Deuteronomy 14

Sotho 1951 (BIBELE)

← Chapter 13 Jump to: Chapter 15 →

1Lena le bana ba Morena Modimo wa lena. Le se ke la itlhabela ka legare; le se ke la dira seubu mo phatleng ka baka la mohu.

2Gobane le setšhaba se sekgethwa sa Morena Modimo wa lena Morena o le kgethile mo gare ga ditšhaba ka moka tša lefase, la ba setšhaba, se yena a lego Mong wa sona.

3Le se ke la ja tše makgapha.

4Tše le kago di ja šedi: Ke kgomo, le nku, le pudi,

5le kgama, le tshepe, le phala, le kome, le phuti, le tholo, le letlabo.

6Diphoofolo ka moka tše di pharogilego dihlako tše di pharogilego dihlako tše di otlago, le ka di ja.

7Fela mo go tše di pharogilego dihlako, mme tša otla, le ile kamela, le mmutla, le pela; ka gobane, le ge di otla, dihlako tša tšona ga tša pharoga ruri; le di ile.

8Le ile kolobe, ka gobane le ge e pharogile dihlako, ga e otle; le se ke la ja nama ya yona; le setoto sa yona le se ke la se kgwathiša.

9Go tše di lego meetseng le ka ja tšohle tše di nago le diphego tša go rutha le tša matlagapi.

10Le ile tše di se nago diphego tša go rutha le matlagapi; le se ke la di ja.

11Dinonyana le ka ja tšohle tše di sekilego.

12Le se ke la ja nong, le leaka, le ntšhu,

13le sepekwa, le segotšane le mehuta ya sona,

14le magukubu le mehuta ya ona,

15le mpšhe, le peolane, le tlhapawatle, le mehuta ya bosehlabamaebana,

16le leribiši, le tlobjane, le seroramahlwana,

17le tladi, le sefudi, le mogole,

18le leakabosane, le mehuta ya boletlaka, le lewang, le mankgaganyane.

19Digagabi ka moka tše di fofago le di ile, le se ke la di ja.

20Go tše di fofago ka moka le ka ja tše di sekilego.

21Le se ke la ja nama ya setoto. O ka e nea modiiledi e a lego dikgorong tša geno a e je; goba o ka e rekiša go ba ditšhaba; gobane wena o setšhaba se sekgethwa sa Morena Modimo wa gago; o se ke wa hladia putšane ka lebese la mmayo.

22Mo go dienywa ka moka tša dipeu tša gago, go tše mašemo a gago a di tšweletšago ka ngwaga o mongwe le o mongwe, o ntšhe karolo ya lesome.

23Dikarolo tše lesome tša mabele a gago, le tša mananose a morara wa gago, le tša maitšibulo a dikgomo tša gago le dihuswane tša gago. O di je pele ga Morena Modimo wa gago, felo mo a ikgethetšego go bea leina la gagwe ntshe, gore o ithute go mmoifa ka mehla.

24Ge tsela e ka ba e telele, mme wa šitwa go di iša ntshe, ka ge felo mo Morena Modimo wa gago a ikgethetšego go bea leina la gagwe gona, e le kgole, -- gobane Morena Modimo wa gago o tlo go šegofatša, --

25gona o ntšhe tšhelete, o e sware ka seatla, o ye felo fao Morena Modimo wa gago a go kgethilego,

26o tle o reke tšohle tše pelo ya gago e ratago go di reka, e ka ba kgomo, e ka ba sehuswane, goba beine le seno se bogale, le tšohle tše pelo ya gago e di nyakago; mme o di je o le gona moo pele ga Morena Modimo wa gago o thabe le ba lapa la gago ka moka.

27Le Molefi e a lego dikgorong tša gago o se ke wa mo lebala, ka gobane ga a na karolo ya gagwe mo nageng ya geno.

28Ge go fedile nywaga e meraro o ntšhe karolo ya lesome ya tšohle tše o di bunnego ka ngwago wa boraro, o di kgobelele kgorong;

29go tle Molefi e a se nago karolo mo nageng ya geno, le modiiledi, le sešuana, le mosadi wa mohlologadi; bona bao, e le ba metseng ya geno, ba tle ba je ba khore, gore Morena Modimo wa gago a go šegofatše ka mediro ka moka ya diatla tša gago ye o e dirago.

← Chapter 13 Jump to: Chapter 15 →