Deuteronomy 8

Sotho 1951 (BIBELE)

← Chapter 7 Jump to: Chapter 9 →

1Ditaelo ka moka tše ke le laelago lehono le di hlokomele, le dire ka tšona gore le phele le ate, le tle le tšee naga ye Morena a e enetšego botataweno.

2O se ke wa lebala ditsela ka moka tše Morena Modimo wa gago a go sepedišitšego tšona lešokeng nywaga e masome a mane, gore a go kokobetše, a go leke, go tsebje se se lego pelong ya gago, go tsebje goba o tlo hlokomela ditaelo tša gagwe, goba ge o tlo gana.

3A go kokobetša, a go kwiša tlala, a go leša mana ye o bego o sa e tsebe, ye le botataweno ba bego ba sa e tsebe, gore a go lemoše gore motho ga a phele ka bogobe fela; ka gobane motho o phela ka ohle matšwamolomong wa Morena.

4Diaparo tša gago ga tša ka tša go onalela; le maoto a gago ga a ka a ruruga, gwa ba gwa fela nywaga eo e masome a mane.

5A nke o lemoge ka pelong ya gago gobane Morena o be a go laya bjalo ka motho ge a laya ngwana wa gagwe.

6O hlokomele ditaelo tša Morena Modimo wa gago, gore o sepele ka ditsela tša gagwe, mme o mmoife.

7Ka gobane Morena Modimo wa gago o go iša nageng e botse, ya dinoka le ya meetse, ya methopo le ya didiba, tše di tšwago meeding le dithabeng.

8Ke naga ya mabele le leotša, ya merara le mego, ya marapa le mehlware, le ya dinose.

9Ga se naga ye o tlogo ja bogobe sebotlana go yona; o ka se ke wa hloka selo go yona; ke naga ya matlapa a tshipi; dithabeng tša yona o tlo epa mefiri.

10Ge o ja o khora, o leboge Morena Modimo wa gago ge a go neile naga e botse yeo.

11O itote gore o se lebale Morena Modimo wa gago, wa lesa go hlokomela ditaelo tša gagwe, le melao ya gagwe, ye nna ke go laodišetšago lehono.

12E se re ge o ja o hora, o aga nywako e mebotse wa dula go yona,

13ge dikgomo tša gago le dihuswane tša gago di ata, ge o huma disilifera le digauta, ge go kokotlela tše e lego tša gago,

14ya ba gona pelo ya gago e ikgogomošago, wa lebala Morena Modimo wa gago e a go ntšhitšego nageng ya Egipita ngwakong wa bohlanka,

15e a go sepedišitšego lešokeng le legolo le le šiišago, mo go lego dinoga le diphepheng, mo go omilego go sego meetse, mme a go phulela meetse leswikeng le lethata.

16Gona kua lešokeng a go solela mana ye botataweno ba bego ba sa e tsebe, gore a go kokobetše, a go leke, a kgone go go direla tše botse mehleng e tlago.

17O itote gore pelong ya gago o se ke wa re: Ke maatla a ka a a ntiretšego lehumo le, ke go kgona ga diatla tša ka.

18O gopole Morena Modimo wa gago, gobane ke yena e a go filego maatla a go itirela lehumo, gore go tie kgwerano ye a e enetšego botataweno. Ke tšona tše tša mehla yeno.

19Fela, ge o ka ikgakiša Morena Modimo wa gago, wa latela medimo e šele wa e direla, wa e khunamela, gona ke go botša ka tiiša e sa le lehono ka re: O tlo senyegela ruri.

20O tlo etša ba ditšhaba bao Morena a yogo ba senya ge le fihla; le lena le tlo senyega ka mokgwa woo, ge le sa kwe se Morena Modimo wa lena a se bolelago.

← Chapter 7 Jump to: Chapter 9 →