Deuteronomy 7

Sotho 1951 (BIBELE)

← Chapter 6 Jump to: Chapter 8 →

1E tlo re ge Morena Modimo wa gago a go fihliša nageng ye o yago go yona go e tšea, gomme ge a raka ditšhaba tše ntši ge o fihla, e lego Bahethe, le Bagirigasi, le Baamoro, le Bakanana, le Bapheresi, le Bahefi, le Bajebusi, ditšhaba tše di šupago tše kgolo tše di go fetago ka maatla,

2ge Morena Modimo wa gago a di gafa ge o fihla, o tlo di fenya wa di dira digafiwamoka. O se ke wa ba wa gwerana le tšona; o se ke wa ba gaugela.

3Le se ke la tšeana nabo; le se ke la ba nea barwedi ba lena ya ba basadi ba barwa ba bona; gomme le se ke la tšeiša barwa ba bona barwedi ba lena.

4Ka gobane ba tlo aroša barwa ba lena ba ntlhanogela, ba direla medimo e šele; gomme bogale bja Modimo bo tlo le tukela, a le fediša ka pela.

5Se le swanetšego go ba dira sese: Phušolang dialetare tša bona, le thumaganye dikokwane tša bona, le reme meremedimo ya bona; diswantšho tša medimo ya bona le di fiše ka mollo.

6Ka gobane wena o setšhaba se se kgethetšwego Morena Modimo wa gago. Morena Modimo wa gago o go kgethile, gore o be setšhabaseruiwa sa gagwe, se a se hlaotšego ditšhabeng tše di lego lefaseng.

7Ge Morena a le ratile, a le hlaotše ga se ka gobane le feta ditšhaba tše dingwe ka bontši, gobane le be le le setšhaba se senyenyane go ditšhaba ka moka;

8Morena o dirilwe ke lerato; o be a rata go phetha keno ye a e enetšego botataweno, mme a le khuduša ka seatla se maatla, a le namolela kua ngwakong wa bohlanka letsogong la Farao kgoši ya Egipita.

9Tseba gee gobane Morena Modimo wa gago ke yena Modimo, Modimo e a botegago, e a dirago kgwerano ya tia; mme ba ba mo ratago mme ba hlokomela ditaelo tša gagwe, o ba dira ka botho go iša molokong wa sekete.

10Ba ba mo hloyago o ba lefetša a lebane nabo; ga a diege go lefetša le go lebana le yoo a mo hloilego.

11Hlokomela gee, o dire ka melao le ka mekgwa ye nna ke go laodišetšago yona lehono.

12Se le tlogo se bona ge le latela mekgwa ye, la e hlokomela, la dira ka yona, sese: Morena Modimo wa gago o tlo fela a tiiša kgwerano, a go dira ka botho bjo a bo enetšego botataweno.

13O tlo go rata, o tlo go šegofatša, o tlo go atišetša thari le kenyo tša naga ya gago, le mabele a gago, le mananose a morara wa gago, le makhura a mehlware ya gago, le mabotlana a dikgomo tša gago, le dikwanyana le diputšana, o le mo nageng ye a e enetšego botataweno a re ke tlo le fa yona.

14O tlo ba mošegofatšwa mo go ditšhaba ka moka; mo go wena go ka se ke gwa ba le monna goba mosadi e a se nago ngwana wa gagwe; le go diruiwa tša gago go tlo ba bjalo.

15Morena o tlo go efela malwetši ohle; gomme dinkhu, tšela ka moka tše šoro tša Egipita tše o di tsebago, a ka se ke a di tliša go wena; o tlo di iša go manaba a gago.

16Ditšhaba ka moka tše Morena Modimo wa gago a go neago tšona o di fediše; mahlo a gago a se ke a di gaugela, gore o se tlo direla medimo ya bona. Ka gobane ke wona moreo wo o go theilego.

17Ge mo pelong ya gago o ka bolela wa re: Ditšhaba tše di mpheta ka boati, nka kgona bjang go di fenya?

18O se ke wa ba boifa; o fele o gopola tše Morena Modimo wa gago a di dirilego Farao le Baegipita ka moka.

19Gopola meleko e megolo ye o e bonego ka mahlo a gago, le matete, le mehlolo, le seatla se maatla, le letsogo le le emišitšwego. Ke tšona tše Morena Modimo wa gago a tlo go di dira ditšhaba ka moka tše o di boifago.

20Morena Modimo wa gago o tlo ba a roma le mebu ya ba tsena, go be go fedišwe le mašaledi a a utamago ge o fihla.

21O se ke wa ba tšhoga, ka gobane Morena Modimo wa gago o na le wena, yena Modimo e mogolo e a tšhabegago.

22Ditšhaba tšeo Morena Modimo wa gago o tlo di raka ka lenoko ge o fihla; o se ke wa di fediša ka pela; o ka tlo atelwa ke dibata tša naga.

23Morena Modimo wa gago o tlo di lahletša ge o fihla, a di tlaletša ka tlalelo e kgolo, di be di fedišwe.

24Dikgoši tša bona o tlo di gafela matsogong a gago; maina a tšona o tlo a fediša ka tlase ga legodimo; go ka se ke gwa ba le e a tlogo ema ge o fihla, wa ba wa ba fediša.

25Diswantšho tša medimo ya bona o di fiše ka mollo. O se ke wa kganyoga disilifera le digauta tše di lego mo go tšona, gore o se tanyege ka tšona; ka gobane dilo tšeo Morena Modimo wa gago o a di hlaswa.

26Makgapa ao o se ke wa a tliša nywakong ya gago, gore o sa tlo dirwa segafiwamoka bjalo ka tšona. O di hlaswe, o di nyaletše ruri, ka gobane ke digafiwamoka.

← Chapter 6 Jump to: Chapter 8 →