Deuteronomy 21

Sotho 1951 (BIBELE)

← Chapter 20 Jump to: Chapter 22 →

1Ge mo nageng ye Morena Modimo wa gago a go fago yona ya ba ya gago, go ka hwetšwa motho e a bolailwego lešokeng, go sa tsebje e a mmolailego,

2bagolo ba geno le baahlodi ba lena ba tšwele ntshe, ba lekanye bogole bja metse e lego kgauswi le felo fao ga setoto.

3Motse wona o lego kgauswi le setoto, bagolo ba wona ba tšee kgomo ya sethole, ye e sešogo ya dirišwa modiro, ye e sešogo ya tlengwa ya goga.

4Bagolo ba motse woo ba tloge le sethole seo, ba se iše nokeng ye e sa pšhego, mo go sa lengwego le mo go sa bjalwego, mme ba se thokge molala gona moo nokeng.

5Bjale go tle baperisita, barwa ba Lefi, gobane ke bona ba Morena Modimo wa lena a ba kgethetšego go mo hlankela, le go šegofatša ka leina la gagwe; gomme ge go ka ba le taba ya phapang le ya ntho, e fetšwa ke molomo wa bona.

6Gomme bagolo ka moka ba motse o lego kgauswi le setoto, ba hlapele diatla setholeng seo se se thokgilwego molala nokeng,

7mme ba bolele ba re: Madi a ga a ka a tšhollwa ke diatla tša rena; mme mahlo a rena ga a ka a bona selo.

8Morena, anke o lebalele setšhaba sa gago sa Isiraele se o se namoletšego; gomme madi a a se nago molato o se ke wa a lata go setšhaba sa gago. Ke mo ba tlogo tšwa molatong wa madi ao.

9Ge le dira ka mokgwa woo e tlo ba go tloša madi a se nago molato mo go lena, ge le dira tše Morena a bonago gore di lokile.

10Ge o tšwile dira, wa lwa le manaba a gago, gomme Morena Modimo wa gago a ba gafela diatleng tša gago, wa boa le mathopša,

11mo go mathopša wa bona mosadi wa sebopego se sebotse, mme wa mo kganyoga, gona o ka mo tšea ya ba mosadi wa gago.

12Mo goroše mo lapeng la gago, a boolwe hlogo, a sete dinala tša gagwe;

13a apole diaparo tša bothopša bja gagwe; a dule lapeng la gago a llele tatagwe le mmagwe a fetše kgwedi, o kgone go mo tšea, wa ba monna wa gagwe, yena a ba mosadi wa gago.

14Ge mohlomongwe o sa hlwe o kgahlwa ke yena, o ka mo lesetša a ya mo a ratago go ya gona. Fela, o se ke wa reka tšhelete ka yena, mme o se ke wa mo dira ka thata, ka gobane o nyaditšwe ke wena.

15Ge monna a na le basadi ba babedi, e mongwe e le mamoratwe, e mongwe e le mamonyadiwe; bobedi bja bona ba mmelegela barwa, gomme morwa wa pele ya ba wa mamonyadiwe,

16mohla a abelago barwa ba gagwe bohwa bja tše a nago le tšona a se ke a re morwa wa pele ke wa mamoratwe, mola wa pele e le wa mamonyadiwe.

17Morwa eo wa mamonyadiwe a mo tsebe e le yena wa pele. Ge a arolela bana ba gagwe bohwa, yena eo a mo nee karolo tše pedi, ka gobane ke yena madi a pele a gagwe; o loketšwe ke tša morwa wa pele.

18Ge motho a na le morwa wa lonya, wa senganga, e a sa kwego ge tatagwe le mmagwe ba mo eletša, mme a gana go laiwa ke bona,

19gona tatagwe le mmagwe ba mo sware, ba mo iše go ba bagolo ba motse wa gabo bona, kgorong ya gabo bona.

20Ba botše bagolo ba motse wa gabo bona ba re: Morwa yo wa rena ke moarogi ke senganga, ga a kwe ge re bolela le yena, ke legwaragwara, ke letagwa.

21Gomme banna ka moka ba motse ba mo thume ka maswika, a hwe. Le fediše bobe ga geno; Baisiraele ka moka ba di kwe mme ba boife.

22Ge motho a na le molato wo o lebanego go bolawa, gona le mmolaye le mo fege kwateng.

23Setoto sa gagwe se se ke sa lala se le lefateng; le se fihle e sa le ka lona letšatši leo; ka gobane e a fegilwego o rogilwe ke Modimo, mme le se ke la tšhilafatša naga ya geno, ye Modimo a le fago yona ya ba magae a lena.

← Chapter 20 Jump to: Chapter 22 →