Deuteronomy 19

Sotho 1951 (BIBELE)

← Chapter 18 Jump to: Chapter 20 →

1E re ge Morena Modimo wa gago a fedišitše ditšhaba tše a go fago naga ya tšona, wa e tšea wa dula metseng ya tšona le mo nywakong ya tšona,

2gona o itlhaolele metse e meraro e lego mo gare nageng yeo Morena Modimo wa gago a go fago yona ya ba ya gago.

3O itirele ditsela, gomme naga ye Morena Modimo wa gago a go fago yona ya ba legae la gago, o e arole diripa tše tharo; e be gore e a bolailego motho a be le mo a kago tšhabela gona.

4Melao ye e lebanego mmolai e a tlogo tšhabela gona, a phela, še: E a bolaile go wa gabo a sa kago a dira ka boomo, a sa ka a mo hloya maabane le maloba,

5yo a rego ge a ile sethokgweng go rema dihlare a na le wa gabo, a re go akga mabogo a swere selepe a rema, selepe sa khwamoga sa rema wa gabo a hwa, motho eo a tšhabela go o mongwe wa metse yeo a phele;

6gore molefetšamadi a se mo hlomarele pelo ya gagwe e sa tuka bogale, gomme a mo swara ka ge tsela e le e telele, a mmolaya, mola a sa swanelwa ke lehu, ka gobane a sa ka a hloya wa gabo maabane le maloba.

7Ke ka baka leo ke go laelago gore o itlhaolele metse e meraro.

8Gomme ge Morena Modimo wa gago a tlo ba a katološitše mellwane ya gago bjalo ka ge a enetše botatago, mme a go nea naga ka moka ye a boditšego botatago a re o tlo ba nea yona.

9A dira bjalo ge o hlokomela ditaelo ka moka tše ke go laelago tšona lehono, ge o dira ka tšona, ge o rata Morena Modimo wa gago, wa swara ditsela tša gagwe, -- gona o hlaole metse e mengwe e meraro gape.

10Gore mo nageng ya geno ye Morena Modimo wa gago a go fago yona ya ba magae a gago, go se tšhollwe madi go se molato wa madi.

11Fela, ge motho a hloile wa gabo, a mo lalela, a mmolaya a hwa, motho e mobjalo ge a ka tšhabela go o mongwe wa metse yeo,

12gona bagolo ba motse wa gabo ba rome motho a mo tšee, gore ba mo gafele seatleng sa molefetšamadi, mme a bolawe.

13Leihlo la gago le se ke la mo hlomogela; madi a e a se nago molato o a tloše mo go Isiraele, gore o be le mahlatse.

14O se ke wa šuthiša mollwane wa wa geno wo o beilwego ke ba bogologolo mo nageng ya geno, ye le tlogo dula go yona lefaseng le Morena Modimo wa lena a le fago lona gore e be la lena.

15Ge go sekišwa motho ka baka la molato goba sebe, go se ke gwa ema hlatse e tee fela ya mmega ka sebe sa gore le sa gore. Taba a e eme ka melomo ya dihlatse tše pedi le ge e le tše tharo.

16Ge go ka tsoga hlatse ya leswenya ya bega motho,

17gona banna ba babedi bao ba ba sekišanago ba tle ba eme pele ga Morena, le pele ga baperisita, le pele ga baahlodi ba mohla woo.

18Baahlodi ba nyakišiše gabotse; gomme ge ba ka hwetša hlatse eo e le hlatse ya maaka, e begile ngwanabo ka maaka,

19gona le mo dire se a gopotšego gore se dirwe ngwanabo. Le tloše sebe ga geno.

20Ba bangwe ba tlo di kwa, ba boifa, gwa se ke gwa boeletšwa taba e mpe ya mohuta woo ga geno.

21Leihlo la gago le se ke la mo hlomogela; bophelo bo lefše ka bophelo, leihlo ka leihlo, leino ka leino, seatla ka seatla, leoto ka leoto.

← Chapter 18 Jump to: Chapter 20 →