Joshua 16

Quechuan QXO (Biblia en Quechua del sur de Conchucos)

← Chapter 15 Jump to: Chapter 17 →

1Josépita miraq runakuna suertiyaypa chaskiyanqan herenciapa lindërunkunam rupay yarqamunan kaq lädupa Jordán mayu kuchunpita qallarqan. Jericó pukyukunapita desiertupa päsarmi Bet-el jallqakunayaq charqan.

2Bet-elpita Luzyaq päsarmi arquita runakuna taykäyanqan Atarotyaq charqan.

3Tsaypita uraypanam rupay ullunan kaq lädupa päsarqan Jaflet runakuna taykäyanqan ura kaq Bet-horónyaq. Tsaypitanam Gezerpa päsar Mediterráneo Lamaryaq charqan.

4Tsaynömi Josépa tsurin Manaséspita miraq runakunapa y Josépa tsurin Efraínpita miraq runakunapa herenciankuna karqan.

5Efraín trïbu runakuna castanpa castanpa chaskiyanqan herenciapa lindërunmi rupay yarqamunan kaq lädupita qallaykur Atarot-adarta y Bet-horónpa päsar

6Mediterráneo Lamaryaq charqan. Norti kaq lädupa lindërunnam qallaykurqan Micmetatchö. Tsaypita rupay yarqamunan kaq lädupa tumarmi Taanat-silupa päsarqan hasta Janoayaq.

7Janoapita sur kaq lädupa urarmi Atarot, Naara y Jericópa päsar Jordán mayuyaq charqan.

8Tapúapitanam rupay ullunan kaq lädupa päsar Caná raqra kuchullanpa hasta Mediterráneo Lamaryaq charqan. Tsaypam Efraín trïbu runakuna castanpa castanpa chaskiyanqan herencianpa lindërun karqan.

9Efraín trïbu runakunapam mas wakin markankuna y caseriunkunapis pullan Manasés trïbu runakunapa herencianchö karqan.

10Gezer markachö täraq cananeo runakunata mana qarquyaptinmi kananyaqpis Efraín trïbu runakuna paykunawan juntu taykäyan. Peru tsay cananeo runakunataqa esclävutanömi poderninkunachö tsararäyan.

← Chapter 15 Jump to: Chapter 17 →