Acts 6

Mossi Moore (KÃAB-PAALGÃ KOE-NOOGO)

← Chapter 5 Jump to: Chapter 7 →

1Wakat kãnga, karen-biisã ra lebgda wʋsgo. Zuif-rãmb nins sẽn vɩ-b tẽn-taasã yẽgma ne Zuif-rãmb nins sẽn vɩ-b Zeruzalɛma, b sẽn da ka kõt bãmb pʋgkõapã b daar fãa pʋɩɩrã wa sẽn zemsã yĩnga.

2Dẽ, tẽn-tʋmdba piig la a yiibã tigma karen-biisa fãa n yeel-b yaa: A ka zems tɩ tõnd bas Wẽnnaam koɛɛgã mooneg n pʋɩt neb rɩɩb ye.

3Ba-biisi, woto yĩngã, bɩ y yãk raop a yopoe yãmb sʋkã sẽn tar kaset sõngo, n pid ne Sɩɩg-sõng la yam, tɩ tõnd ning tʋʋm-kãngã bãmb zutu.

4La tõnd na n kell n kẽnga taoor ne pʋʋsgo la Wẽnnaam koɛɛgã moonego.

5La neb kʋʋngã fãa sũur yɩɩ noog ne koe-kãnga. Dẽ, bãmb yãka a Etɛn sẽn pid ne tẽeb la Sɩɩg-sõngo la a Filip la a Porkoor la a Nikanoor la a Tɩmo la a Parmenaas ne a Nikola sẽn yit Ãntiyos n dag n kẽ Zuif-rãmba kaorengo.

6B talla bãmb n wa tẽn-tʋmdba nengẽ la b pʋʋsame n tik-b ne b nusi.

7La Wẽnnaam koɛɛgã ra saagdame n yɩɩd pĩnda, la karen-biisã sõor dag n paasda wʋsg Zeruzalɛm. La maan-kʋʋdb wʋsg ra sakda tẽebã.

8A Etɛn sẽn pid ne bark la pãnga, a maana bõn-yɛɛsds kãsemse la bãn neba sʋka.

9La karen-doog ning sẽn boond tɩ neb sẽn paam lohorem karen-doogã neb kẽere sẽn yit Sirɛn la Alegsãndri n paas ne Zuif-rãmb sẽn yit Silisi la Azi soolem sɩngame n wẽ nokoeemd ne a Etɛn.

10La a Etɛn sẽn da gomd ne yam la Sɩɩg-sõng pãngã, b ka tõog n leok yẽ ye.

11Dẽ, b maana Zãmb n paam neb tɩ b yeel tɩ bãmb wʋmame t'a Etɛn tʋʋd a Moyiis ne Wẽnnaam.

12La b rãmba nebã ne kãsem-dãmba la ne gʋlsdbã. La b waame n yõk a Etɛn ne pãng n tall-a n kẽng Kaoreng-yɛl-bʋ-kaoodbã taoore.

13Bãmb waa ne zĩri kaset dãmb tɩ b yet t'a Etɛn tʋʋda zĩ-sõngã la tõogã n ka basdẽ ye.

14Bala, bãmb wʋma a Etɛn sẽn yeel tɩ Nazarɛt dao a Zezi na n sãama zĩ-kãnga la b tek minind nins a Moyiis sẽn da kõ bãmbã.

15Neb nins sẽn da zĩ bʋ-kaoorã zĩigẽ wã fãa ra geta a Etɛn la b yãame tɩ yẽ nengã wẽnda wa malɛk nenga.

← Chapter 5 Jump to: Chapter 7 →