Deuteronomy 29

Sotho 1951 (BIBELE)

← Chapter 28 Jump to: Chapter 30 →

1Šea mantšu a kgwerano ye Morena a e laetšego Moše a re a e dire le Baisiraele ba le nageng ya Moaba, ka ntle ga kgwerano yela a e dirilego le bona thabeng ya Horebe.

2Moshe o biditše Baisiraele ka moka, a bolela le bona a re: Le di bone tšohle tše Morena a di dirilego le Farao le bahlanka ba gagwe ka moka, le naga ya gagwe ka moka le le ntshe kua Egipita.

3Ke meleko e megolo ye mahlo a lena a e bonego, matete ala le mehlolo e megolo yela.

4Fela, Morena go fihla bjalo ga a ešo a le nea pelo ya go lemoga le mahlo a go bona le ditsebe tša go kwa.

5Gomme nna ke le sepedišitše lešokeng nywaga e masome a mane; mme diaparo tša lena tše le di aperego ga se tša onala, le dieta tša mo dinaong tša lena ga se tša onala.

6Ga se la ja bogobe, ga se la nwa beine, gore le tsebe gobane ke nna Morena Modimo wa lena.

7Ya re ge le fihla mono, la tšwelwa dira ke Sihoni kgoši ya Hesiboni, le Ogo kgoši ya Basani, ba re šwahlela ba lwa le rena, mme ra ba bolaya.

8Ra tšea naga ya bona ra e nea Barubeni gore e be karolo ya bona, le ya Bagada, le ya seripa sa Bamanase.

9Ke gona hlokomelang mantšu a kgwerano ye, le dire ka ona, gore le letlege go tšohle tše le di dirago.

10Lehono le eme pele ga Morena ka moka ga lena, ba e lego balaodi ba meloko ya lena, le bagolo ba lena, le bahlapetši ba lena, banna ka moka ba Isiraele,

11le bana ba lena, le basadi ba lena, le moeng e a lego mešašeng ya lena, le baphaphi ba dikgong, le bagi ba meetse a gago.

12Le eme fa gore le dire kwano le Morena Modimo wa lena, ye a e dirago le lena lehono, e na le dithogo tšela tša gagwe.

13Gore lehono a go bee gore o be setšhaba sa gagwe; yena e be Modimo wa gago bjalo ka ge a go boditše, bjalo ka ge a enetše Aborahama le Isaka le Jakobo.

14Gomme kgwerano ye e nago le dithogo ga ke e dire le lena le nnoši,

15ke e dira le bohle ba ba emego fa pele ga sefahlogo sa Morena Modimo wa rena, mme ke e dira le bao ba se nago le rena mo.

16Gobane lena le a di tseba, tša mola re dutše nageng ya Egipita, le tša mola re putla ditšhaba ka bogare, tšeo re di phatšitšego.

17Le bone makgapa a bona le medimo ya bona ya diswantšho, ya dikwata le ya matlapa, ya silifera le ya gauta, ye ba nago nayo'.

18Go lena go se ke gwa ba le motho yo pelo ya gawe e fularelago Morena Modimo wa lena, e ka ba monna goba mosadi, goba lešika goba leloko; go se ke gwa ba le e a yago a direla medimo yeo, gore mo go lena go se be le modu o tšwago mpholo le tše di galakago.

19Go se be le e a rego ge a kwile mantšu a a dikeno, a ikhomotša ka pelong ya gagwe a re: Nna ke iketla ge ke latela boithatelo bja pelo yaka, gore go kgoblewe tše di nwilego le tše di nyorilwego.

20Yena eo, Morena o tlo gana go mo lebalela; ke yena e a tlo go tukelwa bogale bja Morena le kgalefo ya gagwe; ke yena e a tlo go tlelwa ke dithogo ka moka tše di ngwadilwego mo pukung ye; di tlo mo kgomarela; gomme Morena o tlo fediša leina la gagwe tlase ga legodimo.

21Morena o tlo mo ntšha mo melokong ka moka ya Isiraele, a mo iša bošuleng bjo bo bolelwago ke dithogo tše di ngwadilwego mo pukung ya melao ye.

22Ke mo batlogolo ba bana ba lena, le ba šele ba ba tšwago dinageng tša kgole, ba tlo go botšiša ge ba bona dikotlo tša naga ye le malwetši a yona, ao Morena a tlo go a tliša fa,

23ka mo naga ka moka e lego setseke le letswai le pilo, e sa lengwe, e sa hlogiše lehlogedi, e sa mediše setlang, e le phekgogo ya Sodoma le Gomora, le Adama le Tseboima, metse yela ye Morena a e phekgotšego a befetšwe.

24Ke mo ba ditšhaba ka moka ba tlo go re: Ke ba baka lang ge Morena a dirile naga ye ka mokgwa wo? Kgalefo e kaakaa e tuketše go reng?

25Gwa tlo thwe: Ke ka gobane ba lahlile kgwerano ya Morena Modimo wa botatabo, ye a bego a e dirile le bona mehla yela ge a ba ntšha Egipita,

26ba na ba ya ba direla medimo e šele ba e khunamela, medimo ye ba bego ba sa e tsebe, ye e sa kago ya ba fa selo;

27ke ka baka leo bogale bja Morena bo tuketšego naga ye, a napa a e tlišetša dithogo ka moka tše di ngwadilwego pukung ye.

28Morena o ba gogotše nageng ya bona ka bogale, a befetšwe, a ngadile sa ruri; mme o ba lahletše nageng e šele; ke tšona tša mehla yeno.

29Dihpihlo di go Morena Modimo wa rena; tše di utollotšwego di na le rena le bana ba rena ka mehla le mehla, gore re dire se se bolelwago ke molao wo ka moka.

← Chapter 28 Jump to: Chapter 30 →