bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
Joshua 2
Joshua 2
Quechuan QXO (Biblia en Quechua del sur de Conchucos)
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 3 →
1
Sitimpita ishkay runata rikapakayämunanpä Jordán mayu wak tsimpaman mandarmi Josué nirqan: «Jericó marka y wakin markakuna imanö kanqantapis rikapakayämunaykipä aywayay». Tsaynö aywarmi Rahab warmipa wayinman char tsayllachö patsakuyarqan. Rahabqa prostitüta warmim karqan.
2
Rikapakuqkuna Rahabpa wayinman chäyanqanta rikaykurmi juk runa Jericó markapa mandaqnin reyta nirqan: «Kanan paqasmi Israel runakuna markantsikman chäyämushqa imanö atacamänantsikpäpis rikapakuq».
3
Tsaynö willaptinmi Rahab kaqman runakunata mandarqan niyänanpä: «Wayikiman patsakamuq runakunata qarqamuy. Paykunaqa markantsikta rikapakuqmi shäyämushqa».
4
Rey mandanqan runakuna chäyänanpäqa rikapakuq runakunata Rahab pakashqanam karqan. Tsaymi paykunata nirqan: «Rasunpam runakuna chäyämushqa. Peru maypita kayanqantapis manam musyarqütsu.
5
Patsa tsakaykaptinnam marka yaykuna sawanta wichqananpäna kaykaptin aywakuyashqa. Manam musyätsu maypa aywayanqantapis. Peru jinan höra qatiparqa taripäyankim».
6
Tsaynö nirpis Rahabqa altuschö muntunaraykaq lïnu manöjukuna rurinchömi tsay ishkay runakunata pakarätsirqan.
7
Rahab ninqanta criyirmi rey mandanqan runakunaqa taripayta yarpar Jordán mayu väduyaq aywayarqan. Yarquskiyaptillannam Jericó markaman yaykuna sawanta wichqaskiyarqan.
8
Tsaypitanam ishkay rikapakuq runakuna manarä punukäyaptin pakaraykäyanqan kaqman witsaskir Rahab nirqan:
9
«Chäyämunqaykita musyarmi kaychö täraq runakuna pasaypa mantsariywan tullunkunapis tsuktsukyäyanrä. Tsaymi musyä kay markata y wakin markakunatapis Tayta Dios entregayäshunaykipä kanqanta.
10
Musyayämi Egiptupita yarqayämuptiki Puka Lamarta päsayämunaykipä Tayta Dios tsakitsinqanta. Tsaynöllam musyayä Jordán mayu tsimpan amorreo runakunapa mandaqnin reykuna Sehónta y Ogta soldädunkunatawan wanutsiyanqaykita.
11
Tayta Diosnintsikqa ciëluchöpis kay patsachöpis llapanpä poderyuqmi kaykan. Pay yanapayäshunqaykita musyarmi mantsayäshurniki pipis qamkunawan pelyayta valurantsu.
12
«Tsaymi rugakullä: Tayta Diospa jutinchö awniyämay qamkunata alli rikanqänölla llapan castäkunatawan alli rikaykayämänaykipä. Kuyapäyämänaykipä kanqanta awnimarqa ima señalllatapis willayämay.
13
Papänïta, mamäta, turïkunata, ñañäkunata y paykunawan kaykaqkunataqa ama wanutsiyankitsu».
14
Tsaynö rugakuptinmi niyarqan: «Kay parlanqantsikta pitapis mana willaptikiqa noqakunapis qamkunata tsapäyäshaykim. Kay markakunata Tayta Dios podernïkunaman churamuptinqa imaypis allim rikayäshayki».
15
Tsaynö willanakuskirmi Rahabqa ishkay rikapakuq aywaqkunata waskawan ventänanpa bäjatsirqan. Tsaynö bäjatsirqan marka murälla jananchö wayin kaptinmi.
16
Manarä bäjatsirmi paykunata nirqan: «Ashiyäshuqniki runakuna mana tariyäshunaykipä jallqakunaman aywar paykuna kutiyämunqanyaq kimsa junaq pakaräyanki. Tsaypitana aywakuyanki».
17
Tsaynö niptinmi niyarqan: «Noqakunaqa llapan awniyanqätam cumpliyäshä.
18
Jericó markaman Israel runakuna yaykayämunan junaq bäjayanqä ventänaman kay puka waskata watanki. Tsay junaq wayikiman qorikäyanki papäniki, mamayki, turikikuna y llapan castaykikunapis.
19
Wayikichö kaqkunataqa manam mayqantapis wanutsiyanqatsu. Peru wayikipita yarquq kaqmi sïqa kikin jutsayuq kanqa wanutsiyänanpä. Kay wayikichö kaykaqta pitapis wanutsiyaptinqa noqakunam jutsayuq kayäshä.
20
Peru kanan parlanqantsikta pitapis willaptikim sïqa kay awniyanqäta cumpliyäshätsu».
21
Tsaymi Rahabqa nirqan: «Taytakuna, niyanqaykinömi kanqa». Tsaynö willanakuskirmi paykuna despidikur aywakuyarqan. Aywaskiyaptinnam tsay puka waskata ventänaman ras watarqan.
22
Tsaypitanam tsay ishkay rikapakuq aywaqkuna jallqakunaman aywaykur kimsa junaqyaq pakaräyarqan. Tsaymi ashiqnin runakuna maytsaypa ashirpis mana tarirnin Jericóman kutikuyarqan.
23
Tsaypitanam ishkan rikapakuq aywaqkuna jallqakunapita urämur Jordán mayuta päsayarqan. Josué kaqman kutiykurnam ima päsanqantapis willar
24
niyarqan: «Tayta Diosmi tsay markakunata makintsikman churamushqa. Yaykunantsikpä kanqanta musyarmi maytsaychö täraq runakunapis pasaypa mantsarirnin tsuktsukyäyan».
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 3 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24