Joshua 13

Quechuan QXO (Biblia en Quechua del sur de Conchucos)

← Chapter 12 Jump to: Chapter 14 →

1Josué pasaypa rukuna kaykaptinmi Tayta Dios nirqan: «Pasaypa rukunam kanki. Qechunaykipä partikunaqa atskarämi kaykan.

2Qechunaykipä kaqkunam kaykan filisteo runakuna y gesureo runakuna täyanqan partikuna.

3Tsay qechunaykipä kaq partikunam kaykan Sihor mayupita hasta cananeo runakuna täyanqan Ecrónpa lindërunyaq. Sihor mayuqa Egiptupa lindërunpam päsan. Tsaynöllam tsay manarä qechunqayki partikunachö kaykan filisteo runakunapa pitsqa mandaqnin täyanqan markakuna. Tsay markakunam kaykan Gaza, Asdod, Ascalón, Gat y Ecrón. Aveo runakuna täyanqan partikunatapis manarämi qechurquykirätsu.

4Tsay partiqa sur kaq lädupam kaykan. Tsaynöllam qechurquykirätsu cananeo runakuna täyanqan partikunata. Tsay partikunaqa kaykan Sidón runakuna täyanqan Meharapita hasta Afecyaqmi. Afecqa amorreo runakuna täyanqan lindërunchömi kaykan.

5Tsaynöllam qechurquykirätsu giblita runakuna täyanqan partikunata y llapan Líbanuta Baal-gadpita hasta Hamatman yaykunayaq. Tsayqa kaykan rupay yarqamunan kaq lädupam. Baal-gadqa Hermón jirka chakinchömi kaykan.

6Tsay partikunata qechurmi Israel runakuna según avanzayanqanman qarqushä Sidón runakunata y jallqakunachö täraq runakunata Líbanupita hasta Misrefot-maimyaq. Qechuskirna noqa ninqänölla qamqa Israel runakunata tsay partikunata rakipunki herenciankuna kananpä.

7Isqun trïbukunatawan pullan Manasés trïbuta herenciankunata rakipurqa llapan tsay partikunata rakipunki».

8Jordán mayu tsimpan rupay yarqamunan kaq lädupam Rubén trïbu runakuna, Gad trïbu runakuna y pullan Manasés trïbu runakuna herenciakunata puntata chaskiyarqan. Tsaykunataqa Tayta Diospa sirviqnin Moisésmi rakipurqan.

9Paykunapa herenciankunam karqan Arnón mayu ñöpanchö kaykaq Aroerpita y Arnón raqrachö kaykaq markapita hasta Dibónyaq. Tsaynöllam herenciankuna karqan llapan Medeba pampa

10y Hesbónchö täraq rey Sehón mandanqan llapan markakuna hasta amonita runakunapa lindërunyaq. Sehónqa amorreo runakunapa mandaqnin reymi karqan.

11Tsaynöllam herenciankuna karqan Galaad parti, gesureo y maacateo runakuna täyanqan partikuna, Hermón raju aywaq jallqakunawan Basán partipis hasta Salcayaq.

12Tsaynöllam herenciankuna karqan Basán partipa rey Og mandanqankuna. Rey Ogmi täkurqan Astarotchö y Edreichö. Payllanam refaíta runaqa karqan. Og mandanqan runakunata wanuskatsirmi markankunata Moisés qechurqan.

13Peru Gesurchö y Maacachö täraq runakunatam sïqa qarqurqantsu. Tsaymi kananyaqpis Israel runakunawan juntu taykäyan.

14Moisésqa manam ima herenciatapis Leví trïbu runakunata rakipurqantsu. Tsaypa rantinqa Tayta Dios ninqannöllam paykunapä karqan Israel runakuna apayanqan sacrificiukuna.

15Rubén trïbu runakunata castanpa castanpa Moisés rakipuptinmi

16herenciankuna karqan Arnón mayu ñöpanchö kaykaq Aroer marka, Arnón raqrachö kaykaq marka y llapan Medeba pampapis hasta

17Hesbónyaq. Tsaynöllam herenciankuna karqan tsay pampachö kaykaq markakunapis. Tsay markakunam karqan Dibón, Bamot-baal, Bet-baal-meón,

18Jahaza, Cademot, Mefaat,

19Quiriataim, Sibma, Zaret-sahar (Zaret-saharqa pampachö kaykaq jirkanchömi kaykan),

20Bet-peor y Bet-jesimotpis. Tsaynöllam herenciankuna karqan Pisga niyanqan jirka chakinchö tunakuna.

21Tsaynöpam Rubén trïbu runakunapa herencian karqan entëru pampachö kaykaq markakuna y Hesbónchö täraq rey Sehón llapan mandanqan markakuna. Sehónqa amorreo runakunapa mandaqnin reymi karqan. Paytawan paypa poderninchö kaykaq madianita runakunapa mandaqninkunatam Moisés wanutsirqan. Tsay mandaqkunam kayarqan Evi, Requem, Zur, Hur y Reba.

22Paykunawan pelyar atska runakunatam Israel runakuna wanutsiyarqan. Tsaychömi Beorpa tsurin adivinaq Balaamtapis wanutsiyarqan.

23Rubén trïbu runakunapa herenciankunapa lindërunmi karqan Jordán mayu kuchunpa. Tsay markakunata y caseriukunatam Rubén trïbu runakuna castanpa castanpa chaskiyarqan.

24Gad trïbu runakunatapis castanpa castanpa Moisés rakipuptinmi

25herenciankuna Jazer, Galaad partichö kaykaq llapan markakuna y pullan amonita runakunapa markankunapis hasta Rabá tsimpanchö kaykaq Aroeryaq karqan.

26Tsaynöllam herencian karqan Hesbónpita hasta Ramat-mizpayaq y Betonimyaq y Mahanaimpita hasta Debiryaq.

27Jordán mayu ñöpan pampakunachöpis herencian karqan Bet-aram, Bet-nimra, Sucot, Zafón y Hesbónchö täraq Sehón mandanqan wakin markakunapis. Lindërunmi Jordán mayu kuchullanpa päsarqan hasta Cineret qocha kuchunyaq. Llapanpis Jordán mayu rupay yarqamunan lädupam karqan.

28Tsay markakunatam caseriukunatawan Gad trïbu runakuna castanpa castanpa chaskiyarqan.

29Pullan Manasés trïbu runakunatapis castanpa castanpa Moisés rakipuptinmi

30herenciankuna Mahanaimpita norti kaq lädupa karqan. Tsaymi karqan Basán partipa mandaqnin rey Og mandanqankuna, Jairpita miraq runakuna qechuyanqan joqta chunka (60) markakuna y Basánchö wakin markakunapis.

31Tsaynöllam herenciankuna karqan pullan Galaad y Basán nacionpa mandaqnin rey Og täranqan Astarotwan Edrei markakuna. Tsaykunam pullan Manasés trïbu runakuna castanpa castanpa chaskiyanqan herenciakuna karqan. Tsay runakunaqa Manaséspa tsurin Maquirpita miraq runakunam kayarqan.

32Llapan tsay herenciakunatam Moisés rakipurqan Jordán mayuta manarä päsar Jericó tsimpan Moab pampakunachö kaykar.

33Peru Leví trïbu runakunatam sïqa ima herenciatapis aypurqantsu, sinöqa Israel runakuna yärakuyanqan Tayta Diosmi nirqan: «Kikïmi qamkunapa herenciaykikuna kä».

← Chapter 12 Jump to: Chapter 14 →