Deuteronomy 26

Sotho 1951 (BIBELE)

← Chapter 25 Jump to: Chapter 27 →

1E re ge o tsene mo nageng ye Morena Modimo wa gago a go fago yona gore e be magae a lena, mme o šetše o dutše go yona,

2o tšee dithakangwaga tša dienywa ka moka tša naga, tše o tlogo di ntšha nageng ya gago, o neilwe ke Morena Modimo wa gago, o di nokele serotong mme o ye felo mo Morena Modimo wa gago a tlogo go kgethela go bea leina la gagwe gona.

3O tle go moperisita e a tlogo ba gona mohla woo, o mmotše o re: Lehono ke begela Morena Modimo wa ka gore ke fihlile mo nageng ye Morena a enetšego botatawešo a re o tlo ba fa yona.

4Moperisita o tlo amogela seroto seo a se bea fase pele ga aletare ya Morena Modimo wa gago.

5Ke mo o tlogo rapela Morena Modimo wa gago wa re: Tatawešo e be e le Mosiria wa moputlaputli, a fologela Egipita, a diilela gona a na le batho ba sego nene, a ba setšhaba se segolo gona kua, se se maatla se sentši.

6Baegipita ba re dira bošula, ba re tlaiša, ba re rweša bohlanka bjo bothata.

7Rena ra hlabela Morena Modimo wa botatawešo mokgoši; Morena a kwa ge re goeletša, a bona mahloko a rena, le mohlako wa rena, le go patikega ga rena.

8Morena a re ntšha Egipita ka seatla se maatla, a emišitse letsogo la gagwe, ka tše kgolo tše di boifišago, le ka matete le mehlolo.

9A ba a re fihliša felo fa, a re fa naga ye e elago mawsi le nose.

10Bjalo šedi! Ke tliša dithakangwaga tša dikenyo tša naga ye o mphilego yona, wena Morena. O realo o di beile fase pele ga Morena Modimo wa gago; mme o lotšhe Morena Modimo wa gago.

11O kgone go thabela tše botse ka moka tše Morena Modimo wa gago a go filego tšona, o na le ba lapa la gago, le Molefi, le modiiledi e a lego ga geno.

12E re ge o phethile go ntšha karolo ya lesome ya dikenyo tša gago ka moka ka ngwaga wa boraro, e lego wona ngwaga wa tša lesome, o file Molefi le modiidi le sešuana le mosadi wa moholologadi, ba lle ba le dikgorong tša geno ba khoše,

13gona o rapele Morena Modimo wa gago, o re: Tše kgethwa ke di ntšhitše lapeng ka di neela Molefi, le modiildi, le sešuana, le mosadi wa mohlologadi ka mo o ntaetšego ka gona. Ga go na taelo ye ke e fetilego le ye ke e lebetšego.

14Ga nka ka ja selo mohla wa manyami; ga nka ka swara selo mohla ke na le seila; ga nka ka iša selo go badimo. Ke theeditše se Morena Modimo wa ka a mpoditšego sona; ke dirile ka mo a ntaetšego ka gona.

15Anke o mpone hle, o le bodulong bjo bokgethwa bja gago legodimong, gomme o šegofatše setšhaba sa gago sa Isiraele, le naga ye o re filego yona, bjalo ka ge o enetše botatawešo, naga e elago maswi le nose.

16Lehono le Morena Modimo wa gago o go laela go dira ka melao ye le ka mokgwa wo, gore o di hlokomele o dire ka tšona ka pelo ka moka le ka moya ka moka.

17Lehono o boletše wa re: Morena ke yena Modimo wa gago, wa re o tlo swara ka tsela ya gagwe, wa kwa se a se bolelago.

18Lehono Morena o re o botšwe gore o setšhaba sa gagwe se se mo enago hlogo ka mo a go boditšego ka gona, gore o hlokomele ditaelo tša gagwe ka moka,

19gore a go hlaole mo go ditšhaba ka moka tše a di dirilego, o retwe, o tsebje, o godišwe, o be setšhaba se sekgethwa sa Morena Modimo wa gago, ka mo a boletšego ka gona.

← Chapter 25 Jump to: Chapter 27 →