bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
Joshua 22
Joshua 22
Quechuan QXO (Biblia en Quechua del sur de Conchucos)
← Chapter 21
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 23 →
1
Tsaypitanam Josuéqa Rubén trïbu, Gad trïbu y pullan Manasés trïbu runakunata qayaykur
2
nirqan: «Tayta Diospa sirviqnin Moisés niyäshunqaykita llapantanam cumpliyarquyki. Noqa ninqäkunatapis llapantam cäsukuyarquyki.
3
Kananyaqmi Israel mayintsikkunata mana dëjaypa yanapayarquyki. Tayta Diosnintsikpa mandamientunkunata llapantam cumpliyarquyki.
4
Tsaymi kananqa Tayta Diosnintsik awnimanqantsiknölla Israel mayintsikkunata jamayman yaykatsishqa. Tsaynö kaykaptinqa Jordán mayuta päsar Tayta Diospa sirviqnin Moisés entregayäshunqayki herenciaykikunaman kutikuyay.
5
Peru yätsimanqantsiknölla llapan yachatsimanqantsik leykunata mana qonqaypa cumpliyanki. Tayta Diosnintsikta kuyar pay munanqannölla llapayki kawayanki. Tsaynölla ninqankunata cumplir llapan shonquykikunawan y llapan voluntänikikunawan payta sirviyanki».
6
Tsaynö yätsiskirmi alli kawayänanpä bendisaskir cada ünun wayinkunapa kutikuyänanpä Josué despacharqan.
7
Jordán mayuta Israel runakuna manarä päsayaptinmi Basán partita pullan Manasés trïbu runakunata Moisés rakipurqan herenciankuna kananpä. Wakin Manasés trïbu runakunatanam herenciankunata Josué rakipurqan Jordán mayuta päsaskir. Tsay tsimpachömi wakin Israel runakunapis herenciata chaskiyarqan. Basán partiman kutiyänanpämi pullan Manasés trïbu runakunatapis bendisar Josué
8
nirqan: «Vinciyanqayki runakunapita imaykankunata qechuyanqaykiwanmi pasaypa rïcu kutiykäyanki. Atskatam ashmatapis, qoritapis, qellaytapis, broncitapis, fiërrutapis y röpakunatapis apaykäyanki. Tsaynö kaykaptinqa markaykikunaman chaykur marka mayikikunata rakipuyanki».
9
Tsaynö niptinmi Rubén trïbu, Gad trïbu y pullan Manasés trïbu runakuna Israel mayinkunawan Siluchö kaykäyanqanpita Galaadman kutikuyarqan. Moisésta Tayta Dios ninqannöllam paykunapa herenciankuna Galaadchö karqan.
10
Rubén trïbu, Gad trïbu y pullan Manasés trïbu runakunam kutiykäyanqanchö Jordán mayu kuchunman chaykur Canaánllachörä jatunkaray altarta pirqayarqan.
11
Tsay altarta pirqayanqanta wakin kaq Israel runakuna musyaskirmi
12
Tayta Diospa contran shäriyanqanta yarpäyarqan. Tsaymi altarta pirqaq runakunawan pelyaq aywayänanpä Siluman qorikäyarqan.
13
Manarä pelyaq aywarmi sacerdöti Eleazarpa tsurin Fineesta Galaadman mandayarqan Rubén trïbu, Gad trïbu y pullan Manasés trïbu runakunawan parlayänanpä.
14
Fineeswanmi Israel runakunapa chunka mandaqninkunapis aywayarqan. Paykunaqa cada trïbupa mandaqninkunam kayarqan.
15
Galaadman chaykurmi Rubén trïbu runakunata, Gad trïbu runakunata y pullan Manasés trïbu runakunata niyarqan:
16
«Israel mayintsikkuna llapanpis musyaytam munayan imanir Tayta Diosta mana cäsuyanqaykita y imanir paypa contran shärir juk altarta rurayanqaykita.
17
¿Manaku yarpäyanki jutsa ruraqkunata Peorchö Tayta Dios ushakätsinqanta? Jutsata rurayanqanpita manam kananyaqpis shumaqllaqa purificashqarätsu kaykantsik.
18
¿Imanirtä qamkunapis Tayta Diospa contran shärir tsay altarta rurayarquyki? Tsaynö rurayanqaykipitam Tayta Dios pasaypa rabyar llapantsikta castigamäshun.
19
«Herenciayki impüru kanqanta yarparqa noqakuna täyanqä kaqman shakayämuy täyänaykipä. Tsaychömi Tayta Diospa Sagrädu Toldunpis kaykan. Shakamurqa noqakuna kaqchömi qamkunapis herenciaykikuna chaskiyanki. Peru imanö karpis juk altartaqa ama rurayankimantsu karqan. Juk altarta rurarqa Tayta Diosnintsikpa contran y noqakunapa conträkunam shäriykäyanki.
20
Yarpäyay Zerapa tsurin Acán rupatsinanpä kaqkunata pakar jutsata ruranqanta. Tsaynö ruranqanpitam Tayta Dios llapantsikwan pasaypa rabyakurqan. Acánqa manam kikillantsu jutsata ruranqanpita wanurqan, sinöqa wakin Israel mayintsikkunapis wanuyarqanmi».
21
Tsaynö niptinmi Rubén trïbu, Gad trïbu y pullan Manasés trïbu runakunaqa Israel mayinkuna mandayanqan mandaqkunata niyarqan:
22
«¡ Tayta Diosllam Dios kaykan! ¡Paypita masqa manam Dios kantsu! Paypa contran mana shäriyanqätaqa Tayta Diosmi musyan. Juk diosta adorayta yarpar tsay altarta rurashqa kayaptïqa mana kuyapaypa wanutsiyämay.
23
Tayta Diospa contran shärir rupatsina sacrificiuta, tsaki mikuy ofrendakunata o alli päsakuy sacrificiuta rupatsiyänäpä tsay altarta rurashqa kayaptïqa kikin Tayta Dios juzgayämätsun.
24
«Waray warantin noqakunapita miraqkunata qamkunapita miraqkuna capazchi michar niyanman: «Qamkunaqa ¿imanirtä yarpäyanki noqakuna adorayanqä Tayta Dios qamkunapapis Diosniki kanqanta?
25
Noqakuna adorayanqä Tayta Diosmi Jordán mayuta churashqa rakimänantsikpä. Tsaymi qamkunaqa, Rubén trïbu y Gad trïbu kar, adorayanqä Tayta Diosta adorayankimantsu». Tsaynö michäyaptinqa Tayta Diosta manam tsurïkuna adorayanqanatsu.
26
«Tsaynö mana kananpämi tsay altartaqa rurayarqü. Manam rupatsina sacrificiuta ni alli päsakuy sacrificiuta tsaychö rupatsiyänäpätsu rurayarqü,
27
sinöqa noqakunapita miraqkuna Tayta Diosta imaypis mana qonqaypa adorayänanpämi. Tsaynöpam noqakunapita miraqkuna rupatsina sacrificiuta, alli päsakuy sacrificiuta y wakin sacrificiukunatapis Sagrädu Tolduman Tayta Diospä rupatsiq aywayaptin qamkunapita miraqkuna michäyanqatsu.
28
Pipis tsaynö michaptinmi niyanqa: «Rikayay unay castäkuna Tayta Diospa altarnin niraqta rurayanqanta. Tsay altarta rurarpis manam rupatsina sacrificiuta ni wakin sacrificiuta rupatsiyänäpätsu rurayarqan, sinöqa noqakunapis qamkunanö Tayta Diosta sirviyanqäta musyayänaykipämi». Pipis michaptinmi tsaynö niyanqa.
29
Noqakunaqa manam yarpäyätsu juk altarta rurarpis Tayta Diospa contran shäriyta. Tayta Diosnintsikpa altarnin Sagrädu Toldun ñöpanchö kaykaptinqa ¿imapänatä rupatsina sacrificiuta, tsaki mikuy ofrendata y wakin sacrificiuta rupatsiyänäpä juklächö altarta rurayäman?»
30
Tsaynö niptinmi sacerdöti Finees y Israel runakunapa mandaqninkunapis tantiyakuyarqan paykuna allita rurayanqanta.
31
Tsaymi sacerdöti Eleazarpa tsurin Finees nirqan: «Allita yarpar tsay altarta rurayanqaykita tantiyarmi kanan musyayä Tayta Dios noqantsikwan kaykanqanta. Tsaynö kaptinqa Tayta Dios manam castigamäshuntsu».
32
Tsaypitanam Finees y paywan aywaq runakuna Galaadpita Canaánman kutikuyarqan. Wakin Israel runakuna kaykäyanqanman chaykurmi Rubén trïbu runakuna y Gad trïbu runakuna imata niyanqantapis willayarqan.
33
Tsaynö willaptinmi kushikurnin Tayta Diosta alabayarqan. Tsay junaqpitaqa mananam willanakuyarqannatsu Rubén trïbu runakunata y Gad trïbu runakunata ushakätsiq aywayänanpä.
34
Rubén trïbu y Gad trïbu runakunam tsay altarta jutitsiyarqan Yarpätsikuq kananpä. Tsaynö jutitsir niyarqan: «Kay altarmi runakunata yarpätsinqa noqantsikpis Tayta Diosta adoraykanqantsikta».
← Chapter 21
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 23 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24