Joshua 20

Quechuan QXO (Biblia en Quechua del sur de Conchucos)

← Chapter 19 Jump to: Chapter 21 →

1Tsaypitanam Josuéta Tayta Dios nirqan:

2«Israel runakunata ninki Moisésta ninqänölla pakakuyänan markakunata akrayänanpä.

3Tsay markakunamanmi runa mayinta mana yarpaypa wanutsiq runa qeshpir amparakunqa. Tsaymanmi qeshpinqa wanuq runapa castankuna venganzata ashir mana wanutsiyänanpä.

4«Pakakuyta munaq kaqmi mayqan pakakuyänan markamanpis chaykur marka yaykuna punkuchö mayor runakunawan parlanqa. Tsaychömi paykunata willanqa imanöpa wanutsinqanta. Tsaymi mayor runakunaqa markaman yaykatsir mayninchö tänanpäpis rikatsiyanqa.

5Contran mana kaykar runa mayinta wanutsiptinmi wanuqpa legïtimu castankuna qepanta chaptin mayor runakuna entregayanqatsu.

6Tsaypa rantinmi tsaychö täraq runakuna juzgar niyanqa yarpaypa o mana yarpaypa wanutsinqantapis. Mana yarpaypa wanutsinqanta niptinqa tsay markallachömi täkunqa mandaq sacerdöti wanunqanyaq. Tsaypitarämi wayinman kutikunqa».

7Tayta Dios tsaynö niptinmi pakakuyänanpä kaq markakunata Israel runakuna akrayarqan Cedesta, Siquemta y Quiriat-arbata. Cedesqa Neftalí trïbu runakuna täyanqan jallqakunachö kaykaq Galileachömi kaykan. Siquemqa Efraín jallqakunachömi kaykan. Quiriat-arbaqa Judá trïbu runakuna täyanqan jallqakunachömi kaykan. Quiriat-arbapa jukaq jutinmi Hebrón.

8Jericóta päsar Jordán mayu wak tsimpachömi akrayarqan Beserta, Ramotta y Golánta. Beserqa Rubén trïbu runakuna täyanqan tsunyaq pampachömi kaykan. Ramotqa Galaadchömi kaykan. Golánqa Basánchömi kaykan. Basánqa Manasés trïbu runakuna täyanqanchömi kaykan.

9Tsay markakunam Israel runakuna y Israel runakunachö täraq jäpa runakunapis mana yarpaypa runa mayinta wanutsiyanqanpita pakakuyänanpä karqan. Tsayman pakakuyaptinmi wanuqpa castankuna venganzata ashir wanutsiyanqatsu. Tsaychö täraq runakunanam qorikaykur tsay runata juzgayanqa yarpaypa o mana yarpaypa wanutsinqantapis musyayänanpä.

← Chapter 19 Jump to: Chapter 21 →