Deuteronomy 24

Sotho 1951 (BIBELE)

← Chapter 23 Jump to: Chapter 25 →

1Ge monna a tšere mosadi e le mogatšagwe, mme mosadi yoo a sa mo kgahle, ka ge a hweditše sekgopi go yena, gona monna a mo ngwalele lengwalo la tlhalo, a mo neele lona, a mo lese a tšwe lapeng la gagwe.

2Bjalo ge a tlogile mo lapeng a sepetše, mme a tšewa ke monna e mongwe,

3gomme le monna wa bobedi a mo nyatša, a mo ngwalela lengwalo la tlhalo, a mo neela, a mo lesa a tloga lapeng, goba monna eo wa bobedi e a mo tšerego ge a ka hwa,

4gona monna yola wa pele e a mo hladilego, a se ke a hlwa a mo tšea, ka gobane o tšhilafetše. Tše bjalo e ka ba makgapha pele ga Morena. Naga ye Morena Modimo wa gago a go fago yona gore e be magae a gago o se ke wa e obela molato.

5Ge monna a sa tšo tšea mosadi a se ke a tšwa dira, a se ke a išwa bothokgong, a se ke a ba le se se mo tlemago; a fetše ngwaga a le lapeng la gagwe a thabišana le mosadi wa gagwe yo a mo tšerego.

6O se ke wa swarelela motho ka tšhilo ya gagwe wa mo amoga yona, ka gobane o tlo mo amoga tše a phelago ka tšona.

7Ge motho a ka hwetšwa a thopile e mongwe wa bana babo wa Moisiraele, a mo dira ka sehlogo, a mo rekiša, monna eo wa lehodu a bolawe. O fediše bobe ga geno.

8O hlokomele sešo sa lephera. O tiiše go hlokomela le go dira tšohle tše baperisita ba Balefi ba go rutago tšona. Le hlokomele gore le dire tše ke ba laetšego tšona.

9Le gopole se Morena Modimo wa lena a se dirilego Miryama kua tseleng mola le etšwa Egipita.

10Ge o adimile ngwaneno selo, o se ke wa tsena ngwakong wa gagwe wa tšea sa go mo swarelela ka sona.

11O eme ntle o lese monna eo o mo adimilego a go ntšhetše se o tlogo mo swarelela ka sona.

12Ge monna eo e ka ba mohumanegi, o se ke wa lala o mo swareletše.

13Ge le dikela o mmušetše se o mo swareletšego ka sona, gore a robale ka kobong ya gagwe, mme a go šegofatše. Le Morena Modimo wa gago o tlo bona gobane o dirile se se lokilego.

14O se ke wa pata mohlanka wa modiitšana, wa mohumanegi, e ka ba wa geno, goba o šele a diiletšego ga gago nageng ya geno le metseng ya geno.

15O mo nee moputso wa gawe ka letšatši la gagwe, le sešo la dikela, gobane ke mohumanegi: pelo ya gagwe e letetše moputso; e se re mohlomongwe a go bega go Morena, mme wa tsena molatong.

16Botatago bana ba se ke ba bolawa bakeng sa bana ba bona; le bana ba bona ba se ke ba bolawa bakeng sa botatabo; e a bolawago a bolawe ka baka la sebe sa gagwe.

17Taba e lokilego ya moeng goba ya sešuana o se ke wa e kgopamiša; mosadi wa mohlologadi o se ke wa mo swarelela ka kobo ya gagwe.

18O gopole tša mola o le mohlanka kua Egipita, Morena Modimo wa gago a go namolela; ke ka baka leo a go laelago go dira ka mokgwa wo.

19Ge o bunne tšhemo ya gago, wa lebala ngata tšhemong, o se ke wa boela go e tšea; a e tšewe ke moeng, goba sešuana, goba mosadi wa mohlologadi, gore Morena Modimo wa gago a go šegofatše medirong ka moka ya diatla tša gago.

20Ge o futše mohlware wa gago, o se ke wa o kgobiša; mašaledi a a tšewe ke moeng, goba sešuana, goba mosadi wa mohlologadi.

21Ge o futše dienywa tša morara wa gago, o se ke wa budutša; o šiele moeng, goba sešuana, goba mosadi wa mohlologadi.

22O gopole tša mola o le mohlanka nageng ya Egipita; ke ka baka leo ke go laelago go dira ka mokgwa wo.

← Chapter 23 Jump to: Chapter 25 →