Acts 15

Mossi Moore (KÃAB-PAALGÃ KOE-NOOGO)

← Chapter 14 Jump to: Chapter 16 →

1Neb kẽer yii Zude n wa Ãntiyos n sɩng n zãmsd ba-biisã n yetẽ tɩ b sã n ka kẽ bãong wa sẽn zems a Moyiis tõogã, b ka tõe n paam fãagr ye.

2A Poll ne a Barnabas kɩɩs-b lame n wẽ nokoeem-kãseng ne-b bõn-kãng wɛɛngẽ. Rẽ, ba-biisã yãka yam t'a Poll ne a Barnabas ne bãmb sʋkã neb kẽer na n kẽnga tẽn-tʋmdbã ne kãsem-dãmba nengẽ Zeruzalɛm n tɩ ges yel-kãng yelle.

3Dẽ, a Zezi tẽedbã sẽn be Ãntiyosã yãag-b lame. A Poll dãmb pɩʋʋga Fenisi la Samari soolem la b togsda sẽn yɩ to-to tɩ bu-zẽmsã me sak Wẽnnaamã. La bõn-kãng kõo ba-biisã fãa sũ-no-kãsenga.

4La a Poll dãmb sẽn ta Zeruzalɛm, a Zezi tẽedba ne tẽn-tʋmdbã ne kãsem-dãmbã reeg-b lame. La a Poll dãmb togs-b la bũmb nins fãa Wẽnnaam sẽn tall bãmb n maana.

5La Fariisẽ-dãmba neb kẽer sẽn ya tẽedbã yikame n yeel tɩ yaa tɩlɛ tɩ b kẽes bu-zẽmsã bãongo la b kɩt tɩ b sak a Moyiis tõogã.

6Tẽn-tʋmdbã ne kãsem-dãmba tigma taab n na n ges yel-kãng yelle.

7Bãmb sẽn wẽ nokoɛɛma wʋsg n kaoose, a Pɩyɛɛr yikame n yeel yaa: M ba-biisi, hal pipi wakat bala, Wẽnnaam yãka maam yãmb sʋk tɩ m moon koe-noogã bu-zẽmsa me tɩ b wʋme la b tẽ.

8La Wẽnnaam sẽn mi ninsaalbã fãa sũyã, b kõ-b la Sɩɩg-sõng wa b sẽn dag n kõ tõndã, tɩ yɩ kaset tɩ b sak n deeg-b lame.

9Wẽnnaam ka welg tõnd toor ne bu-zẽmsã ye, bala b sẽn tẽ wã yĩnga, Wẽnnaam yɩlga b sũyã.

10Dẽ moasã, yaa bõe tɩ y baood Wẽnnaam noor n zɩlgd karen-biisã zɩɩb tõnd yaab-rãmba wala tõnd mens sẽn ka tõog n tʋke?

11La tõnd tẽedame tɩ yaa Zu-soab a Zezi barkã yĩng n kɩt tɩ tõnd paam fãagr wala bãmb me sẽn paam to-to wã.

12Nebã sẽn tigma fãa sĩndame n kelg a Barnabas na a Poll sẽn togsd Wẽnnaam sẽn tall bãmb n maan bõn-bãna la bõn-yɛɛsdsã fãa bu-zẽmsã sʋkã.

13Bãmb sẽn gom n sɛ, a Zak gomame n yeel yaa:

14M ba-biisi, kelg-y maam. A Sɩmo wilga yãmb Wẽnnaam sẽn geelg bu-zẽmsã to-to n sɩng n yãk neb be n maan b rẽndã.

15La bõn-kãng zemsa ne Wẽnnaam no-rɛɛsdbã sẽn goma. B gʋlsame n yeel yaa:

16"Zu-soabã yetame yaa: Rẽ poore, mam na n lebgame n wa n me a Daviid doogã sẽn dag n lʋɩ wã. Mam na n leb n manega yẽ raboogã n me, la m na yik-a lame n yalse,

17tɩ neb a taabã sẽn ketã bao Zu-soabã. La buud nins fãa sẽn pʋʋsd ne mam yʋʋrã me na n baoo maam.

18Ade, yaa Zu-soabã sẽn wilg bõn-kãens hal yʋʋm zãrã n yeel a woto."

19Yaa woto yĩng n kɩt tɩ mam togsdẽ t'a zemsame tɩ d da bao yell n kõ bu-zẽmsã sẽn sakd Wẽnnaamã ye.

20La bɩ d gʋls-b n yeel-b tɩ b lak b mens ne wẽn-naandsã maand nemdo la wɩɩbdo, la b ra wãb rũng sẽn sãrg nemdo, la b ra rɩ zɩɩm ye.

21Tɩ bõe, hal kʋdem wẽndẽ tɩ ta moasã, b moonda a Moyiis tõogã tẽnsã pʋse, la b karemd-a karen-dotã pʋs vʋʋsg daar fãa.

22Dẽ, tẽn-tʋmdbã ne kãsem-dãmbã la tẽedba fãa yãka yam n na n tũus neb kẽer bãmb sʋkã n tʋm-b tɩ b tũ a Poll ne Barnabas n kẽng Ãntiyos. Bãmb yãka a Zud b sẽn boond t'a Barsabas la a Sɩlaas. Bãmb b yiibã fãa yaa neb ba-biisã sẽn waoogda.

23B kɩs b la sebrã, la b sẽn gʋlsã yeelame yaa: Tẽn-tʋmdbã ne kãsem-dãmbã, la ba-biisã pʋʋsda ba-biis nins sẽn be bu-zẽmsã sʋk n be Ãntiyos la Siri ne Silisi soolma.

24Tõnd wʋmame tɩ neb kẽer n yi tõnd nengẽ n wa n dãmbd yãmb la b yuusd yãmb yam ne b goama. La ka tõnd n kõ-b noor ye.

25Yaa woto yĩnga, tɩ tõnd tigim taab n yãk yam a yembr n yãk neb n tʋm-b tɩ b na n yãag d zo-nongds a Poll ne a Barnabas n wa yãmb nengẽ.

26A Poll dãmb ra gẽnega b yõe tõnd Zu-soab a Zezi Kirist tʋʋmdã yĩnga.

27Rẽnda yĩng la d tʋm a Zud ne a Sɩlaas yãmb nengẽ. La b mens na n togs-y la bõn-kãense.

28Tɩ bõe, Sɩɩg-sõng ne tõnd me gesame tɩ yaa neere tɩ d da zɩlg-y zɩɩb sã n ka bũmb nins sẽn ya tɩlɛ wã ye. La yaa tɩ yãmb ka tog n wãb nemd

29b sẽn maan maoong n kõ wẽn-naands ye, la y ka tog n dɩ rũng sẽn sãrg ye, la y da rɩ zɩɩm ye, la y ra maan wɩɩbd ye. Yãmb sã n lak y mens ne bõn-kãense, y maana sẽn ya neere. Wẽnd na sõng yãmba.

30Dẽ, b basa b sẽn tʋm-b rãmbã tɩ b loog n kẽng Ãntiyos. La b tigma tẽedbã fãa beene n kɩs-b sebrã.

31B sẽn kɩt tɩ b karem sebrã n sɛ, b fãa sũyã yɩɩ noogo, b sẽn paas bãmb raoodã yĩnga.

32A Zud ne a Sɩlaas mens sẽn da ya Wẽnnaam no-rɛɛsdbã, b goma ne ba-biisã n kaoose, n paas-b raoodo la pãnga.

33La b sẽn pa Ãntiyos n kaoos bilfu, ba-biisã pʋʋs-b lame tɩ wẽnd na kuils-b laafɩ, n bas-b tɩ b lebg n leb neb nins sẽn tʋm-b bãmbã nengẽ.

34La a Sɩlaas yãka yam n na n pa Ãntiyos.

35La baoosgo, a Poll ne a Barnabas paa Ãntiyos. La bãmb ne neb a taab wʋsg ra zãmsda nebã la b moond-b koe-noogã sẽn ya Zu-soabã goama.

36Rasem bilf sẽn paase, a Poll yeela a Barnabas t'a wa tɩ b leb n kẽng tẽns nins fãa bãmb sẽn dag n moon Zu-soabã koɛɛgã n tɩ ges ba-biisã n bãng b kibar sẽn ya to-to.

37A Barnabas rag n dat n peega a Zã b sẽn boond t'a Mark t'a tũ-ba.

38La a Poll tagsame tɩ yaa neer tɩ b ra peeg-a Zã-Mark ye. Tɩ bala, a rag n lebg n basa bãmb Paamfili soolem n ka le yãag-b n maan tʋʋmdã ye.

39La b kɩɩsa taab wʋsg yel-kãng wɛɛngẽ hal n welg taaba. La a Barnabas peega a Mark n kẽ koom-koglg n na n kẽng Sɩpr.

40La a Poll yãka a Sɩlaas, la ba-biisã pʋʋsame tɩ Zu-soabã ning-b barka, la b loogame.

41A Poll pɩʋʋga Siri ne Silisi soolem n paas a Zezi tẽedbã pãnga.

← Chapter 14 Jump to: Chapter 16 →