Acts 26

Mossi Moore (KÃAB-PAALGÃ KOE-NOOGO)

← Chapter 25 Jump to: Chapter 27 →

1A Agirpa yeela a Poll tɩ b kõt-a-la noor t'a gom n yiis a meng yellẽ wã. Dẽ, a Poll tẽega a nug n yeel yaa:

2Rĩm a Agirpa, mam sũur yaa noogo m sẽn paam dũnna n na n gom yãmb taoor n togs bũmb nins fãa Zuif-rãmba sẽn dõt maama wɛɛngẽ wã.

3Tɩ bõe, yãmb mii Zuif-rãmba minindã ne b nokoɛɛma zãnga. Rẽ wã, mam kot-y lame tɩ y kelg maam ne sũ-mare.

4Zuif-rãmba fãa mii mam vɩɩmã sẽn yɩ bũmb ninga hal mam sẽn ya bi-bilf wakate, b mii mam sẽn zĩnd m nebã sʋka la Zeruzalɛm hal sɩngrẽ wã sẽn yɩ to-to.

5Bãmb mii maam hal daar zãra, b sã n dat n togs sɩda. Mam yaa Fariisẽ neb nins sẽn sakd tõnd wẽn-tũudma n yɩɩd neb a taaba ned a yembre.

6La moasã, b bʋʋda ne maam, mam sẽn tẽed kãabg ninga Wẽnnaam sẽn da kãab tõnd yaab-rãmbã yĩnga.

7La tõnd buud piig la a yiibã me pʋʋsda Wẽnnaam wĩntoog la yʋng n ka basdẽ ye, n gũud kãab-kãng pidsgu. Rĩm a Agirpa, yaa tẽeb pidsg gũudem kãng yĩng n kɩt tɩ Zuif-rãmbã rõd maam.

8Bõe yĩng tɩ yãmb Zuif-rãmbã tagsdẽ tɩ yaa toog ne Wẽnnaam tɩ b vʋʋg kũum?

9Mam meng da tagsame tɩ m tog n zaba ne m pãng tɛka n kɩɩs Nazarɛt dao a Zezi yʋʋrã.

10La mam maana bõn-kãng Zeruzalɛm. La mam sẽn paama noor maan-kʋʋdbã kãsem-dãmb nengẽ, mam menga kẽesa Wẽnnaam nin-tũusds wʋsg bi-bees roogo. La b sã n da rat n kʋ-ba, mam ningda m nugu.

11Wakat kẽere, mam kɩtedame tɩ b sɩbg-b karen-dot pʋse, n da rat n modg-b tɩ b kɩɩs b tẽebã. Mam sũurã pʋʋga wʋsg ne bãmb hal tɩ m kẽng tẽn-zẽms pʋs n tɩ nams-ba.

12Yaa woto yĩnga, tɩ maan-kʋʋdbã kãsem-dãmb kõ maam noor n tʋm maam tɩ m kẽng Damas.

13Rĩm a Agirpa, mam sẽn be sorẽ, wĩnto-sʋk sasa, mam yãa vẽenem sẽn yi arzãn n yãgd n yɩɩd wĩntoog vẽenem, n wa n bui maam ne m tũud-n-taasã.

14Tõnd fãa lʋɩɩ tẽnga, la mam wʋma koɛɛg sẽn da yet maam ne Hebre-rãmbã goam yaa: "Solle, Solle, yaa bõe tɩ fo namsd maam? Yaa toog ne foom, fo sẽn zãgsda yĩnga."

15Mam sokame tɩ Zu-soaba yãmb yaa ãnna? La Zu-soabã leokame yaa: "Mam yaa a Zezi, fo sẽn namsd a soabã.

16Yik n yals yĩngri. Mam vẽnega m meng ne foom n na n kɩt tɩ f yɩ mam tʋmtʋmda, la m kaset soab n togs neb a taabã bũmb nins fo sẽn yã rũnna wã, la bũmb nins mam sẽn na n wilg fooma.

17Mam yãka foo Zuif-rãmbã ne bu-zẽmsã sʋka, la m tʋmda foom b nengẽ,

18tɩ f puk b nina tɩ b wẽnemd n bas likã n wa vẽenemẽ wã la b bas Sʋtãana n sak Wẽnnaam n paam b yel-wẽna sugri, la pʋɩɩr ne neb nins sẽn tẽ maam n lebg Wẽnnaam nebã."

19Woto wã yĩnga, Rĩm a Agirpa, mam ka kɩɩs vẽnegr ninga sẽn yi arzãna ye.

20La m deng n moona koɛɛgã Damas nebã nanda la m yaool n moon-a Zeruzalɛm ne Zude soolma fãa pʋga, la bu-zẽmsã n yeel-b tɩ b tek yam n kos sugr n sak Wẽnnaam n maan tʋʋm sẽn wilgd tɩ b sɩd teka yam.

21Yaa bõn-kãnga yĩng la Zuif-rãmbã sẽn yõk maam wẽnd-doogã pʋg n na n kɩt tɩ b kʋ wã.

22La Wẽnnaam gũudmã yĩnga, mam ket n vɩɩme hal tɩ ta rũnna, n kɩt kaset nin-talse la nanams taoore. La mam ka togsd bũmb a to tɩ sã n ka Wẽnnaam no-rɛɛsdbã ne a Moyiis sẽn da wilg tɩ na n waame wã bal ye.

23B ra yeelame tɩ Kirist na n namsame la b na n yɩɩ pipi soab sẽn vʋʋg n bas kũum, la b na n waa ne fãagre vẽenem tõnd buudã ne bu-zẽmsã yĩnga.

24La a Poll sẽn gom a woto n na n fãag a mengã, a Festus zẽka a koɛɛg n yeel-a yaa: Polle! Fo yaa gãeenga. Fo bãngrã sẽn ya wʋsgã kɩtame tɩ f lebg gãeenga.

25A Poll yeelame: Festus sõngo, mam ka gãeeng ye. Mam sẽn gomda yaa sɩda la mi-m-neng goama.

26Rĩm a Agirpa mii bõn-kãense, dẽ mam tõe n goma ne pɛl-kɛgeng bãmb taoore, bala mam mii vẽeneg tɩ bãmb mii b fãa, tɩ bõe bõn-kãens ka solg n maan ye.

27Rĩm a Agirpa, yãmb tẽeda Wẽnnaam no-rɛɛsdbã sẽn yeel bũmb ninsã? Mam miime tɩ yãmb tẽeda bõn-kãense.

28A Agirpa yeela a Poll yaa: Fo tagsdame tɩ wakate bilf pʋgẽ, f tõe n kɩtame tɩ mam yɩɩ a Zezi neda?

29A Poll leokame yaa: Yaa wakat bilf pʋgẽ woo, wall yaa wakat wʋsg pʋgẽ me, mam pʋʋsda Wẽnnaam tɩ kõn yɩ yãmb y yembr bal ye. La yaa tɩ neb nins fãa sẽn kelgd mam koɛɛgã dũnna wã me, yãmb na lebg wa maam, bãn-kãensã sẽn yãk b toogo.

30Dẽ, rĩma ne Gʋvɛrneera la a Bereniis ne neb nins sẽn da zĩ ne bãmbã yikame.

31B sergame n yẽs ne taab n yeel tɩ rao-kãngã ka maan bũmb sẽn zems ne kũum, wall bi-bees roog kõom ye.

32La a Agirpa yeela a Festus tɩ sã n ka a Poll sẽn yeel t'a rata Sezaar nengẽ wã, a ra tõe n paamẽ la lohorem.

← Chapter 25 Jump to: Chapter 27 →