Joshua 19

Quechuan QXO (Biblia en Quechua del sur de Conchucos)

← Chapter 18 Jump to: Chapter 20 →

1Herenciankuna rakipunanpä yapay suertiyaptinmi Simeón trïbu castakunapä yarqamurqan. Tsaymi Simeón trïbu runakuna herenciankuna chaskiyarqan Judá trïbu runakunapa herencianpa chawpinchö.

2Tsaymi paykunapa markankuna karqan Beerseba, Seba, Molada,

3Hazar-sual, Bala, Ezem,

4Eltolad, Betul, Horma,

5Siclag, Bet-marcabot, Hazar-susa,

6Bet-lebaot y Saruhén. Tsay partichö chunka kimsa markakunam caseriunkunawan karqan.

7Wakin chaskiyanqan markakunam karqan Aín, Rimón, Eter y Asán. Tsay partichö chusku markakunam caseriunkunawan karqan.

8Sur kaq lädupa wakin kaq markakunapis Simeón trïbu runakunapämi hasta Baalat-beeryaq karqan. Baalat-beerpa jukaq jutinmi Neguev Ramat kaykan. Tsaynömi Simeón trïbu runakuna castanpa castanpa herenciankuna chaskiyanqan markakunapis caseriunkunapis karqan.

9Simeón trïbu runakunapa herencianqa Judá trïbu runakunapa herencianpa chawpinchömi karqan. Tsaynö karqan Judá trïbu runakunapa herencian alläpa jatun kaptinmi.

10Herenciankuna rakipunanpä yapay suertiyaptinmi Zabulón trïbupa castankunapä yarqamurqan. Paykunapa herencianqa hasta Saridyaqmi karqan.

11Saridpita rupay ullunan kaq lädupa aywarmi lindërun Mara lädupa päsarqan hasta Dabesetyaq. Tsaypitam Jocneam tsimpanchö kaykaq raqraman charqan.

12Saridpita rupay yarqamunan kaq lädupanam lindërun Quislot-taborpa päsar Daberatyaq charqan. Tsaynöllam Jafíaman witsarqan.

13Tsaypitam päsarqan Gat-heferpa, Ita-cazínpa y Rimónpa. Rimónpitam Neapa tumarqan.

14Norti kaq lädupa lindërun tumarmi Hanatónpa päsarqan. Tsaypitam Jefte-el pampapa charqan.

15Tsay herenciachö markakunam Catat, Naalal, Simrón, Idala, Belén y wakin markakunapis karqan. Paykunapa markankunaqa chunka ishkaymi karqan. Tsay markakunapa caseriunkunapis karqanmi.

16Tsaynömi Zabulón trïbu runakuna castanpa castanpa herenciankuna chaskiyanqan markakuna y caseriunkuna karqan.

17Herenciankuna rakipunanpä yapay suertiyaptinmi Isacar trïbupa castankunapä yarqamurqan.

18Paykunapa markankunam karqan Jezreel, Quesulot, Sunem,

19Hafaraim, Sihón, Anaharat,

20Rabit, Quisión, Abez,

21Remet, En-ganim, En-hada y Bet-pases.

22Taborpa, Sahazimapa y Bet-semespa päsarmi Jordán mayuyaq lindërun charqan. Paykunapa markankunaqa chunka joqtam karqan. Tsay markakunapa caseriunkunapis karqanmi.

23Tsaynömi Isacar trïbu runakuna castanpa castanpa herenciankuna chaskiyanqan markakuna y caseriunkunapis karqan.

24Herenciankuna rakipunanpä yapay suertiyaptinmi Aser trïbupa castankunapä yarqamurqan.

25Paykunapa markankunam karqan Helcat, Halí, Betén, Acsaf,

26Alamelec, Amad y Miseal. Rupay ullunan lädupa lindërunmi päsarqan Carmelo jirkapa y Sihor-libnatpa.

27Tsaypita rupay yarqamunan lädupa tumarmi Bet-dagónpa päsar Jefte-el pampayaq charqan. Jefte-el pampachöqa Zabulón trïbu runakunapa lindërunwanmi tinkurqan. Tsaypita norti lädupa tumarmi päsarqan Bet-emecpa y Neielpa hasta Cabulman chanqanyaq.

28Tsaypitam päsarqan Abdónpa, Rehobpa, Hamónpa y Canápa hasta jatunkaray Sidón markaman chanqanyaq.

29Tsaypita tumarmi lindërunkuna Ramápa päsarqan hasta corralashqa Tiro markayaq. Tsaypitam Hosapa päsar Mediterráneo Lamaryaq charqan. Aser trïbu runakunapa markankunam karqan Mahaleb, Aczib,

30Uma, Afec Rehob. Paykunapa markankunaqa ishkay chunka ishkaymi (22) karqan. Tsay markakunapa caseriunkunapis karqanmi.

31Tsaynömi Aser trïbu runakuna castanpa castanpa herenciankuna chaskiyanqan markakuna y caseriunkunapis karqan.

32Herenciankuna rakipunanpä yapay suertiyaptinmi Neftalí trïbupa castankunapä yarqamurqan.

33Paykuna chaskiyanqan herenciapa lindërunmi Helefpita qallarqan. Tsaypitam päsarqan Alón-saananimpa, Adami-necebpa, Jabneelpa y Lacumpa hasta Jordán mayuyaq.

34Rupay ullunan lädupanam lindërun Aznot-taborpa päsar Hucocyaq charqan. Sur kaq läduchömi Zabulón trïbu runakunapa lindërunwan tinkurqan. Rupay ullunan lädupanam lindërun Aser trïbu runakunapa lindërunwan tinkurqan. Rupay yarqamunan lädupanam Jordán mayuyaq lindërun charqan.

35Paykunapa corralashqa markankunam karqan Sidim, Zer, Hamat, Racat, Cineret,

36Adama, Ramá, Hazor,

37Cedes, Edrei, En-hazor,

38Irón, Migdal-el, Horem, Bet-anat y Bet-semes. Paykunapa markankunaqa chunka isqunmi karqan. Tsay markakunapa caseriunkunapis karqanmi.

39Tsaynömi Neftalí trïbu runakuna castanpa castanpa herenciankuna chaskiyanqan markakuna y caseriunkuna karqan.

40Herenciankuna rakipunanpä yapay suertiyaptinmi Dan trïbupa castankunapä yarqamurqan.

41Paykunapa markankunam karqan Zora, Estaol, Ir-semes,

42Saalabín, Ajalón, Jetla,

43Elón, Timnat, Ecrón,

44Elteque, Gibetón, Baalat,

45Jehúd, Bene-berac, Gat-rimón,

46Mejarcón y Racón. Tsaynöllam paykunapä Jope markapa cercanchö kaykaq partikuna karqan.

47Tsaynö kaptinpis herenciankuna Dan trïbu runakuna manam qechuyta puëdiyarqantsu. Tsaymi Lesemman witsäyarqan tsaychöna tänanpä. Lesem runakunawan pelyar wanutsirmi tsaychöna täkuyarqan. Tsay markapa jutintam trocatsiyarqan Dan jutin kananpä. Tsaymi unay castanpa jutin kanqannö markapa jutinpis Dan karqan.

48Tsaynömi Dan trïbu runakuna castanpa castanpa herenciankuna chaskiyanqan markakuna y caseriunkunapis karqan.

49Herenciankuna rakipuyta ushaskiptinmi Nunpa tsurin Josuétapis herenciankuna Israel runakuna rikatsiyarqan wakin kaq trïbukuna chaskiyanqan herencia chawpinchö.

50Tayta Dios ninqannöllam Josué mañakuptin markata rakipuyarqan. Tsaymi chaskirqan Efraín jallqakunachö Timnat-sera markata. Josuéqa tsay marka wayikunatapis yapay shäritsirmi tsaychö täkurqan.

51Israel runakunata herenciankuna rakipuyänanpämi sacerdöti Eleazarwan, Josué y Israel runakunapa mandaqninkuna suertiyarqan. Tinkuna Toldu punkuchömi Tayta Diospa puntanchö tsaynö suertiyayarqan. Tinkuna Tolduqa Siluchömi karqan. Tsaynömi llapan trïbukunata herenciankunata rakipuyta ushayarqan.

← Chapter 18 Jump to: Chapter 20 →