoan, yaa a Tɩmote ne a Erast. La yẽnda meng leb n paa Azi soolem n kaoos bilfu.

23Wakat kãnga, rãmb-kãsems n yik Zu-soabã sor wɛɛngẽ.

24Yõak a yembr n da be t'a yʋʋr boond t'a Demetiryus, yẽ ra maanda wẽn-poak a Artemi pʋʋsg ro-bõoneg ne wanzuri. A maanda a woto t'a tʋmtʋmdba paamd ligd wʋsgo.

25Yẽ tigma nin-bãmb ne neb nins sẽn ya yõgsã n yeel-b yaa: Raopa, yãmb fãa miime tɩ yaa ne nug-tʋʋm kãngã la tõnd tʋmd n paamd ligdi.

26La yãmb yãtame la y wʋmd bũmb nins rao a Pollã sẽn maandã. Tɩ bõe, yẽnda yetame tɩ neba nus sẽn maan wẽnnaam-dãmba ninsã ka wẽnnaam-dãmb ye, la a tõogame n tek neb wʋsg yam. La ka Efɛɛs soolem bal ye, yaa sẽn kolg Azi fãa gilli.

27Sã n ka gũusi, bõn-kãnga na n sãama tõnd tʋʋmdã, la sẽn paase, a na n maaname tɩ wẽn-poak kãseng a Artemi pʋʋsgã roog ka leb n tar waoogr ye. Dẽ, Azi soolem nebã fãa ne dũniyã fãa sẽn da pʋʋsd wẽn-poak ninga ka na n le paam pẽgr ye.

28La tẽnga fãa rãmbame. Bãmb yõga Gayus ne a Aristark sẽn ya Masedoan neba n yaa a Poll tũud-n-taasã, n naag taab n wudg tao-tao n kẽ reema zĩigẽ.

29A Poll dag n dat n kẽnga neb kʋʋngã taoore, la karen-biisã gɩdg-a lame.

30Kãsem-dãmb kẽer meng sẽn be Azi soolem n ya a Poll Zo-rãmb tʋmame tɩ b kos-a t'a ra kẽng reema zĩigẽ ye.

31La wakat kãnga, neb kẽer kelemdame n yet tɩ woto, tɩ neb kẽer kelem n yeel bũmb a to. Tɩ bõe, neb kʋʋngã rãmbdame, hal tɩ neb kẽer meng rag ka mi bũmb ning yĩng sẽn kɩt tɩ b tigma ye.

32La b kɩtame t'a Alegsãndr yi kʋʋngã sʋka, tɩ Zuif-rãmba tus-a t'a kẽng neba taoore. La a Alegsãndr zẽka a nug n na n gom neba taoore.

33La neba sẽn bãng t'a Alegsãndr yaa Zuifã, b fãa naaga taab n kelem hal tɩ kolg lɛɛr a yiib n yetẽ tɩ Efɛɛsẽ-rãmbã wẽn-poak a Artemi yaa kãsenga.

34Baoosgo, tẽnga seb-gʋlsdã tõogame tɩ neba sĩndi, la a yeel yaa: Efɛɛs neba, ãnna soab n ka mi tɩ yaa Efɛɛz tẽngã n ya Artemi kãsenga pʋʋsg roog gũuda, la Artemi naandã sẽn yi yĩngr n lʋɩ wã gũuda?

35La ned ka tõe n kɩɩs bõn-kãng ye. Rẽ wã yĩnga, y tog n maaga y mense n da maan bũmb baa fʋɩ ne yãgb ye.

36Tɩ bõe, rao-kãens yãmb sẽn tall n wa ka wã, b ka paooge, wala b tʋʋs tõnd wẽn-poakã ye.

37Rẽ wã yĩnga, a Demetiryus ne a tʋmd-n-taasã sã n tar yell ne neda, bʋʋd ray beeme, la bʋ-kaoodb beeme. Bɩ b tɩ bʋ ne taab be.

38Yãmb sã n ket n tar yɛl a taaba, bʋ-kaoodbã sã n wa tigim wa sẽn zems ne tõogã, b na ges yel-kãng yelle.

39La sɩdã, b tõe dõda tõnd n yet tɩ d rãmbda tẽngã, bũmb ning sẽn maan dũnna wã yĩnga. Bala, tõnd ka tar bũmb sẽn wilgd tɩ d tara noor tɩ tigim a woto ye.

40La yẽ sẽn gom a woto n sɛ, a kɩtame tɩ nebã looge.

← Chapter 18 Jump to: Chapter 20 →