Deuteronomy 11

Sotho 1951 (BIBELE)

← Chapter 10 Jump to: Chapter 12 →

1Morena Modimo wa gago o mo rate, o diše se a rego se dišwe, o hlokomele melao ya gagwe, le mekgwa ya gagwe, le ditaelo tša gagwe ka mehla.

2Lehono le tsebe gore ga ke bolele le bana ba lena ba ba sa tsebego le ba ba sa kago ba bona tsholo ya Morena Modimo wa lena, le bogolo bja gagwe, le seatla sa gagwe se maatla, le letsogo la gagwe le le emišitšwego.

3Ga ba bona matete a gagwe, le mediro ya gagwe ye a e dirilego kua Egipita go Farao kgoši ya Egipita, le nageng ya gagwe ka moka.

4Ga ba bona tše a di dirilego madira a Baegipita, le dipitsi tša bona, le dikoloi tša bona ge a ba ribegetša ka mafula a Lewatle la Mahlaka, mola ba le hlomarela, Morena a ba fediša, le bjale ba fedile.

5Ga ba bona tše a le dirilego tšona lešokeng la ba la fihla mono.

6Ga ba ka ba bona tše a di dirilego Dathane le Abirama barwa ba Eliaba morwa wa Rubeni, ka mo lefase le ahlamilego la ba metša, le mekutwana ya bona, le mešaša ya bona, le leruo la bona, ba le mo gare ga Baisiraele ka moka.

7Ba ba di bonego ka mahlo, ditiro tše kgolo tšeo ka moka tše Morena a di dirilego, ke bolena.

8Hlokomelang gee ditaelo tšohle tše ke le anegelago tšona lehono, gore le be ba maatla, le fihle le tšee naga yeo le selelago go yona go e tšea,

9gore le phele galelele le le nageng yeo Morena a e enetšego botataweno a re ke tlo e nea bona le bana ba bona, naga e elago maswi le nose.

10Ka gobane naga ye o yago go yona go e tšea, ga se naga e swanago le ya Egipita ye o tšwago go yona, ye o bego o bjala peu ya gago go yona, ye o bego o sepela ka maoto o e nošetša bjalo ka serapa sa merogo.

11Naga ye o selelago go yona go e tšea ke naga ya dithaba le meedi; e nwa meetse a dipula tša legodimo.

12Ke naga e babalelwago ke Morena Modimo wa gago; Morena Modimo wa gago o e lebelela ka mehla go tloga ge ngwaga o thoma go fihla ge o fela.

13E tlo re ge le tiiša go theetša ditaelo tše ke le laelago tšona lehono, ge le rata Morena Modimo wa lena ka pelo ka moka le ka moya ka moka,

14gona ke tlo nešetša naga ya lena pula ka lebaka la gona, pula ya tsheola le ya kgogolamoko, gore o kgobele mabele a gago, le mananose a morara wa gago, le makhura a mehlware ya gago.

15Dikgomo tša gago ke tlo di nea mafulo mo nageng ya gago; gomme o tlo ja wa khora.

16Le itoteng gore dipelo tša lena di se ke tša forwa, la aroga, la direla medimo e šele la e khunamela,

17ya tlo ba gona le tukelwago ke kgalefo ya Morena, a tswalela legodimo go se be le pula, lefase le se buduše dienywa tša lona, mme lena la senyega ka pela le le nageng e botse ye Morena a le fago yona.

18Mantšu a ka a, a beeng dipelong tša lena le meoyeng ya lena, le a tlemelele diatleng tša lena e be seka, e be mofapahlogo mo diphatleng tša lena.

19Le a rute bana ba lena, le boledišane ka ona le dutše mo nywakong ya lena, le ge o sepela mo tseleng, le ge o ya go robala, le ge o tsoga.

20O a ngwale mo dijakwaneng tša ngwako wa gago, le mo magorong a gago.

21Ke mo matšatši a lena le a bana ba lena, a ge le dutše mo nageng ye Morena a e neetšego botataweno e tlogo ba a mantši, bjalo ka matšatši a legodimo le le godimo ga lefase.

22E tlo re ge le tiiša go hlokomela ditaelo tše ka moka tše nna ke le laetšego tšona ka re le di dire, ge le rata Morena Modimo wa lena, la sepela ditseleng tša gagwe ka moka, la gomarela yena,

23ke mo Morena a tlogo raka ditšhaba tšeo ka moka ge le fihla; le tlo raka ditšhaba tše kgolo tše di le fetago ka maatla.

24Mo go fela mo go tlogo gata maoto a lena, e tlo ba ga lena; mellwane ya lena e tlo goma ka lešoka le ka Libanone; e tlo tloga nokeng ya Forate ya goma ka lewatle.

25Go ka se ke gwa ba le motho e a tlogo ema ge le fihla; dinaga ka moka tše le tlogo fihla go tšona Morena Modimo wa lena o tlo di tlaletša ka tšhogo ya go boifa bolena, ka mo a le boditšego.

26Bonang, lehono ke bea pele ga lena tšhegofatšo le thogo.

27Tšhegofatšo ke ya ge le tlo theetša ditaelo tša Morena Modimo wa lena tše ke le laetšego tšona lehono.

28Thogo ke ya ge le sa theetše ditaelo tša Morena Modimo wa lena, ge le aroga tsela ye ke le laelago yona lehono, la ya la latela medimo e šele ye le sa e tsebego.

29E re ge Morena Modimo wa gago a go fihlišitše nageng ye o yago go e tšea o bolele tšhegofatšo thabeng ya Garisima; thogo o e bolele thabeng ya Ebala.

30Dithaba tše ke tšela tše di lego mošola wa Jorodane, kua pele tseleng e yago bodikela nageng ya Bakanana ba ba dutšego molaleng o bataganego le Giligala, kgauswi le sethokgwa sa More.

31Ge le setše noka ya Jorodane, le fihlile la tšea naga ye Morena Modimo wa lena a le fago yona la dula go yona,

32gona le hlokomeleng melao ya ka ka moka le mekgwa ye ke le hlathollelago yona lehono, le dire ka yona.

← Chapter 10 Jump to: Chapter 12 →