Deuteronomy 16

Sotho 1951 (BIBELE)

← Chapter 15 Jump to: Chapter 17 →

1O šetše kgwedi ya Abibi; o direle Morena Modimo wa gago Paseka; gobane Morena Modimo wa gago o go ntšhitše Egipita e le bošego.

2O hlabele Morena Modimo wa gago Paseka, dihuswane le dikgomo, o le felo mo Morena Modimo wa gago a tlogo go kgethela go bea leina la gagwe gona.

3Ka wona monyanya wo o se ke wa ja tše di ometšwego; o je magobe a sa omelwago a mohlaka ka matšatši a šupago; ka gobane kua Egipita o tšwile ka potlako; e be gore ka mehla yohle ya bophelo bja gago o gopole letšatši le o tšwilego Egipita ka lona.

4Ka matšatši a šupago ao go se ke gwa bonwa komelo go wena le go dilete tša geno ka moka. Gomme dinama tše o di hlabago ka tšatši la pele ka mantšiboa di se ke tša lala go fihla ka moswana.

5Paseka o se ke wa e hlaba kgorong e nngwe ya dikgoro tša gago tše Morena Modimo wa gago a tlogo go fa tšona.

6O e hlabe felo moo Morena Modimo wa gago a tlogo go kgethela go bea leina la gagwe gona; e be ka mantšiboa ge letšatši le dikela, e lego lona lebaka le o tšwilego Egipita ka lona.

7O e apee mme o e jele felo moo Morena Modimo wa gago a tlogo ikgethela gona; gomme ka la ka moswana o boele gae.

8Ka matšatši ao a selelago o je magobe a sa omelwago; ka la go šupa go be le phuthego ya Morena Modimo wa gago; o se ke wa ba wa swara modiro.

9Go tloga ka ge o thoma go buna mabele o bale dibeke tše di šupago;

10O tsebo direla Morena Modimo wa gago monyanya wa dibeke, wa ntšhetša Morena dibego tša go ithapa ka mo go lekanego tšhegofatšo ye Morena Modimo wa gago a go neilego yona.

11Mme o thabe pele ga Morena Modimo wa gago o na le barwa ba gago le barwedi ba gago, le balata ba gago ba banna le ba basadi, le Molefi e a lego dikgorong tša geno, le moeng, le sešuana, le mosadi wa mohlologadi e a dutšego ga geno; le thabe le le felo fao Morena a tlogo go kgethela go bea leina la gagwe gona.

12O gopole gobane o kile wa ba mohlanka kua Egipita, mme o hlokomele melao ye, o dire ka yona.

13E re ge o swietše seboa sa gago, o tladitše dinkgo tša gago, gona o itirele monyanya wa mešaša matšatši a šupago.

14Monyanyeng woo wa gago o ithabele o na le morwa wa gago, le morwedi wa gago, le molata wa gago wa monna le wa mosadi, le Molefi, le moeng, le sešuana, le mosadi wa mohlologadi, bona bao ba ba lego dikgorong tša geno.

15O binele Morena Modimo wa gago monyanya wa matšatši a šupago o le felo fao Morena a tlogo go kgetha; ka gobane ke Morena Modimo wa gago e a go šegofatšago dikenyong tša gago ka moka, le medirong ya diatla tša gago, wa fela o ithabela.

16Ka moka ba e lego banna mo go lena ba bonale pele ga Morena gararo ka ngwaga felo moo a tlogo go kgetha gona; ba tle ka monyanya wa magobe a sa omelwago, le ka monyanya wa dibeke, le ka monyanya wa mešaša; fela ba se ke ba bonala pele ga Morena ba sa swara selo.

17Mang le mang a tle a swere neo ya gagwe ka mo tšhegofatšo ya Morena Modimo wa gago e mo neilego ka gona.

18Le ipeele baahlodi le bahlapetši mo metseng ya geno ka moka ye Morena Modimo wa lena a tlogo le nea yona mo le tlogo dula ka meloko ya geno, gore ba ahlolele setšhaba ka kahlolo ya go loka.

19Le se ke la kgopamiša kahlolo, le se ke la beba sefahlogo, le se ke la amogela tsogo-le-kobong; ka gobane tsogo-le-kobong e fahla mahlo a ba bohlale, gomme e phekgola mantšu a ba ba lokilego.

20Le gagamalele go loka sa ruri, gore le phele, gore naga ye Morena Modimo wa lena a le fago yona e be ya lena.

21O se ke wa ba wa tsema kota ya medimo hleng ga aletare ya Morena Modimo wa gago ye o tlogo itirela yona.

22O se ke wa tsema kokwane ye Morena Modimo wa gago a e hloilego.

← Chapter 15 Jump to: Chapter 17 →