Acts 24

Mossi Moore (KÃAB-PAALGÃ KOE-NOOGO)

← Chapter 23 Jump to: Chapter 25 →

1La rasem a nu sẽn looge, maan-kʋʋd kãsem a Ananiyas waa Sezaare ne kãsem-dãmb kẽere la gom-minim soab a yen yʋʋr sẽn boond t'a Tertull. Bãmb togsa b sẽn bʋʋd ne a Pollã yell Gʋvɛrneer a Feligs taoore.

2B boola a Poll t'a wa, la a Tertull sɩngame n dõd yẽnda n yeele:

3Feligs sõngo, yaa yãmb maasem yĩng tɩ tõnd paamd laafɩ hakɩɩka, la y maana yam tʋʋm n maneg soolem kãngã, tõnd deegda bãmb bũmb fãa pʋgẽ, la zĩiga fãa n pʋʋsd d zaame beoogo.

4La mam ka rat n dɩk yãmb weerã n kaoos ye. Yaa woto yĩng tɩ m kot-y tɩ y maan sũ-mare n kelg tõnd wakat bilfu.

5Tõnd mikame tɩ rao-kãnga yaa wẽnem soaba n wat ne rãmbg Zuif-rãmba fãa sẽn be dũniyã zugã sʋka la a yaa Nazarɛt dãmba kaoreng taoor soaba.

6La a makame meng n dat n paoog wẽnd-doogã. Dẽ, tõnd yõk-a lame. Tõnd dag n dat n kao a bʋʋd wa sẽn zems tõnd tõogã.

7La sodaas tusr naab a Liziyaas waa n deeg-a-la ne pãn-kãseng tõnd nusẽ.

8La a yeela a Poll rõatbã tɩ b wa yãmb nengẽ. Yãmb meng tõe n sok-a lame n bãng bũmb nins fãa yĩng sẽn kɩt tɩ d bʋʋd ne-a wã.

9Zuif-rãmba paasa gomda pãng n yet tɩ yaa sɩda.

10Dẽ, Gʋvɛrneerã zẽka a nug n yeel a Poll t'a gome. Dẽ, a Poll dɩka koɛɛg n yeel yaa: Mam miime tɩ yãmb yaa soolem-kãngã bʋ-kaood hal yʋʋm wʋsgo. Dẽ, yaa ne kɩs-sɩd la mam na n gom yãmb taoor n yiis m meng yellẽ wã.

11Yãmb meng tõe n baoome n bãnge. Sẽn ka yɩɩd rasem piig la a yiibu, mam kẽnga Zeruzalɛm n na n tɩ pʋʋs Wẽnnaam.

12B ka yã maam tɩ m wẽed nokoeemd ne ned ba a yen wẽnd-doogã pʋga, wala m rãmbd neb kʋʋng karen-dot pʋse, bɩ tẽng pʋg zĩig ba a yen ye.

13La bãmb ka tõe n wilg yãmb tɩ bũmb ninga b sẽn dõt maam moasã wã yaa sɩd ye.

14Baoosgo, mam togsda bõn-kãnga y taoore. Mam pʋʋsda m yaab-rãmbã Wẽnnaam n tũud so-paalg ninga bãmb sẽn boond tɩ yaa kaoreng a to wã. La mam tẽeda bũmb nins fãa sẽn gʋls tõogã sɛb pʋse, la Wẽnnaam no-rɛɛsdbã sɛbã pʋsã.

15Mam tara tẽeb pidsg gũudem kãnga, ne Wẽnnaam wa mam dõatbã mens sẽn tarã, n tẽed tɩ nin-sõama la nin-wẽns na n vʋʋgame n bas kũum.

16Yaa woto yĩnga, tɩ mam me maood n dat n paam sũur kaset sẽn ya sõama Wẽnnaam la ninsaalb taoore daar fãa.

17Mam yii Zeruzalɛm n kaoos yʋʋm wʋsgo, la m lebg n waa be n na n kõ m neba sõngre, la m maan maoong n kõ Wẽnnaam.

18La b yaool yãa maam wẽnd-doogẽ wã tɩ m yɩlgd m menga la neb ka tigme, la rãmbg ka zĩnd ye.

19La Zuif-rãmb kẽer sẽn yi Azi soolem dag n bee be la b sã n da tarẽ yell ne maam yaa bãmb n dag tog n yals yãmb taoor n bʋ ne maam.

20Wall, nin-bãmba sẽn be ka wã togs b sã n yãa mam sẽn maan wẽnga, mam sẽn yals kaoreng yɛl-bʋ-kaoodbã taoorã.

21Sã n ka bũmb a yembrã mam sẽn maana, m sẽn yik n yals b sʋk n zẽk m koɛɛg n yeel tɩ: "Yaa mam sẽn tẽed tɩ kũum vʋʋgr beeme wã yĩng n kɩt tɩ yãmb bʋʋd ne maam dũnna."

22A Feligs sẽn mi Kirist kaorengã yell neerã, a visga bʋʋdã daar n yeel nebã tɩ b kuil tɩ sodaas tusr naab a Liziyaas sã n wa n wa, a na yaool n ges b yellã.

23La yẽ yeela sodaas koabg naabã t'a gũ a Poll, la a kõ-a lohorem bilfu, la a ra gɩdg a Poll zo-rãmbã sẽn dat n sõng-a wã ye.

24Rasem bilf sẽn paase, a Feligs ne a pag a Dursill sẽn ya Zuif poakã waame. La a tʋmame tɩ b bool a Poll t'a wa, la yẽ kelga a Poll sẽn togs tẽeb ne Kirist Zezi wã sẽn ya bũmb ninga.

25La a Poll sẽn gom tɩrlma vɩɩm la tõog-m-menga la bʋ-kaoor sẽn watã yellã, rabeem yõka a Feligs t'a yeel a Poll t'a loog moasã tɩ yẽ sã n wa paam weere a na leb n bool-a.

26A ra tẽedame me t'a Poll na n kõ-a-la ligdi, yaa rẽ yĩng n kɩt t'a bool a Poll naoor wʋsg n sõs ne-a.

27La yʋʋm a yiib sẽn looge, a Porkius Festus reega a Feligs zĩig n ya Gʋvɛrneer. La a Feligs sẽn dat n maan sẽn noom Zuif-rãmba, a ka kõ a Poll lohorem ye.

← Chapter 23 Jump to: Chapter 25 →