Acts 17

Mossi Moore (KÃAB-PAALGÃ KOE-NOOGO)

← Chapter 16 Jump to: Chapter 18 →

1A Poll dãmb tũu Amfipolis ne Apoloni n ta Tesalonik. Zuif-rãmbã karen-doog n da be be.

2A Poll kẽe karen-doogẽ wã wa a sẽn minim n maandẽ wã, La a sõsa ne bãmb gʋlsg sõamyã wɛɛngẽ, vʋʋsg ray a taab n pʋgl taaba.

3Yẽ ra bilgda bãmb la a wilgd-b tɩ Kirist da tog n namsame, la tɩ b na n vʋʋgame n bas kũum. A Poll yeel-b lame yaa: Zezi ning mam sẽn gomd ne yãmb b yellã, yaa bãmb la Kiristã.

4La Zuif-rãmbã kẽer tẽe a Poll sẽn yeelã, la bãmb ne Gɛrk-rãmb kʋʋng wʋsgo, la pagb wʋsg me nebã sẽn waoogd naaga ne a Poll la a Sɩlaas.

5La sũ-kiir yõka Zuif-rãmbã tɩ b kams ninsaan-faad neba sʋka, n kɩt tɩ b gũm taaba, n dambd tẽngã. B kẽnga a Zaazõ yirã n na n tɩ bao a Poll ne a Sɩlaas n tall-b n kẽng nebã taoore.

6La b sẽn ka yãnd a Poll rãmba, b yõga a Zaazõ ne ba-biis kẽer n tall-b n kẽng tẽn-soaadbã taoore, n kelemd n yetẽ yaa: Nin bãmbã, sẽn dãmb-b dũni fãa wã waa ka me, la a Zaazõ reeg-b-la a yiri.

7B fãa tʋʋmã kɩɩsda Sezaar noorã, la b yetame tɩ rĩm a to n be: a Zezi.

8Gom-kãens namsa neb kʋʋngã ne tẽn-soaadbã.

9La b kɩtame t'a Zaazõ ne neb a taabã gãneg yaood tɩ b yaool n bas-b tɩ b looge.

10Tao-tao bala, ba-biisã kɩtame t'a Poll ne a Sɩlaas loog Beere ne yʋngã. La b sẽn ta beene bala, b kẽe Zuif-rãmba karen-doogẽ.

11Zuif-rãmb nins sẽn dag n be Beere wã da tara yam sõng n yɩɩd sẽn be-b Tesalonikã. Bãmb deega Wẽnnaam koɛɛgã ne b sũyã fãa. La daar fãa, bãmb da vɛɛsda gʋls sõamyã n dat n bãng bũmb nins b sẽn yet bãmbã sã n yaa a sɩda.

12Neb wʋsg bãmb sʋkã tẽeme, la Gɛrk-rãmba sʋk me, pagb wʋsg nebã sẽn nande, ne raop wʋsg tẽeme.

13La Zuif-rãmb nins sẽn be Tesalonikã sẽn bãng t'a Poll da moonda Wẽnnaam koɛɛgã Beere me, b waa beene, n pirs nebã, n dãmb-ba.

14Dẽ, tao-tao bala, ba-biisã kɩtame t'a Poll zãag n kẽng ko-kãsengã noore. La a Sɩlaas ne a Tɩmote paa Beere.

15Neb nins sẽn yãag a Pollã talla yẽnda n ta Atɛn. La a Poll yeel-b lame tɩ b sã n leb bɩ b tɩ yeel a Sɩlaas ne a Tɩmote tɩ b babs-a n wa tao-tao. Dẽ, b lebgame.

16A Poll sẽn be Atɛn n gũud a Sɩlaas ne a Tɩmote waoongã, yẽ sũurã sãama wʋsgo, a sẽn yã tɩ tẽngã pida ne wẽn-naandsã yĩnga.

17Dẽ, a Poll dag n sõsda ne Zuif-rãmbã, la ne buud a taabã neb sẽn zoet Wẽnnaamã karen-doogẽ wã. La daar fãa, raagã pʋga, a ra sõsda ne neb nins sẽn wat be wã.

18Epikuryẽ-rãmba ne Ɛstoyisẽ-dãmba karen-saam-dãmb kẽer me sɩngame n gom ne a Polle. La kẽer sokame tɩ gom-to-nedã rat n yeelame tɩ bõe? La neb a taab yetame tɩ yaa wa a Poll yaa wẽn-zẽms koe-toagsda, bala, a dag n gomda a Zezi la kũum vʋʋgr yelle.

19La b talla a Poll n kẽng Areopaazã kãsem-dãmbã taoor n sok-a yaa: Dẽ yĩnga, fo tõe n togsa tõnd zãms-paalgã fo sẽn tarã võor tɩ d bãnge?

20Bala, bũmb nins fo sẽn togsd tõndã yaa bõn-sãams ne tõndo, la tõnd dat n bãnga b võore.

21Tɩ bõe, Atɛn neba fãa ne sãambã sẽn be bãmb sʋkã da ka rɩkd b weerã n maand bũmb a to tɩ sã n ka tɩ gom, wall tɩ kelg koe-paals ye.

22A Poll yik n yalsa Areopaazã sʋk n yeel yaa: Atɛn neba, bũmb fãa pʋgẽ, mam mikame tɩ yãmb yaa wẽn-pʋʋsdb meng-menga.

23Tɩ bõe, mam sẽn wa n kẽnd la m get bũmb nins yãmb sẽn dond n pʋʋsdã, mam pʋs n yãa tẽn-kugr a yen tɩ b gʋls a zug tɩ "wẽnnaam ning d sẽn ka mi wã rẽnda". Wẽnnaam ning yãmb sẽn waoogd n yaool n ka mi-bã, yaa Wẽnnaam kãng yell la mam sẽn gomd ne yãmbã.

24Wẽnnaam ning sẽn naan-a dũni wã ne bũmb nins fãa sẽn be a pʋgẽ wã, bãmb yaa yĩngr la tẽng Zu-soaba, la b ka kẽed pʋʋsg rot ninsaalb nus sẽn me pʋsẽ,

25la b ka baood me tɩ ninsaalb tʋm ne b nus n sõng-b wa bũmb n paoog-b ye. Tɩ bõe, yaa bãmb n kõt ninsaalbã vɩɩm, la vʋʋsem, la bũmbã fãa.

26Wẽnnaam talla nin-yend n kɩt tɩ ninsaalbã buud fãa zĩnd dũni zug tɛk fãa, la b welga wakat n kõ ninsaalbã, la b ning b soolmã tods n kõ-ba.

27Wẽnnaam maana bõn-kãnga, sẽn na n yɩlẽ tɩ ninsaalba bao bãmba, la tɩ b sẽn maood n dat n yãnd Wẽnnaamã, bɩ tõe tɩ b yãnd-ba. Tɩ bõe, Wẽnnaam ka zãr ne tõnd ned ba a yen ye,

28bala, yaa bãmb pʋg la d tar vɩɩm, la d tõe n kẽne la d beẽ. Yaa wala yãmb yʋʋmba kẽer sẽn dag n yeel me tɩ tõnd yaa Wẽnnaam koãmbã.

29Rẽ, wã yĩnga, tõnd sẽn ya Wẽnnaam kambã, d ka tog n tags tɩ Wẽnnaam wẽnda sãnem, wala wanzuri, wala kugr sẽn peese wa sẽn zems ninsaalb minim la b tagsg ye.

30Neba sẽn ka mi b sẽn maanda wakate, Wẽnnaam ka maand bũmb ye, La moasã, b yeta nebã fãa sẽn be zĩiga fãa tɩ b tek yam n kos sugri.

31Tɩ bõe, Wẽnnaam yãka raare tɩ rao ning bãmb sẽn yãkã na n kao dũniyã fãa bʋʋd ne tɩrlem. La Wẽnnaam kõo neba fãa bãnde n vʋʋg rao-kãng n bas kũum n wilg tɩ yaa sɩda.

32La b sẽn wʋm a Poll sẽn gomd kũum vʋʋgr yellã, kẽer yaala yẽnda, la kẽer yeelame tɩ b na n leb n kelga a Poll koe-kãnga nindaare.

33Dẽ, a Poll yii bãmb sʋka.

34La baoosgo neb kẽer lagma a Poll n tẽ. A Denis sẽn ya bʋ-kaoodba sʋk ned a yen dag n naaga be, ne pag a yembr yʋʋr sẽn boond t'a Damaris n leb n paas neb a taaba.

← Chapter 16 Jump to: Chapter 18 →