Deuteronomy 2

Sotho 1951 (BIBELE)

← Chapter 1 Jump to: Chapter 3 →

1Ra boela morago, ra sepela lešokeng ka tsela ya Lewatle la Mahlaka, ka mo Morena a bego a mpotša ka gona, ra fetša matšatši a mantši re rarela dithaba tša Seire.

2Morena a bolela le nna a re:

3Go lekane bjale; le raretše ka thoko la ba la feta dithaba tše; bjale lebang leboa.

4Laela setšhaba o re: Le yo sela mellwane ya ba geno ba Esau ba ba agilego Seire. Ba tlo le boifa; fela le itoteng ka kudu.

5Le se ke la hlabana le bona, ka gobane mo nageng ya bona nka se ke ka le fa le go lekanago lwao la monna; ka gobane dithaba tša Seire ke di neile Esau gore e be tša gagwe.

6Dijo tše le di jago le di reke ka tšhelete, le meetse le nwe le a rekile ka tšhelete.

7Ka gobane Morena Modimo wa gago o go šegofaditše medirong ka moka ya diatla tša gago; o go tsebile ge o sepela lešokeng lela le legolo. Nywaga e masome a mane e fedile a na nago, wa se ke wa hloka selo.

8Ya re ge re fetile ba gešo ba Esau ba ba agilego Seire re tšwile ka tsela ya molaleng wa Elathe le Etsionegebere, ra boa ra tšea ka tsela ya lešoka la Moaba.

9Morena a bolela le nna a re: O se ke wa rumola Bamoaba, o se ke wa hlabana le bona; ka gobane mo nageng ya bona nka se ke ka go arolela ye e tlogo ba ya gago, ka ge la Ari ke le neile bana ba Loto; ke la bona.

10Kgaleng lona leo le be le dutšwe ke Baemi, setšhaba se segolo se sentši, sa leemo le letelele bjalo ka Baenaki.

11Le bona ba be ba thwe ke ba megwanggwang; Bamoaba ba be ba re ke Baemi.

12Kgaleng mo go la Seire go be go agile le Bahori; ba rakilwe ke bana ba Esau, ba ba fediša ge ba fihla, ba aga maropeng a bona ka mokgwa wo Baisiraele ba dirilego ka wona nageng ye ba e tšerego ya ba ya bona, ye Morena a ba filego yona.

13A re: Bjale tsogang le sele noka ya Saredi. Ke moka ra sela noka ya Saredi.

14Lebaka le re le feditšego re sepela re etšwa Kadese-Barnea go fihla nokeng ya Saredi ke nywaga e masome a mararo le metšo e seswai. Ya ba gona go fedilego bohle ba thaka yela ya banna ba ntwa, ka mo Morena a bego a ba enetše ka gona.

15Ka kgonthe seatla sa Morena se be se elwa le bona, sa ba fediša mo mešašeng, ba ba ba fela.

16Mola go fedile banna bao ba ntwa bohle, ba hwile lešokeng.

17Morena o boletše le nna a re:

18Lehono o yo sela mollwane wa Bamoaba ge o feta Ari.

19Ge o batamela mme wa lebana le Baamoni, o se ke wa ba rumola; o se ke wa hlabana le bona; ka gobane mo nageng ya Baamoni nka se ke ka go arolela ye e tlogo ba ya gago, ka ge ke e neile bana ba Loto gore e be ya bona.

20Le yona yeo e thwe naga ya megwanggwang; ba be ba agile go yona kgaleng. Baamoni ba re ke Basamasumi.

21E be e le setšhaba se segolo se sentši sa leemo le letelele bjalo ka Baenaki. Morena o ba fedišitše ge bona ba fihla, ba ba raka ba dula maropeng a bona.

22Ke tšona a di diretšego bana ba Esau ba ba agilego Seire mola a fediša Bahori, ge ba fihla ba ba raka ba dula maropeng a bona le lehono.

23Le Baafi ba ba bego ba agile Hatserima ba goma ka Gasa, ba fedišitšwe ke Bakafutori ba ba bego ba etšwa Kafutori, ba tla ba dula maropeng a bona.

24Ra thwe tsogang le sepele le sele noka ya Arinoni. Le tsebe gore Sihoni kgoši ya Baamori ya kua Hesiboni ke mo gafetše diatleng tša lena le naga ya gagwe; le e tšeeng e sa le bjale, le lwe ntwa nae.

25Go tloga bjale ke beile tšhogo le poifo godimo ga ditšhaba tše di lego ka tlase ga legodimo ka moka ge di lebana nago; di tlo tlalelwa tša thothomela ge di ekwa tumo ya go re o a tla.

26Re le lešokeng la Kedemothe ka roma batseta ba ya go Sihoni kgoši ya Hesiboni, ba bolela a khutšo ba re:

27Lesa re phatše naga ya gago. Re tlo sepela ka tsela fela; re ka se fapogele thoko ya le letona goba ya la ntsogošo.

28Dijo re tlo ja tše re go rekelago tšona ka tšhelete; le meetse re tlo nwa o re file re a rekile. A nke re fete fela ka dinao.

29A nke o dire se se dirilwego ke bana ba Esau ba ba agilego Seire, le ba Moaba ba ba agilego Ari, re ye re sele noka ya Jorodane, re fihle nageng ye Morena Modimo wa rena a re filego yona.

30Sihoni kgoši ya Hesiboni a gana ge re feta ka gona; ka gobane Morena Modimo wa gago o be a thatafaditše moya wa gagwe, a hlamaladitše pelo ya gagwe, gore a mo gafele seatleng sa gago. Ke tšona tša mehla yeno.

31Morena o mpoditše a re: Tseba gobane ke šetše ke go neile Sihoni le naga ya gagwe; e tšee e be ya gago e sa le bjale.

32Sihoni a tšwa a re šwahlela kua Jahatsa a na le madira a gagwe ka moka.

33Morena Modimo wa rena a mo gafela rena, ra mmolaya, le bana ba gagwe, le madira a gagwe ka moka.

34Mehla yeo re hutše metse ya gagwe ka moka, ra e dira segafiwamoka, banna le basadi le bana, ra se ke ra lesa motho a phonyokga.

35Ra ithopela dikgomo fela le dithebola tša metse ye re e hutšego.

36Go tloga motseng wa Aroere o lego nokeng ya Arinoni, le metse e lego hleng ga noka, go goma ka Gileada ga se gwa šala motse o re paletšego, Tšohle Morena Modimo wa rena o di neile rena.

37Gwa šala naga ya Baamoni; yona ga wa ka wa e fihlela; le naga e šikago le noka ya Jakobo, le metse e lego dithabeng, le gohle mo Morena Modimo wa rena a re ileditšego.

← Chapter 1 Jump to: Chapter 3 →