Deuteronomy 12

Sotho 1951 (BIBELE)

← Chapter 11 Jump to: Chapter 13 →

1Se melao le mekgwa ye le swanetšego go e hlokomela le go dira ka yona le le kua nageng ye Morena Modimo wa botataweno a le neilego yona gore le e tšee; ke ya mehla ka moka le phela lefaseng leo.

2Madulo ka moka a ditšhaba tšeo le tlogo di raka, mo di direlago medimo ya tšona, mo dithabeng tše telele, le mo mebotong, le mo meriting ya dihlare tše tala ka moka, le a senyetšeng ruri.

3Le phušule dialetare tša bona, le robaganye dikokwane tša bona, meremedimo ya bona le e fiše, diswantšho tša medimo ya bona le di phšatlaganye, le fediše maina a yona felo fao.

4Morena Modimo wa lena le se ke la mo direla ka mokgwa woo.

5Le mo nyake felo mo yena Morena Modimo wa lena a tlogo go kgetha, a bea leina la gagwe ntshe mo gare ga meloko ya gabolena ka moka; le tle gona moo.

6Gona moo le tliše dihlabelo tša lena, le didimo tša lena, le karolo ya lesome, le dibego tše le di swerego, le tša dikeno le tša go ithapa, le maitšibulo a dikgomo le a dihuswane tša lena.

7Gona moo pele ga Morena Modimo wa lena le je le thabe le ba malapeng a lena ka tšohle tše le di ruilego ka mediro ya lena, tše Morena Modimo wa lena a le šegofaditšego ka tšona.

8Le se ke la hlwa le dira ka mokgwa wo re dirilego ka wona go fihla bjale, mo motho a bego a dira tšohle ka mo a rego go lokile.

9Ka gobane le be le sešo la goroga makhutšong ao Morena Modimo wa lena a tlogo le nea ona.

10Le sa tlo sela noka ya Jorodane; ke mo le tlogo dula nageng ye Morena Modimo wa lena a tlogo le nea yona ya ba ya lena; o tlo le khutšiša manaba a lena thoko tšohle, la dula le iketlile.

11Ke mo go tlogo ba le felo mo Morena Modimo wa lena a tlogo go kgethela go bea leina le gagwe gona; gona moo le tlo tliša tšohle tše ke le laetšego tšona, dihlabelo tša lena, le didimo tša lena, le dikarolo tša lesome, le dibego tše le di swerego, le dineo tše le di hlaolelago Morena ka dikeno.

12Ke moo le tlogo thaba pele ga Morena Modimo wa lena le na le barwa ba lena le barwedi ba lena, le balata ba lena ba banna le ba basadi, le Molefi e a dulago motseng wa gabolena. Ka gobane Molefi ga a na gagabo bona bjalo ka lena.

13O itote gore o se ke wa fo fiša dihlabelo tša gago felo mo o go ratago.

14Felo mo o tlogo fiša dihlabelo tša gago e tlo ba mo Morena Modimo wa gago a tlogo go kgetha mo go o mongwe wa meloko ya geno; ke gona moo le tlogo dira tšohle tše ke le laetšego tšona.

15O ka hlaba wa ja nama ka mo pelo ya gago e ratago ka gona, mo tšhegofatšo ya Morena Modimo wa gago e go neago nama metseng ya gago ya lewa ke e a sa sekegago le e a sekilego, bjalo ka tshepe le kgama.

16Fela madi le se ke la a ja; le a tšholleng fase bjalo ka meetse.

17Mo metseng ya lena le se ke la ja tša karolo ya lesome ya mabele a gago le ya morara le ya mehlware ya gago, goba tša maitšibulo a dikgomo tša gago le a dihuswane tša gago, goba tša keno ye o e ennego, goba tša go ithapa, le ge e le sebego sa seatla sa gago.

18Tšeo o di je pele ga Morena Modimo wa gago felo mo Morena Modimo wa gago a tlogo ikgethela gona; o di je o na le barwa ba gago le barwedi ba gago, le balata ba gago ba banna le ba basadi, le Molefi e a lego motseng wa geno; gomme o thabe pele ga Morena Modimo wa gago ka tšohle tše o di ruilego ka diatla tša gago.

19O itote gore o se ke wa ba wa lahla Molefi o le kua nageng ya geno.

20E tlo re ge Morena Modimo wa gago a katološa mellwane ya gago, bjalo ka ge a go boditše, mme wa re a nke ke je nama -- ka gobane pelo ya gago e rata nama -- gona o ka ja nama ka mo pelo ya gago e ratago ka gona.

21Ge felo mo Morena Modimo wa gago a go kgethetšego go bea leina la gagwe ntšhe e le kgole, gona o ka hlaba kgomo tša gago le dihuswane tša gago tše Morena Modimo wa gago a go neago tšona, bjalo ka ge a go laetše, wa di ja ka go ithatela ga gago, mo dikgorong tša gago.

22Fela, o di je ka mokgwa wo go lewago tshepe le ge e le kgama ka gona; di lewe ke bohle, e a sa sekegago le e a sekilego.

23Se o swanetšego go se tiiša ke go se je madi, ka gobane madi ke bjona bophelo; gomme o se ke wa ja bophelo ge o eja nama.

24O se ke wa a ja; o a tšhele fase bjalo ka meetse.

25O se ke wa a ja, gore o letlege o na le bana ba gago ba mehla e tlago, ge o dira se Morena a bonago se lokile.

26Ge e le tše kgethwa tša gago, tše di lego mo go wena, le tša dikeno tša gago, o di tšee o di iše felo fao Morena a tlogo go kgetha.

27Dihlabelo tša gago tša nama le tša madi o di lokiše aletareng ya Morena Modimo wa gago. Madi a sedimo sa gago a tšhelwe godimo ga aletare ya Morena Modima wa gago; dinama tšona o di je.

28O hlokomele gore o kwišiše mantšu ka moka a ke go laelago ona, gore o letlege o na le bana ba gago ba ba tlogo ba gona ka mehla le mehla, ge o dira tše Morena Modimo wa gago a bonago e le tše botse le tše di lokilego.

29E tlo re ge Morena Modimo wa gago a fedišitše ditšhaba ge o fihla, ditšhaba tše o yago go di raka, wa re go di raka wa tseba go dula nageng ya tšona.

30O itote gore o se ke wa tangwa wa latela bona bao ba ba fedišitšwego ge o fihla. O itote gore o se ke wa nyaka tša medimo ya bona, wa re o direle medimo ya bona bjalo ka ge bona ba e diretše.

31Morena Modimo wa gago o se ke wa mo dira tše bjalo; ka gobane ba diretše medimo ya bona ka tše e lego makgapha, tše Morena a di hloilego; ešita le barwa ba bona le barwedi ba bona ba ba fišeditše medimo ya bona.

32Le hlokomeleng mantšu ka moka a ke le laetšego ona; le se ke la eketša, le se ke la fokotša.

← Chapter 11 Jump to: Chapter 13 →