Deuteronomy 30

Sotho 1951 (BIBELE)

← Chapter 29 Jump to: Chapter 31 →

1E re ge o tlo tlelwa ke tše di boletšwego fa, e ka ba tšhegofatšo goba thogo, tše ke go anegetšego tšona, mme wa di elelwa o le ditšhabeng tše Morena Modimo wa gago a go leleketšego go tšona,

2mme wa boela go Morena Modimo wa gago, wa kwa se a se bolelago, se ke go anegelago sona lehono, mme wa boa ka pelo ka moka le ka moya ka moka, o na le bana ba gago,

3gona Morena Modimo wa gago o tlo go buša bothopja, a go gaugela, a buša a le kgobela mo ditšhabeng tše Morena Modimo wa lena a le tšitlanyeditšego go tšona.

4Le ge balelekwa ba gago ba le kua magomong a legodimo, le gona kua Morena Modimo wa gago o tlo ba tšea a ba kgobela.

5Morena Modimo wa gago o tlo go bušetša mo nageng ye e kilego ya ba ya botatago, gore o e tšee; gomme o tlo go dira gabotse, a go ntšifatša wa fetiša botatago.

6Ke mo Morena Modimo wa gago a tlo go bolotša pelo ya gago le dipelo tša bana ba gago, wa tlo rata Morena Modimo wa gago ka pelo ya gago ka moka le ka moya wa gago ka moka; ya tlo ba gona go phela.

7Ge e le dithogo tšeo ka moka, Morena Modimo wa gago o tlo di bea godimo ga manaba a gago, le godimo ga ba ba go hloilego, ba ba bego ba go hlakiša.

8Gomme wena o tlo boa, wa kwa se Morena Modimo wa gago a se bolelago, wa dira ka ditaelo tša gagwe ka moka tše ke go anegetšego tšona lehono.

9Morena Modimo wa gago o tlo go hlogonolofatša medirong ka moka ya diatla tša gago, dikenyong tša mmele wa gago, dikenyong tša dikgomo tša gago, dikenyong tša naga ya gago; e tlo ba tše botse gobane Morena Modimo wa gago o tlo kgahlwa ke go go setša, bjalo ka ge a kgahlilwe ke botatago.

10Ka gobane o tlo ba o theetša se Morena Modimo wa gago a se bolelago, o hlokomela ditaelo tša gagwe le melao ya gagwe ye e ngwadilwego mo pukung ye ya melao; o tlo ba o boetše go Morena Modimo wa gago ka pelo ka moka le ka moya wa gago ka moka.

11Gobane taelo ye ke go laelago yona lehono ga e go šite, ga e kgole le wena.

12Ga se ya bewa kua legodimong, mo o ka rego: Ke mang e a kago rotogela legodimong a re tlela nayo, a re anegela, ra dira ka yona?

13Le gona ga se ya bewa kua mošola wa lewatle, mo o ka rego: Ke mang e a kago selela mošola wa lewatle, a mpoela le yona, a re anegela ra dira ka yona?

14Lentšu le le fa kgauswi le wena, le mo molomong wa gago le mo pelong ya gago, gore o kgone go dira ka lona.

15Tseba ge, lehono fa pele ga gago ke beile bophelo le tše botse, le lehu le tše mpe.

16Se nna ka go laelago sona lehono sese: Rata Morena Modimo wa gago, o sware ditsela tša gagwe, o hlokomele ditaelo tša gagwe le melao ya gagwe le mekgwa ya gagwe, gore o phele o ntšifale, mme Morena Modimo wa gago a go šegofatše mo nageng yeo o yago go e tšea.

17Fela, ge pelo ya gago e ka fulara, o sa kwe, ge o dumela ge o foraforetšwa wa latela medimo e šele, wa e khunamela, wa e direla,

18gona ke le botša e sa le lehono gore le tlo felela ruri, le ka se ke la lelefalelwa ke matšatši le le nageng yeo le yago go e tšea ge le sela noka ya Jorodane.

19Lehono legodimo le lefase ke dihlatse tša ka ge ke beile bophelo le lehu, le tšhegofatšo le thogo, pele ga lena. Hle ikgetheleng bophelo gore le phele, lena le bana ba lena,

20le le ba ba ratago Morena Modimo wa lena, le ekwa se a se bolelago, le mo gomaretše; Ka gobane go phela ga gago le go atelwa ke matšatši di na le yena; le ge o tlo dula mo nageng ye Morena Modimo wa gago a e enetšego botatago Aborahama, le Isaka le Jakobo a re o tlo ba nea yona, di na le yena.

← Chapter 29 Jump to: Chapter 31 →