Acts 11

Mossi Moore (KÃAB-PAALGÃ KOE-NOOGO)

← Chapter 10 Jump to: Chapter 12 →

1Tʋmtʋmdba la b ba-biisã sẽn da be Zude wã wʋmame tɩ bu-zẽmsã me reega Wẽnnaam goama.

2La a Pɩyɛɛr sẽn lebg n wa Zeruzalɛm tẽedb nins sẽn ya Zuif buudã wẽe nokoeemd ne yẽnda.

3N yeel-a yaa: Yãmb kẽe neb sẽn ka kẽ bãong zakẽ n dɩ ne-ba!

4La a Pɩyɛɛr togsa bãmb ball-ball yellã fãa sẽn maana, n yeel-b yaa:

5Mam dag n bee Zope tẽngã pʋgẽ, La mam sẽn wa n pʋʋsdẽ, mam paama vẽnegre. Mam yãa bũmb sẽn wẽnd wa peen-bedr sẽn yi arzãn n sigd mam nengẽ t'a noy a naasa loe. La a sulgame n pẽneg maam.

6Mam maaga m meng n gese la m yãa rũms sẽn tar nao a naase, we-rũmsi, baa bõn-vuuds ne bõn-pɩgs sẽn be a pʋgẽ wã.

7Dẽ mam wʋma koɛɛg sẽn yeel tɩɩyɛɛr yik n kʋ n dɩ.

8La mam leokame yaa: Ayo, Zu-soaba, tɩ bõe bũmb sẽn ka zems wala sẽn ya rẽgd na n zɩɩ n kẽ mam noorẽ ye.

9La koɛɛga yii arzãn naoor a yiib soab n yeel maam yaa: Wẽnnaam sẽn yeel tɩ bũmb ninga yaa yɩlemdã, bɩ f ra bool-a tɩ rẽgd ye.

10Bõn-kãng maana hal naoor a tãabo, dẽ, a fãa lebg n dʋʋ arzãna.

11La wakat kãng bala, raop a tãab sẽn yi Sezaare b sẽn tʋm-b mam nengẽ waa n taa zak ninga mam sẽn da be wã noore.

12Sɩɩg-sõng yeela maam tɩ m tũ-b n loog la m da sãmb ye. Ba-biisã yoobã sẽn be ka wã yãaga maam n ta Sezaare. La tõnd kẽ a Korney zakẽ wã.

13La a Korney togsa tõnd sẽn yɩ to-to tɩ yẽnda yã malɛkã sẽn wa yẽ rooga pʋgẽ n yeel yẽ t'a tʋm neb Zope tɩ b tɩ bool a Sɩmo Pɩyɛɛr t'a wa.

14T'a Pɩyɛɛr na n togsa yẽ koees sẽn na n kɩt tɩ yẽnda ne a yirã rãmb fãa paam fãagre.

15La mam sẽn sɩng n gomdã, Sɩɩg-sõng siga bãmb zut wala b sẽn dag sig tõnd zut sɩngrẽ wã.

16Dẽ, mam tẽega Zu-soabã goamã b sẽn dag n yeelã: A Zã lisa ne koom la b na n lisa yãmb Sɩɩg-sõng pʋga.

17Rẽ wã yĩnga, Wẽnnaam sẽn kõ-b kũun ninga b sẽn dag n kõ tõnd d sẽn tẽ Zu-soab a Zezi Kirist yĩngã, dẽ mam yaa ãnna soab n tõe n kɩɩs Wẽnnaam?

18Bãmb sẽn wʋm bõn-kãnga, b sĩnda b noore. La b pẽga Wẽnnaam n yeel yaa: Rẽnd Wẽnnaam kɩtame tɩ bu-zẽmsã me tek yam n kos sugr n na paam vɩɩm.

19Namsg ninga sẽn paam tẽedba a Etɛn kũuma poorẽ wã kɩtame tɩ b sãeeg n kẽng hal Fenisi, la Sɩpr ne Ãntiyos la b ka moon ned a to Wẽnnaam koɛɛga sã ka Zuif-rãmba bal ye.

20Baoosgo tẽedb kẽer sẽn yi Sɩpr la Sirɛn waa Ãntiyos la b goma ne neb a taabã me n moon-b Zu-soab a Zezi koe-noogã.

21Zu-soaba pãng da bee ne bãmba la neb wʋsg tẽe Zu-soabã n kos sugri.

22A Zezi tẽedba sẽn be Zeruzalɛma wʋma koe-kãnga, la b tʋma a Barnabas Ãntiyos.

23La yẽnda sẽn ta n yãnd Wẽnnaam sẽn ning tẽedba bark to-to wã, a sũurã yɩɩ noogo. La a paasa b fãa raood n yet tɩ b kell n tũ Zu-soabã ne b sũyã fãa n da bas ye.

24Tɩ bõe, a Barnabas yaa nin-sõngo, n pid ne Sɩɩg-sõngo n tar tẽebo. La neb wʋsg tẽe Zu-soabã.

25Dẽ poore,a Barnabas kẽnga Tars n na n tɩ bao a Solle.

26La yẽ sẽn yãnd-a Soll be a peeg-a lame n wa Ãntiyos. Bãmb paa be ne a Zezi tẽedba yʋʋmd tõre n zãms neb kʋʋng wʋsgo. Yaa Ãntiyos la b sɩng n bool a Zezi karen-biisã tɩ Kirist neba.

27La ra-kãense, Wẽnnaam no-rɛɛsdb yii Zeruzalɛm n wa Ãntiyos.

28La bãmb ned a yen yʋʋr sẽn boond t'a Agabus yikame n togs ne Sɩɩg-sõng pãng tɩ wakat n wat tɩ kom-kãseng na n zĩnd dũniyã tɛk fãa. La komã sɩd zĩnda a Sezaar kolood sẽn wa n dɩt naam wakate.

29Dẽ karen-biisã yãka yam tɩned kam fãa kɩs sõngr ning sẽn zems a pãng tɩ b tʋm n sõng ba-biisã sẽn dag n be Zude soolma.

30La b maana a woto n dɩk n ning a Barnabas ne a Soll nusẽ tɩ b tɩ kɩs kãsem-dãmba sẽn be Zude wã.

← Chapter 10 Jump to: Chapter 12 →