Acts 5

Mossi Moore (KÃAB-PAALGÃ KOE-NOOGO)

← Chapter 4 Jump to: Chapter 6 →

1La rao a yen yʋʋr sẽn boond t'a Ananiyas ne a paga a Safɩra me koosa b pʋʋgo.

2La a Ananiyas ne a paga seda ne taab n yãk ligdã n bĩng b mens yĩnga. La a rɩk sẽn kellã n tɩ kɩs tẽn-tʋmdbã.

3La a Pɩyɛɛr sok-a lame yaa: Ananiyas, yaa bõe tɩ Sʋtãana soog fo sũurã hal n kɩt tɩ f yag zĩrĩ ne Sɩɩg-sõng n yãk pʋʋgã ligd fo sẽn koosã?

4Fo sẽn dag n nan ka koos pʋʋgã, a ka foom n so laa? La fo sẽn koos-a wã ligdã ka fo rẽnd sɩda? La yɩɩ a wãn tɩ fo tags f sũurẽ tɩ maan bõn-kãnga? Fo ka yag zĩrĩ wã ne ninsaalb ye, la yaa ne Wẽnnaam la f yag-yã.

5A Ananiyas sẽn wʋm gom-kãense a lʋɩɩ tẽng n ki. La rabeem kãseng yõka neb nins fãa sẽn wʋm yel-kãnga

6La kom-bɩɩsa yikame n dɩk-a n vil ne pɛɛl n tɩ mumi.

7La sẽn kaoos bilf n kolg lɛɛr a tãabo, a Ananiyas pagã me kẽeme la yẽ ka bãng bũmb ninga sẽn da maana ye.

8A Pɩyɛɛr sok-a lame yaa: Togs maam yãmb sã n koosa y pʋʋgã a woto tɛka. La a leokame tɩ n-ye, tɩ yaa woto tɛka.

9Dẽ, a Pɩyɛɛr yeela yẽ yaa: Yɩɩ a wãn tɩ yãmb sed ne taab n na n mak Zu-soabã Sɩɩga? Gese, neb nins sẽn mum fo sɩdã bee rignoorẽ, la bãmb na n dɩka foom me n looge.

10La wakat kãng bala, yẽ lʋɩɩ tẽng a Pɩyɛɛr taoor n ki. La kom-bɩɩsã kẽeme n mik t'a Safɩra kiime. La b rɩk-a lame n tɩ mum n yegl a sɩdã.

11Rabeem kãseng yõka tẽedba fãa ne neb nins fãa sẽn wʋm bõn-kãensa.

12Tẽn-tʋmdba maana bãna la bõn-yɛɛsds wʋsg nebã sʋka. Tẽedba fãa tigma taab zĩig ning sẽn boond tɩ Salmo zãndã.

13La neb a taabã sʋk ned ba a yen da ka saagd n dat n naag-b ye. La nebã ra pẽgda tẽedba wʋsgo.

14Raop la pagb wʋsg sẽn da tẽed Zu-soaba tara paasg daar fãa.

15B ra tallda bãad-dãmb ne gãas wala pãnday n wat n gãnegd-b soaya zut tɩ daar ninga a Pɩyɛɛr sã n wa n loogdẽ, bɩ a maasma tõe n bui bãad-dãmb kẽere.

16La neb wʋsg-wʋsg yii tẽns sẽn yeg Zeruzalɛm n tall bãad-dãmb la neb zĩn-dẽgd sẽn namsd n wa. La bãmb fãa paama maagre.

17La maan-kʋʋdba kãsem ne neb nins fãa sẽn da be ne yẽnda wã, sẽn dat n togs tɩ Saduusẽ-dãmbã, yik n pida ne sũ-kiiri.

18Bãmb yõga tẽn-tʋmdbã n kẽes bi-bees roogẽ.

19La Zu-soabã malɛk waa ne yʋng n pak bi-bees roogã kʋɩleng n yiis tẽn-tʋmdbã n yeel-b yaa:

20Kẽng-y n tɩ yals-y wẽnd-doogã pʋg n togs nebã vɩɩm kãnga koɛɛga fãa.

21La bãmb sẽn wʋm woto, bãmb kẽe wẽnd-doogẽ wã yibeoog pĩnd n sɩng n zãmsd nebã. La maan-kʋʋdba kãsem ne neb nins sẽn da be ne yẽ wã waame n tigim kaorengã yɛl-bʋ-kaoodba la Israyɛl kãsem-dãmbã, La b tʋmame tɩ b tall tẽn-tʋmdbã sẽn be bi-bees roogẽ wã n wa.

22La gũudba sẽn ta bi-bees roogẽ wã, b ka yãnd tẽn-tʋmdbã be ye. La b lebgame n tɩ yeel yaa:

23Tõnd yãa bi-bees roogã sẽn pag sõama, tɩ gũudbã yas noyẽ wã n gũudẽ. La tõnd sẽn pake d ka yã ned doogã pʋgẽ ye.

24La bãmb sẽn wʋm gom-kãensã, wẽnd-doog gũudbã kãsem ne maan-kʋʋdba kãsem-dãmb dag n ka mi b sẽn na n tags bũmb ninga tẽn-tʋmdbã wɛɛngẽ ye, la b ra sokda b mens tɩ yel-kãnga na n yɩɩ a wãna.

25La ned n wa n yeel-b tɩ neb nins bãmb sẽn dag n kẽes bi-bees roogã bee wẽnd-doogẽ wã n zãmsd nebã.

26La wẽnd-doog gũudbã kãsem ne gũudba kẽngame n tɩ tall tẽn-tʋmdbã n wa n ka maan-b pãng ye. Tɩ bõe, gũudba ra yɛɛsdame tɩ nebã na n wa lob bãmb kuga.

27La b sẽn tall tẽn-tʋmdbã n leb n wa, b kɩtame tɩ b yals kaoreng yɛl-bʋ-kaoodbã taoore. La maan-kʋʋdba kãsem yeel-b lame yaa:

28Tõnd dag n yeela yãmb tɩ y ra le saag n zãms nebã ne yʋ-kãngã ye. La ade, yãmb pidsa Zeruzalɛm ne y zãmsgã. La y rat n dɩk raowã kũum yell n dogl tõnd zutu!

29A Pɩyɛɛr ne tẽn-tʋmdbã leokame yaa: Tõnd tog n saka Wẽnnaam n yɩɩd ninsaalbã.

30Tõnd yaab-rãmba Wẽnnaam vʋʋga a Zezi yãmb sẽn dag n ka a soab da-pɩkã zug tɩ b ki wã.

31Wẽnnaam zẽka a Zezi tɩ b be bãmb rɩtgo n ya rĩma la fãagda n na n kõ Israyɛl nebã yam tekre la yel-wẽna sugri.

32Tõnd yaa bõn-kãens kaset dãmba. La Sɩɩg-sõng Wẽnnaam sẽn kõ neb nins sẽn sak bãmbã me yaa kaset soaba.

33La kaoreng yɛl-bʋ-kaoodbã sẽn wʋm gom-kãense, b sũyã puugame tɩ b ra baood tẽn-tʋmdbã n dat n kʋ.

34La tõog karen-saamb a yen yʋʋr sẽn boond t'a Gamalyɛll n ya Fariisẽ ned n dag be b sʋka. La neba ra waoogda yẽnda la a yika kaoreng yɛl-bʋ-kaoodbã taoor n kõ noor tɩ yiis tẽn-tʋmdbã tɩ yɩ bilfu.

35La yẽ yeela nebã yaa: Israyɛl neba, gũus-y ne bũmb ningã yãmb sẽn dat n maan nin-bãmba wã.

36Tɩ bõe, a Tedaas yika wakat sẽn ka zãra n yetẽ tɩ yẽ yaa nin-kãsenga. La neb sẽn kolg kobs naas da tũuda yẽnda. La b kʋ-a lame, la neb nins fãa sẽn da tũud yẽ wã zoe n sãeegame, la b tũudma yɩɩ zaalem.

37La yẽ sẽn looge, Galile dao a Zudas me yika sõdbã wakat n kɩt tɩ neb wʋsg tũ yẽnda. La b kʋʋ yẽ me, la neb nins fãa sẽn da tũud yẽ wã sãeegame.

38Dẽ, moasã, mam yeta yãmb tɩ y bas nin-bãmba tɩ b loog la y ra le bao tɩ maan bãmb bũmb ye. Tɩ bõe, bãmb sẽn maanda, wala b tʋʋma sã yaa ninsaalb rẽnda, b na n sãama b toore.

39La b sã n yita Wẽnnaam nengẽ, yãmb kõn tõog n sãam-b ye. Gũus-y y mens n da wa n zab ne Wẽnnaam ye.

40Bãmb saka a Gamalyɛl goama. La b leb n boola tẽn-tʋmdbã n kɩt tɩ b pãb-b ne kalwaase n yeel-b tɩ b ra le saag n gom ne a Zezi yʋʋr ye. La b bas-ba.

41Tẽn-tʋmdbã yii kaoreng yɛl-bʋ-kaoodbã taoor ne sũ-noogo b sẽn ges tɩ bãmb zemsame tɩ paam namsg a Zezi yʋʋrã yĩnga.

42Bãmb dag n zãmsda nebã la b moond Kirist Zezi koe-noogã wẽnd-doogẽ wã la zagsã pʋs daar fãa n ka basdẽ ye.

← Chapter 4 Jump to: Chapter 6 →