Acts 22

Mossi Moore (KÃAB-PAALGÃ KOE-NOOGO)

← Chapter 21 Jump to: Chapter 23 →

1A Poll yeela nebã yaa: M ba-biisi la m ba-rãmba, kelg-y bũmb ning mam sẽn tar moasã n na n togs yãmb n yiis m meng yellẽ wã.

2Bãmb sẽn wʋm t'a Poll gomd ne bãmb ne Hebre-rãmba goama, b yalsa sɩddd n yɩɩd pĩnda. Dẽ, a Poll yeel-b lame.

3Mam yaa Zuif sẽn dog Tars sẽn be Silisi soolem. La b wuba maam Zeruzalɛm ka la mam zĩnda a Gamalyɛl taoor tɩ b zãms maam tɩ m bãng tõnd yaab-rãmbã tõod neere. Mam me rag n wɩngda ne Wẽnnaam tʋʋmdã wala yãmb fãa sẽn ya to-to rũnna wã.

4Mam dag n namsa neb nins sẽn dag n tũud so-kãnga wã n kʋ-ba, la m yõg raop la pagb n sẽb n kẽes-b bi-bees roogo.

5Maan-kʋʋdbã kãsem ne kãsem-dãmbã fãa sullã yaa mam kaset dãmba. Mam tol n deega sɛb bãmb nengẽ, ba-biis nins sẽn be Damasã yĩnga, la m kẽnga be n na n tɩ sẽb tẽedba sẽn be be wã n tall-b n wa Zeruzalɛm n kɩt tɩ b sɩbg-ba.

6La mam sẽn waa n be sorẽ n kolgd Damase, sẽn zems wĩnto-sʋk sasa, tao-tao bala, vẽenem kãseng n yi arzãn n yãg n gũbg maam.

7Mam lʋɩɩ tẽnga, la m wʋma koɛɛg sẽn dag n yet maam yaa: "Solle! Solle! Yaa bõe tɩ fo namsd maam?"

8Mam sokame tɩ Zu-soaba yãmb yaa ãnna soab tɩ mam namsd-yã? La koɛɛgã yeela maam yaa: "Mam yaa a Zezi sẽn yit Nazarɛt, soab ning fo sẽn namsdã."

9Neb nins sẽn da be ne maama yãa vẽenemã, la b ka wʋm ned ninga sẽn da gomd-a ne maama koɛɛgã ye.

10Dẽ, mam sokame yaa: "Zu-soaba, bõe la mam tog n maane?" La Zu-soabã yeela maam yaa: "Yik n kẽng Damas la beene, b na n togsa foom bũmb nins fãa Wẽnnaam sẽn yet foo tɩ f maana."

11La vẽenemã sẽn yãg tɩ mam lebg zoangã yĩnga, mam tũud-n-taasã gãda mam nug n tae maam n ta Damase.

12Mik tɩ rao a yen n dag n be be t'a yʋʋr boondẽ t'a Ananiyas n sakd tõodã, la Zuif-rãmba fãa sẽn da be be wã ra kõta yẽ kaset sõngo.

13Yẽ waa mam nengẽ n yeel maam yaa: "M ba-biig a Solle, paam-y nin yɛsa." La wakat kãng bala, mam le paama m nini, la m yãnd-a lame.

14A Ananiyas yeelame yaa: "Tõnd yaab-rãmba Wẽnnaam pĩnd n yãka yãmb tɩ y bãng b tʋlsem, tɩ y yã tɩrlem soabã la y wʋm bãmb noor goama.

15Bala, yãmb na n yɩɩ bãmb kaset soaba n togs bũmb nins yãmb sẽn yã la y wʋmã, neba fãa taoore.

16La moasã, yaa bõe tɩ y kaoosdẽ? Yik-y n pʋʋs-y ne Zu-soabã yʋʋre, n deeg koom lisgu, n paam y yel-wẽna pekre."

17La mam lebg n waa Zeruzalɛm, la mam sẽn be wẽnd-doogã pʋg n pʋʋsdẽ, mam paama vẽnegre.

18La m yãnda Zu-soabã, la b yeela maam tɩ m nang-pãng n yi Zeruzalɛm tao-tao, tɩ bala, tẽngã nebã ka na n deeg mam sẽn na n kɩs Zu-soaba kasetã ye.

19La mam yeelame: "Zu-soaba, bãmb mens miime tɩ mam da kẽnda karen-dot pʋsẽ, n kɩtdẽ tɩ b kẽesd neb nins sẽn tẽed yãmbã bi-bees roogo, la m kɩtdẽ tɩ b pãbd-ba.

20La b sẽn na n daag y kaset kɩt a Etɛn zɩɩmã wakate, mam meng ra bee be, mam da yetame tɩ b sẽn maanda yaa sõama, maam n da gũud neb nins sẽn kʋʋd a Etɛnna futu."

21Dẽ, Zu-soabã yeela maam yaa: "Kẽnge, bala, m na n tʋma foom zĩ-zãrgẽ, bu-zẽmsã nengẽ."

22Neba kelga a Poll hal tɩ ta wakat ninga yẽ sẽn gom gom-kãngã, la wakat kãnga, b sɩngame n zẽk b koees n yetẽ: menes-y nin-kãnga duniyã zugu! Kʋ-y-yã-a, yẽ ka tog n vɩɩmd ye.

23Bãmb dag n kelemdame, n lobd b fut la b lobd tom yĩngri.

24Sodaas tusr naabã yeelame tɩ b kẽes a Poll gãosgẽ wã n pãb-a ne kalwaas n sok-a n bãng sẽn ya bũmb ninga yĩng tɩ Zuif-rãmba kelemd a woto n dõt yẽnda wã.

25La b sẽn sẽb a Poll ne wĩy n na n pãbe, yẽ soka sodaas koabg naab ning sẽn da be be wã tɩ rẽ yĩnga, tõogã kõta bãmb noor tɩ b pãb Rom ned ne kalwaas t'a bʋʋd meng nan ka kao?

26Gom-kãensa yĩnga, sodaas koabg naaba kẽng n tɩ togsa sodaas tusr naabã bõn-kãng n yeel yaa: Yãmb na n maana a wãna? Rao-kãngã, yaa Rom neda.

27Dẽ, sodaas tusr naabã wa n soka a Poll yaa: Togs maam, fo yaa Rom neda? T'a leok tɩ n-ye.

28Dẽ, sodaas tusr naabã le yeelame yaa: Ad mam yaoo ligd wʋsgo, n paam lebg Rom neda. La a Poll yeelame yaa: La mam yẽ roga ne-a.

29Tao-tao bala, neb nins sẽn dag n tog n pãb a Poll la b sok-a wã loogame n bas-a. La sodaas tusr naabã sẽn bãng t'a Poll yaa Rom nedã, la yẽ sẽn da kɩt tɩ b sẽb-a wã yĩnga, rabeem yõk-a lame.

30La vẽkembeoogo, sodaas tusr naabã sẽn dat n bãng bũmb ninga Zuif-rãmba sẽn dõt a Pollã tiki-takɩ, yẽ kɩtame tɩ b lodg a Poll sẽbrã n bas-a. La a yeel maan-kʋʋdbã kãsem-dãmb ne kaoreng yɛl-bʋ-kaoodbã fãa tɩ b tigim taaba. Dẽ, a kɩtame tɩ b talla a Poll n wa n yalsg-a bãmb sʋka.

← Chapter 21 Jump to: Chapter 23 →