Deuteronomy 34

Sotho 1951 (BIBELE)

← Chapter 33 Jump to:

1Bjale Moshe a tloga gona moo molaleng wa Moaba, a namela thaba ya Nebo, sehlweng sa thaba ya Pisiga ye e lebanego le motse wa Jeriko; mme Morena a mmontšha naga ka moka ya Gileada le ya Dani,

2le ya Nafutali ka moka, le ya Efuraimi, le ya Manase, le naga ka moka ya Juda go iša lewatleng la bodikela,

3le naga ya thoko ya borwa, le molala wa legola la Jeriko motse wa melala, go fihla Tsoare.

4Morena a bolela le yena a re: Ke yona naga ye ke e enetšego Aborahama le Isaka le Jakobo, ka re ke tlo e nea bona le bana ba bona; ke go bontšhitše wa e bona ka mahlo; fela, o ka se ke wa tsena go yona.

5Gomme Moshe mohlanka wa Morena a hwela gona moo nageng ya Moaba ka mo Morena a mmoditšego ka gona.

6A mo fihla mo nageng ya Moaba e lebanego le Bethepeoro; fela, lebitla la gagwe le lehono ga le tsebje ke motho.

7Moshe ge a ehwa o be a na le nywaga e lekgolo le masome a mabedi; mme mahlo a gagwe a be a sešo a fifala; le maatla a gagwe a be a sešo a fela.

8Baisiraele ba mo llela gona moo molaleng wa Moaba ba fetša matšatši a masome a mararo; matšatši a go hloboga Moshe a phethega.

9Joshua morwa wa Nuni o be a tletše moya wa bohlale, ka gobane Moshe o be a mmeile diatla; Baisiraele ka moka ba mo kwa, ba dira ka mo Morena a laetšego Moshe.

10Gomme mo go Isiraele ga go a hlwa gwa tsoga moporofeta yo bjalo ka Moshe, yo Morena a mo tsebilego ka go lebanya difahlogo nae,

11le ka matete le mehlolo yohle, ye Morena a mo romilego a e dira nageng ya Egipita go Farao, le go bahlanka ba gagwe bohle, le nageng ya gagwe ka moka,

12le ka seatla se maatla ka moka, le ka ditlaba ka moka tše kgolo, tše Moshe a di dirilego mme tša bonwa ke Baisiraele bohle.

← Chapter 33 Jump to: