Acts 3

Mossi Moore (KÃAB-PAALGÃ KOE-NOOGO)

← Chapter 2 Jump to: Chapter 4 →

1Zaabr lɛɛr a tãab sẽn ya pʋʋsgã wakat sẽn ta, a Pɩyɛɛr ne a Zã da tũu taab n kẽng wẽnd-doogẽ wã.

2La rao a ye sẽn dog ne komsem n da be be. La b ra rɩkda yẽ daar fãa n wat n zĩndgd-a wẽnd-doogã noor ninga b sẽn boond tɩ rigno-neerã t'a bõosd neb nins sẽn da kẽed wẽnd-doogẽ wã.

3La rao wã sẽn yã a Pɩyɛɛr ne a Zã sẽn dat n kẽ wẽnd-doogẽ wã, yẽ bõos-b lame.

4A Pɩyɛɛr ne a Zã gesa yẽnda n yeel-a t'a ges bãmba.

5La rao wã gesa a Pɩyɛɛr ne a zã n tẽed tɩ bãmb na n kõ-a-la bũmbu.

6La a Pɩyɛɛr yeel-a lame yaa: Mam ka tar wanzuri wala sãnem ye, la mam kõta foo bũmb ninga mam sẽn tarã, ne a Zezi Kirist sẽn yi Nazarɛt yʋʋre, yik n kẽne!

7La a Pɩyɛɛr gãda rao wã nug-rɩtgo, n kɩt t'a yiki. La wakat kãng bala koamsã nao wã ne a nao-sẽbã lebga kãenkãe.

8La yẽ yika wʋgʋp n yals yĩngr n sɩng kẽna. La yẽ kẽname n tũ bãmb n kẽ wẽnd-doogẽ wã n yɩgd n tiimsid n pẽgd Wẽnnaam.

9Nebã fãa yãnda yẽ sẽn kẽnd la a pẽgd Wẽnnaamã.

10La bãmb bãngame tɩ yaa rao ninga sẽn da zĩ wẽnd-doogã rignoor ninga sẽn boond tɩ neerã n bõosdẽ wã, la b sẽn yã bũmb ninga sẽn maan rao wã, dabeem yõk-b lame tɩ b yɛɛs wʋsgo.

11La rao wã sẽn da pʋgd a Pɩyɛɛr ne a Zã wã, neba fãa yɛɛsame n zoe n kẽng bãmb nengẽ, zĩig sẽn boond t'a Salmo veranda wã.

12A Pɩyɛɛr sẽn yã woto, a yeela nebã yaa: Yãmb Israyɛl neba, yaa bõe tɩ bõn-kãnga yɛɛs yãmba? La yaa bõe yĩng tɩ yãmb get tõnd a woto wala yaa ne tõnd pãng wala d sõmblem yĩng la d tõog n kɩt rao-kãnga kẽnda?

13Yaa Abraham ne Izak la a Zakob Wẽnnaam sẽn ya tõnd yaab-rãmba Wẽnnaamã n waoog b tẽn-tʋmd a Zezi. Yaa bãmb la yãmb sẽn da zãmb n yõk n kɩs a Pilat, t'a Pilat da tags n dat n bas-b tɩ yãmb tõdg yẽnda taoorã.

14Yãmb tõdga sõmblem la tɩrlem soabã, n kos tɩ b bas nin-kʋʋdã n kõ-yã.

15La y yaool n kɩt tɩ b kʋ vɩɩm-naabã. La Wẽnnaam vʋʋg-b lame tɩ b yi kũum sʋk n vɩ. Tõnd yaa bõn-kãng kaset dãmba.

16Yaa ne tẽeb la a Zezi yʋʋrã n kõ dao kãngã yãmb sẽn ne la y miẽ wã pãnga tõnd sẽn tẽe bãmb yʋʋrã yĩnga. Yaa tẽeb ne a Zezi n maag rao-kãnga zãng fasɩ yãmb fãa nifẽ.

17La moasã, m saam-biisi, mam miime tɩ yaa yãmb ne y nanamsa zɩɩlma yĩng n kɩt tɩ y maan a Zezi a woto.

18La Wẽnnaam maana a woto n pids bũmb ninga b sẽn da pĩnd n togs ne b no-rɛɛsdbã fãa noy tɩ bãmb Kiristã na n namsame wã.

19Dẽ, tek-y yam n kos sugri tɩ Wẽnnaam tõe n yẽes y yel-wẽna,

20woto, Zu-soaba na n kɩtame tɩ yolsg wakat wa. La b na n tʋma Kirist a Zezi bãmb sẽn da yãk yãmb yĩngã.

21A Zezi tog zĩnda arzãn nanda hal tɩ Wẽnnaam sẽn da togs bũmb ningã fãa wakat sẽn loogã ne b no-rɛɛs sõamyã noyã manegre wakat ta.

22A Moyiis ra yeelame: "Zu-soaba sẽn ya yãmb Wẽnnaam na n yãka b no-rɛɛs sẽn ya wa maam yãmb buudã sʋk n kõ-yã. Yãmb na n kelga bũmb nins fãa yẽ sẽn na n togs yãmbã.

23La ned ning sẽn ka kelgd-a Wẽnnaam no-rɛɛs kãnga, b na n menes-a-la Wẽnnaam nebã sʋka."

24La Wẽnnaam no-rɛɛsdbã fãa sẽn sɩng ne a Sãmwɛll la sẽn pʋgl-b bãmba me goma ra-kãens yelle.

25Yãmb yaa Wẽnnaam no-rɛɛsdba kamba, la kaool ninga Wẽnnaam sẽn maan ne tõnd yaab-rãmbã kamba, Wẽnnaam sẽn yeela Abraham tɩ dũniyã buud fãa na n paama bark bãmb yagensã maasem yĩngã.

26Yaa yãmb yĩng pipi la Wẽnnaam yãk b tẽn-tʋmd n tʋm-b yãmb nengẽ, tɩ ned kam fãa yãmb sʋkã sã n wẽnemd n bas a yel-wẽna bɩ b ning-a barka.

← Chapter 2 Jump to: Chapter 4 →