Joshua 8

Quechuan QXO (Biblia en Quechua del sur de Conchucos)

← Chapter 7 Jump to: Chapter 9 →

1Tsaypitanam Josuéta Tayta Dios nirqan: «Ama mantsariytsu ni qelanaytsu. Pelyayänanpä alistakushqa runakunata qoriskir Hai markata atacayänaykipä ras aywayay. Noqam yanapayäshayki Hai markapa mandaqnin reyta y tsaychö täraq runakunata chipyaq ushakätsiyänaykipä. Tsaymi paykunapa chakrankuna y markankunapis qamkunapana kanqa.

2Jericó markachö täraq runakunata y mandaqnin reyta ushakätsiyanqaykinöllam Hai markachö täraq runakunata y mandaqnin reytapis ushakätsiyanki. Tsay markapitam sïqa ashmankunata y imaykankunata kikikikunapäna apayämunki. Illaqpita atacayänaykipä marka waqtanpa yaykuskir alistakuyay».

3Tsaymi pelyaq aywayänanpä kimsa chunka waranqa (30,000) runakunata Josué akrarqan. Paykunata Hai markaman paqaspa mandarmi

4nirqan: «Ninqäta shumaq wiyayämay. Marka qepanpa yaykuskir pakakuyanki. Tsaychö listu shuyaraykäyanki illaqpita markaman yaykur atacayänaykipä.

5Noqanam wakin kaq runakunawan markaman aywaykur wajupäyäshä. Pelyaq yarqayämuptinmi puntata qeshpinqantsiknölla qeshpiq tukuyäshä.

6Paykunaqa yapay vincimanqantsikta yarparmi qepäkunata qatipäyämanqa.

7Tsayyaqmi qamkunaqa pakaraykäyanqaykipita yarquskir markaman yaykuyanki. Tayta Diosnintsikmi tsay markata entregayäshunki.

8Tayta Dios ninqannölla markaman yaykuskir wayikunata ras rupatsiyanki. Kay ninqäkunataqa mana qonqaypa rurayanki».

9Tsaynö nirmi Josué paykunata mandarqan Hai marka lädupa päsar rupay ullunan kaq läduchö pakakuyänanpä. Ninqannö aywarmi manarä Bet-el markaman char pakakuyarqan. Josuénam campamentullachö quëdarqan.

10Waraynin wäraynam tsaka tsakalla campamentuchö quëdaq runakunata Josué qorirqan Hai runakunawan pelyaq aywayänanpä. Tsay runakunapa puntantam Israel mayor runakuna aywayarqan.

11Marka tsimpanpa päsarmi norti kaq lädunchö jamayarqan. Paykunataqa markapita juk raqrallam rakirqan.

12Tsaypitanam pitsqa waranqanö (5,000) runakunata wakin runakuna pakaraykäyanqanman Josué mandarqan. Tsay runakunaqa rupay ullunan kaq läduchö y Haipita Bet-elman aywanachömi pakaraykäyarqan.

13Tsaynöpam Israel runakuna ishkay grüpuman rakinakushqa kayarqan. Jukaq grüpunam karqan markapita rupay ullunan kaq läduchö y jukaq grüpunam karqan norti läduchö. Tsay paqasmi Josuéwan aywaq runakuna pullan pampayaq chäyarqan.

14Patsa waraskiptinnam tsimpankunachö kaykäyanqanta rikaskir Hai markapa mandaqnin rey llapan runakunawan ras yarquyarqan Arabá pampaman aywaq bajädachö Israel runakunawan pelyayänanpä. Manam musyayarqantsu wakin Israel runakuna marka waqtanchö pakaraykäyanqanta.

15Tsaymi Josuéwan kaykaq runakunaqa qeshpiq tukur desiertuman aywaq nänipa aywayarqan.

16Tsayta rikarmi Hai runakunapa mandaqnin rey llapan runakunata nirqan Israel runakunata qatipäyänanpä. Tsaynö qatiparmi markapita karuyaq aywayarqan.

17Tsaymi markachö quëdaqkunata washänanpä Hai markachö ni Bet-el markachöpis ni juk runallapis quëdarqantsu.

18Tsaypitanam Josuéta Tayta Dios nirqan: «Lanzaykita Hai markaman joqariy. Noqam yanapashayki ushakätsiyänaykipä». Tsaynö niptinmi Josuéqa lanzanta joqarirqan.

19Tsaymi Israel runakunaqa pakaraykäyanqanpita yarqaskamur cörrilla markaman yaykuskir llapan wayikunatapis rupatsir ushayarqan.

20Israel runakunata qatipaykäyanqanchö Hai runakuna tikraykuyänanpämi pasaypa yanayparä markapita qoshni shäriykaqta rikaskiyarqan. Josuéwan kaykaq Israel runakunanam tsaynö rupaykanqanta rikaykur desiertupa qeshpiykäyanqanpita kutiykur Hai runakunata atacar qallaykuyarqan. Tsaymi Hai runakunaqa maypa qeshpiytapis puëdiyarqantsu.

22Tsaypitanam marka rupatsiq Israel runakuna yarqayämurqan Hai runakunawan pelyayänanpä. Tsaynö ishkan lädupita atacarmi Hai runakunata llapanta wanutsiyarqan.

23Peru Hai markapa mandaqnin reytam sïqa kawaykaqta tsariskir Josuéman apayarqan.

24Qatipaqnin runakunata wanuskatsirnam Israel runakuna Hai markaman kutiykur llapan tsaychö kaqkunata wanutsiyarqan.

25Tsay junaqmi Hai runakunata warmitapis ollqutapis chunka ishkay waranqata (12,000) wanutsiyarqan.

26Josuéqa tsaychö täraq runakunata llapanta ushakätsiyanqanyaqmi lanzanta Hai markamanpa apuntararqan.

27Peru ashmakunata y markachö tariyanqan kuyayllapä kaqkunataqa manam ushakätsiyarqantsu, sinöqa Josuéta Tayta Dios ninqannöllam kikinkunapäna apakuyarqan.

28Hai markata Josué rupatsinqanpitam kananyaqpis raqällana kaykan.

29Hai markapa mandaqnin reyta Josué wanuskatsirmi ayanta tardiyaq qeruman warkutsirqan. Rupay jeqaykaptinna jipiskatsimurmi marka yaykunaman apatsirqan. Tsaypitanam ayan jananman rumikunata muntunayänanpä mandarqan. Tsay rumikunata muntunayanqanqa kananyaqmi kaykan.

30Tsaypitanam Ebal jirkachö Israel runakuna yärakuyanqan Tayta Diospä altarta Josué pirqarqan.

31Tsay altartaqa Tayta Diospa sirviqnin Moisés Israel runakunata ninqannöllam llaqllanni rumikunawan pirqarqan. Moisés qellqanqan leykunachömi nin: «Altarta pirqarqa llaqllashqa rumiwanqa ama pirqayankitsu». Tsaychömi Israel runakunaqa rupatsina sacrificiupä y alli päsakuy sacrificiupä ashmakunata altarchö rupatsiyarqan.

32Tsaynöllam Israel runakuna rikaykäyaptin pirqanqan altar rumikunaman Moisés yachatsinqan leykunata Josué qellqarqan.

33Tsaypitam Israel runakuna, paykunawan kaykaq jäpa runakuna, mayor runakuna y juezkunapis ishkay partiman qorikäyarqan Tayta Diospa bendicionninta chaskiyänanpä. Tayta Diospa sirviqnin Moisés ninqannöllam pullan runakuna qorikäyarqan Gerizim jirka chakinman y pullan kaqnam qorikäyarqan Ebal jirka chakinman. Tsay jirkakuna chawpinchö kaykaq pampaman Tayta Diospa Pactu Babulninta apaykurmi Leví trïbu sacerdötikuna ichiräyarqan.

34Tsaypitanam Moisés qellqanqan leykunata Josué jinchipa liyimurqan. Tsaynöllam liyimurqan bendicionkuna y maldicionkuna qellqashqa kanqankunatapis.

35Moisés qellqanqan leykunataqa llapantam Israel runakuna wiyayänanpä Josué liyimurqan. Tsay junaqmi tsaychö kaykäyarqan ollqukuna, warmikuna, wamrakuna y paykunawan kaykaq jäpa runakunapis.

← Chapter 7 Jump to: Chapter 9 →