Deuteronomy 17

Sotho 1951 (BIBELE)

← Chapter 16 Jump to: Chapter 18 →

1Morena Modimo wa gago o se ke wa mo hlabela pholo le ge e le nku e nago le bosodi le ge e le sekgopi; ka gobane tše bjalo Morena Modimo wa gago o bona e le makgapha.

2Ge mo motseng o mongwe wa geno, wa naga ye Morena Modimo wa lena a tlogo le nea yona, go ka hwetšwa monna goba mosadi e a dirago tše Morena a bonago e le tše mpe, a senya kgwerano ya Morena,

3mme a ya a direla medimo e šele, a e khunamela, e ka ba letšatši, goba kgwedi, goba makoko ka moka a legodimo, a dira tše nna ke sa kago ka go laela tšona,

4gomme wa sebelwa, wa di kwa, wa di latiša, wa hwetša e le therešo, taba e tiile, go dirilwe makgapha a mabjalo mo go Isiraele,

5gona monna eo, goba mosadi eo, e a dirilego tšeo, le mo ntšhetše ntle ga dikgoro tša geno, mme a thungwe ka matlapa a hwe.

6E a swanetšwego ke lehu a bolawe ka molomo wa dihlatse tše pedi le ge e le tše tharo; a se ke a bolawa ka molomo wa hlatse e tee.

7A thongwe ke diatla tša dihlatse ge a bolawa, go tsebo tla diatla tša setšhaba ka moka; bobe o bo fediše ga geno.

8Ge go ka ba le taba ye e le palelago, e ka ba ya madi, e ka ba molato, e ka ba ya ntho, taba ya kgang mo dileteng tša geno, gona le tsoge le rotogele felo moo Morena Modimo wa lena a tlogo ikgethela gona.

9Le tle go baperisita le Balefi le go baahlodi ba mohla woo, le ba botšiše; gomme bona ba tlo le botša phetšo ya kahlolo.

10Se ba tlogo le botša sona felo fao Morena a tlogo go kgetha, le se dire; le fele le hlokomele tše ba le rutago tšona, le dire tšona.

11Le dire ka molao wo ba le rutago wona, le ka kahlolo ye ba le botšago yona. Lentšu le ba tlogo le tsebiša lona le se ke la le fapoga la ya go le letona le ge e le go la ntsogošo.

12Ge motho a ka dira ka bonganga, a gana go kwa moperisita, e a emego moo a le mohlanka wa Morena Modimo wa gago, goba moahlodi, monna e mobjalo a bolawe; bobe le bo fediše mo go Isiraele.

13Setšhaba ka moka se kwe se boife; go se ke gwa ba le e a dirago ka bonganga.

14Mehleng ya ge o tlo ba o tsene nageng ye Morena Modimo wa gago a go fago yona ya ba ya gago, ge o dutše go yona, mme wa re: Ke tlo ipeela kgoši bjalo ka ditšhaba tše di ntikologilego,

15gore o ipeele kgoši ye Morena Modimo wa gago a tlogo e kgetha. E be e mongwe wa bana beno; o se ke wa bea monna wa mohuta o šele, e sego wa geno.

16A se ke a ba le dipitsi tše ntši. A se ke a gomišetša setšhaba kua Egipita ka baka la go ntšifatša dipitsi; ka gobane Morena o le boditše a re: Le se ke la ba la boela ka tsela yeo.

17Le gona a se ke a tšea basadi ba bantši, gore pelo ya gagwe e se aroge. A se ke a ikgobelela disilifera le digauta tše ntši.

18Ge a dutše sedulong sa bogoši bja gagwe, a ingwalele lengwalo la tše di ngwadilwego mo lengwalong le lego pele ga baperisita le Balefi,

19a be nalo, a le bale ka mehla ka moka ya bophelo bja gagwe, gore a ithute go boifa Morena Modimo wa gagwe, a hlokomele tše di bolelwago ke molao woo le ditaelo tšeo, a dire ka tšona,

20gore a se ke a ikgodiša mo go bana babo, a se ke a aroga ditaelo a ya go le letona goba go la ntsogošo, gore a phele galelele a na le bana ba gagwe mo bogošing bja gagwe setšhabeng sa Isiraele.

← Chapter 16 Jump to: Chapter 18 →