Acts 25

Mossi Moore (KÃAB-PAALGÃ KOE-NOOGO)

← Chapter 24 Jump to: Chapter 26 →

1A Festus sẽn wa soolma pʋg tɩ rabtãtẽ, a yii Sezaare n kẽng Zeruzalɛm.

2Maan-kʋʋdbã kãsem-dãmb ne Zuif-rãmba kãsem-dãmb dõta a Poll a Festus taoore.

3B kosa a Festus n pẽdg-a wʋsg n dat t'a maan bãmb neer n kɩt tɩ b tall a Poll n wa Zeruzalɛm, la b rag n segla bẽdg n dat n solg n kʋ-a Poll sorã zugu.

4A Festus leokame t'a bee bi-bees roog Sezaare, la sã n yɩ bilfu, yẽ menga na n lebg n lebame.

5La a yeel-b lame: Bɩ yãmb kãsem-dãmb kẽer tũ maam tɩ d kẽng Sezaare, tɩ rao-kãng sã n maana sẽn ya wẽng bɩ bãmb bʋ ne-a beene.

6A Festus ka kaoos b sʋk n yɩɩg rasem a nii bɩ piig ye. Dẽ a lebg n leba Sezaare. La vẽkembeoogo, a Festus zaoonda bʋʋda geer zug n yeel tɩ b tall a Poll n wa.

7La a Poll sẽn ta, Zuif-rãmb nins sẽn yi Zeruzalɛma gũbga yẽnda n dõt-a ne bõn-wẽns wʋsgo, la b ka tõe n wilg tɩ b sẽn dõt a Poll ne bũmb ninsã yaa sɩd ye.

8La a Poll goma n na n fãag a meng n yeel yaa: Mam ka maan bũmb sẽn ya wẽng n kɩɩs Zuif-rãmba tõogo wala sẽn kɩɩsd wẽnd-doogã bɩ Sezaar ye.

9Dẽ, a Festus sẽn dat n maan sẽn noom Zuif-rãmbã, yẽ soka a Poll yaa: Fo rat n kẽnga Zeruzalɛm tɩ b tɩ bʋ f bʋʋd mam taoor yel-kãnga poorẽ bɩɩ?

10A Poll leokame yaa: Mam yasa Sezaar bʋʋd geer taoore, la yaa ka la b tog kao mam bʋʋdo. Yãmb meng mii neere, tɩ mam ka maan bũmb n beeg Zuif-rãmbã ye.

11Mam sã n da tarẽ kongre, la m sã n da maane tʋʋm sẽn zems ne kũum, mam kõn zãgs tɩ m ka na n ki ye. La b sẽn dõt maam ne bũmb ningã sã n ya zĩri, ned ka tõe n yõk maam n kõ-b ye. Mam data Sezaar nengẽ.

12La a Festus sẽn yẽs ne a sõangdbã n sa, a leoka a Poll yaa: Fo sẽn dat Sezaar nengẽ wã, f na n kẽnga Sezaar nengẽ.

13La rasem bilf sẽn looge, rĩm a Agirpa ne a Bereniis waa Sezaare n na n pʋʋs a Festus.

14La b sẽn kaoos be rasem wʋsgo, a Festus togsa rĩma a Poll yellã n yeel yaa: A Feligs basa rao a yen sẽn ya bi-bɛɛg ka.

15Mam sẽn wa n be Zeruzalɛm wakatã, maan-kʋʋdbã kãsem-dãmb ne Zuif-rãmbã kãsem-dãmb bʋʋ ne yẽnda n kos maam tɩ m kao a bʋʋd tɩ zems kũum.

16Mam leoka bãmb tɩ Rom-dãmba ka minim tɩ rɩk bi-bɛɛg n kɩs tɩ b kʋ, n ka reng n kõ-a noor t'a yals a rõatbã taoor n paam weer n gom n fãag a meng ne bũmb ninga b sẽn dõd-a wã ye.

17Dẽ, b tũu maam n wa ka. La vẽkembeoogo mam zaoonda m bʋʋda geer n yeel tɩ b tall rao-kãng n wa.

18La a rõatbã sẽn wa wã, b ka tol n wilg tʋʋm wẽng ba a yen rao-kãnga sẽn maane, wa mam sẽn da tagsdã ye.

19Bãmb sẽn tar yell ne yẽ, yaa sẽn kẽed b mens wẽn-tũudum wɛɛngẽ, la ne rao a yen sẽn boond t'a Zezi n ki t'a poll yetẽ tɩ rao-kãng vɩɩme.

20Mam sẽn da ka mi m sẽn na n maan to-to ne yel-kãngã wã, m sok-a-la a sã n datẽ lame n kẽng Zeruzalɛm tɩ b tɩ bʋ a bʋʋd be yel-kãngã wɛɛngẽ.

21La a Poll kosame n yeel tɩ yẽ ratame tɩ b bas tɩ rĩm-kãsengã ges yẽ yellã yelle. Dẽ, mam kosa noor n na n tall-a hal tɩ m wa n tʋm-a Sezaar nengẽ.

22A Agirpa yeela a Festus yaa: Mam me rat n kelga rao-kãngã koɛɛga. A Festus leokame tɩ beoogo, a na n bool-a lame t'a wa t'a kelg-a.

23Dẽ, vẽkembeoogo, a Agirpa ne a Bereniis waa ne waoogr wʋsg n kẽ bʋʋda kaoob zĩigẽ ne sodaas tusr nanamsã, la tẽngã nin-kãsemse. La a Festus yeelame tɩ b tall a Poll n wa.

24Dẽ, a Festus yeelame: Rĩm a Agirpa, la yãmb fãa sẽn be ka ne tõndã, yãmb nee rao-kãngã, ned ningã poorẽ Zuif-rãmbã neb kʋʋngã fãa sẽn wa mam nengẽ sã n ya Zeruzalɛm, wall kaane n kelem n yeel tɩ rao-kãngã ka tog n vɩɩmdã.

25La ne maam, mam mikame t'a ka maan tʋʋm wẽng sẽn zems ne kũum ye. La yẽ meng sẽn yet t'a ratame tɩ rĩm kãsengã kaoo a bʋʋdã, mam yãka yam n na n tʋm-a rĩm kãsengã nengẽ.

26Mam ka tar koɛɛg vẽeneg n na n gʋls n togs rĩm kãsengã rao kãngã yellã wɛɛngẽ ye. Yaa rẽndã yĩng la m bool-a t'a wa yãmb taoore, sẽn yɩɩd fãa, a bee yãmb taoore rĩm a Agirpa, tɩ y sã n sogs-a n sɛ, bɩ m yaool n paam koɛɛg n gʋlse.

27Tɩ bõe, mam tagsdame tɩ yaa yalemdo tɩ tʋm bi-bɛɛg n ka tol n wilg vẽeneg a sẽn beeg ne bũmb ningã.

← Chapter 24 Jump to: Chapter 26 →