Acts 9

Mossi Moore (KÃAB-PAALGÃ KOE-NOOGO)

← Chapter 8 Jump to: Chapter 10 →

1Baoosgo, a Soll sẽn dag n ket n namsd Zu-soaba karen-biis n dat kʋ-bã, a kẽnga maan-kʋʋdba kãsem nengẽ

2n tɩ kos-a t'a gʋls sɛb n tʋm karen-dot nins sẽn be Damasã tɩ yẽ sã tɩ n yã neb beene sẽn tũud Zu-soaba sore, sã n ya raop wala pagba, bɩ yẽ yõg-b n tall n wa Zeruzalɛm.

3La yẽ sẽn wa n be sorẽ n kolg Damase, tao-tao bala, vẽenem n yi arzãn n yãg n gũbg yẽnda.

4La a Soll lʋɩɩ tẽnga. La a wʋma koɛɛg sẽn yet yẽnda yaa: Solle, Solle, yaa bõe tɩ fo namsd maam?

5A Soll leokame tɩ Zu-soaba, yãmb yaa ãnna: La Zu-soaba yeelame yaa: Mam yaa a Zezi fo sẽn namsd a soabã. Na n yɩɩ toog ne foom, fo sẽn kɩɩsda yĩnga. La yẽ ra yɛɛsame n digd n sok Zu-soaba tɩ bãmb datame tɩ yẽ maan bõe. Dẽ Zu-soaba yeela yẽnda

6Yik n kẽ tẽngã pʋgẽ, la beene b na n yeela foom bũmb ninga f sẽn tog n maane.

7La raop nins sẽn da tũud a Sollã yɛɛsame n yas n ka tõe n gom ye. B dag n wʋmda koɛɛgã la b ka ne ned ye.

8A Soll yikame, la baa yẽ nina sẽn pukã, a ra ka tõe n yã baa fʋɩ. B gãda a nug n tae-a n kẽng Damase.

9Yẽ maana rasem a tãab n ka tõe n yã ye. La a ka rɩ wala a yũ bũmb ye.

10Karen-biig a ye n dag n be Damas t'a yʋʋr boond t'a Ananiyas. Zu-soaba puka b meng ne yẽnda vẽnegr pʋgẽ n yeel-a tɩ Ananiyas! T'a leok yaa: Ad mam Zu-soaba.

11Zu-soaba yeela a Ananiyas yaa: Yik n kẽng sor ning sẽn boond tɩ tɩrgã n ta a Zudas zakẽ n bao ned yen sẽn yit Tars t'a yʋʋr boond t'a Solle.

12Tɩ bõe yẽ pʋʋsdame n yã vẽnegr pʋgẽ tɩ ned a yen yʋʋr sẽn boond t'a Ananiyas waa n tik yẽ ne a a nus tɩ yẽnda leb n paam a nini.

13A Ananiyas leokame n yeel yaa: Zu-soaba, mam wʋma neb wʋsg sẽn gomd rao-kãnga sẽn maan yãmb nebã sẽn be Zeruzalɛma wẽng wʋsga yelle.

14La maan-kʋʋdba kãsem-dãmb kõo yẽ noor t'a wa ka n yõg neb nins fãa sẽn pʋʋsd ne yãmb yʋʋrã.

15La Zu-soab yeela a Ananiyas yaa: Kẽnge. Tɩ bõe, mam yãka rao-kãnga n na n kɩt t'a tall mam yʋʋrã n wilg bu-zẽmse la rĩm-dãmba la Israyɛl nebã.

16La mam meng n na n wilg yẽnda namsg nins fãa yẽ sẽn tog n nams yʋʋrã yĩngã.

17La a Ananiyas kẽngame. La yẽ taa n kẽe roogẽ wã n tik a Soll ne a nus n yeel-a yaa: Ba-biig a Solle, Zu-soab a Zezi sẽn puk b meng ne yãmb y sẽn wa n be sorã zug n watẽ wã tʋma maan tɩ m wa tɩ y tõe n leb n paam y nini, la y pid ne Sɩɩg-sõngo.

18La tao-tao bala, bũmb sẽn wẽnd wa nod-pags yi a Soll nini wã n lʋɩ. La yẽ leb n paama a nini. La yẽ yikame n deeg koom lisgu.

19Dẽ, a Soll deega rɩɩb n dɩ la a pãnga leb n waame.

20La a Soll paa ne karen-biisã sẽn be Damasã rasem bilfu. La tao-tao bala, yẽ sɩngame n moond koɛɛga karen-dot pʋs n yẽte t'a Zezi yaa Wẽnnaam Bi-ribla.

21Neb nins fãa sẽn wʋm yẽnda wã yɛɛsame n sokdẽ tɩ rao-kãnga n dag n namsd neb nins sẽn be Zeruzalɛm n pʋʋsd ne a Zezi yʋʋra wɛ! Tɩ la yẽ ka wa ka n na n yõg neb nins sẽn pʋʋsd ne a Zezi yʋʋrã n tall-b n kẽng n tɩ ko maan-kʋʋdba kãsem-dãmba wɛ?

22La a Soll koe-moonegã pãng ra paasdame daar fãa la yẽ ra tõogda Zuif-rãmbã sẽn be Damasã n wilgd-b t'a Zezi sɩd yaa Kiristã.

23La sẽn kaoos bilfu, Zuif-rãmba naaga taab n yãk yam n dat n kʋ a Solle.

24La a Soll bãnga b yam-wẽngã. Bãmb dag n gũusda tẽnga noyã wĩndg la yʋngo, sẽn na n yɩl n kɩt tɩ b kʋ a Solle.

25Dẽ, karen-biisa kẽesa a Soll peoogẽ ne yʋng n gãndg n sik yẽ lalgã poore.

26A Soll sẽn ta Zeruzalɛm, yẽ makame n dat n lagem ne karen-biisã, la bãmb fãa ra zoeta a Solle. Tɩ bõe, b ra ka tẽed t'a Soll sɩd lebga a Zezi karen-biig ye.

27Dẽ, a Barnabas peega a Soll n tall-a n kẽng tʋmtʋmdba nengẽ, n togs bãmb a Soll sẽn yã Zu-soaba sorã zugã, la Zu-soaba sẽn gom ne-a to-to wã. La yẽ togsa bãmb a Soll sẽn moon koɛɛgã ne pɛl-kɛgeng Damas tẽngã pʋgẽ ne a Zezi yʋʋrã.

28La a Soll dag n tũuda bãmb n gõod la a wat Zeruzalɛm la a moond koɛɛga ne Zu-soaba yʋʋr ne raoodo.

29A Soll ra gomda ne Zuif-rãmb nins sẽn gomd Gɛrk goama la a wẽed nokoɛɛm ne-ba. La b ra baood n na n kɩtame tɩ b kʋ a Solle.

30La ba-biisã sẽn bãng bõn-kãnga, b talla a Soll n ta Sezaare n kɩt t'a kẽng Tars:

31A Zezi tẽedba sẽn be zuude la Galile ne Samari wã fãa dag n bee laafɩ, b pãnga ra paasdame la b ra sakda Zu-soabã la Sɩɩg-sõng ra sõngd-b lame tɩ b lebgd wʋsgo.

32A Pɩyɛɛr sẽn da saagd zĩiga fãa n get nin-tũusdsã, a kẽnga a Zezi tẽedba sẽn da be lida wã nengẽ.

33La yẽnda yaa rao a yen beene t'a yʋʋr boond t'a Ene n ya ki-bogre n gãe gãag zug hal yʋʋm a nii.

34A Pɩyɛɛr yeel-a lame yaa: Ene, a Zezi maagda foo, yik n maneg f gãagã f toore. La tao-tao bala a Ene yikame

35Lida ne Saarõ tẽnga neba fãa yãa a Ene la b saka Zu-soabã.

36Tẽed-poak a ye n da be Zope t'a yʋʋr boond t'a Tabita sẽn dat n togs tɩ Dorkas ne Gɛrk goama. A yʋʋra võor yaa yãka: Pʋg-kãng ra maanda tʋʋm-sõamyã wʋsgo, la a sõngd naong rãmba.

37Ra-kãense, a Dorkas lʋɩɩ bãag n ki. La b sẽn so yẽ koom n sɛ, b rɩk-a lame n gãneg yĩngr doog pʋgẽ.

38La Lida dag n ka zãr ne Zope ye. Dẽ, karen-biisã sẽn wʋm t'a Pɩyɛɛr bee Lida, b tʋma raop a yiib ye nengẽ tɩ b tɩ bõos-a t'a wa bãmb nengẽ n da kaoos ye.

39La a Pɩyɛɛr yikame n tũ-b n looge. La yẽnda sẽn ta, b talla yẽ n dʋ yĩngr dooga pʋgẽ. La pʋgkõapa fãa kolga a Pɩyɛɛr n yãbd la b wilgd yẽndã fu-yerd ninsi la fut nins a Dorkas sẽn dag n sẽ a sẽn wa n ket n vɩ wã.

40A Pɩyɛɛr kɩtame tɩ neba fãa yi. La yẽ yĩgimdame n pʋʋse. Dẽ a wẽnemdame n ges kũuma n yeel-a tɩ Tabita yiki. La a puka a nini. La a sẽn yãa a Pɩyɛɛr, a yikame n zĩndi.

41La a Pɩyɛɛr gãda a nug n sõng-a t'a yik yĩngri. A Pɩyɛɛr boola nin-sõamyã ne pʋgkõapã n wilg-b t'a Dorkas vʋʋgame.

42Zope tẽnga fãa wʋma bõn-kãnga, la neb wʋsg suk tẽe Zu-soabã.

43A Pɩyɛɛr paa Zope n kaoos bilfu, yẽ siga zapa a sɩmo yiri.

← Chapter 8 Jump to: Chapter 10 →