Deuteronomy 6

Sotho 1951 (BIBELE)

← Chapter 5 Jump to: Chapter 7 →

1Šedi ditaelo le melao le mekgwa ye Morena Modimo wa lena a le laetšego yona, gore le ithute yona, le dire ka yona le kua nageng ye le yago go e tšea,

2gore o boife Morena Modimo wa gago, o hlokomele molao wa gagwe le ditaelo tša gagwe ka moka tše ke go laetšego tšona, le bana ba gago, le bana ba bana ba gago ka mehla yohle ya go phela ga gago, gore matšatši a gago e be a mantši.

3Theetša, Isiraele! O bone gore o dire tše di tlogo go tlišetša tše botse, wa tlo ata gagolo mo lefaseng ka mo Morena Modimo wa botataweno a go boditšego ka gona a re: Ke naga e elago maswi le nose.

4Theetša, Isiraele! Morena Modimo wa rena ke Morena a nnoši.

5Morena Modimo wa gago o mo rate ka pelo ya gago ka moka, le ka moya wa gago ka moka, le ka maatla a gago ka moka.

6Mantšu a ke go laetšago lehono a a dule a le pelong ya gago.

7O a tiišetše bana ba gago; o bolele ona o dutše ngwakong wa gago, le ge o le tseleng, ge o yo robala le ge o tsoga.

8O a tlemelele seatleng sa gago e be seka, e be mofapahlogo mo phatleng ya gago.

9O a ngwale dijakwaneng tša ngwako wa gago, le mo magorong a gago.

10E tlo re ge Morena Modimo wa gago a go fihlišitše nageng ye a e enetšego botataweno Aborahama le Isaka le Jakobo, a go nea metse e megolo ye o sa kago wa e aga,

11le nywako e tletšego menono ka moka ye e sa kago ya kgobelwa ke wena, le didiba tše di epilwego di sa kago tša epiwa ke wena, e tlo re ge o lle o hoše,

12e be gona o itotago gore o se lebale Morena e a go ntšhitšego nageng ya Egipita ngwakong wa bohlanka.

13O boife Morena Modimo wa gago, o direle yena, mme le ene ka leina la gagwe.

14Le se ke la latela modimo o šele wa medimo ya ditšhaba tše le neanago mellwane le tšona.

15Ka gobane Morena Modimo wa lena ke Modimo yo bogale, mme o mo gare ga lena; gomme kgalefo ya Morena Modimo wa lena e ka le tukela ya le fediša mo lefaseng.

16Morena Modimo wa lena le se ke la mo leka bjalo ka ge le kile la mo leka kua Masa.

17Le tiiše go hlokomela ditaelo tša Morena Modimo wa lena, le kgwerano ya gagwe, le melao ya gagwe ye a le laetšego yona.

18O dire tše di lokilego, tše di kgahlago Morena; ke mo o tlogo ba le mahlatse, wa tlo fihla wa tšea naga e botse yeo Morena a e enetšego botataweno;

19wa tlo raka manaba a gago ka moka ge o fihla, bjalo ka ge Morena a boletše.

20Ge mehleng e tlago bana ba gago ba ka go botšiša ba re: Kgwerano ye, le melao ye, le mekgwa ye Morena Modimo wa rena a e laetšego ke ya go reng?

21O laodišetše ngwana wa gago o re: Re be re le bahlanka ba Farao kua Egipita; mme Morena o re ntšhitše Egipita ka seatla se maatla.

22Morena o dirile matete le mehlolo e megolo e mešoro kua Egipita go Farao le go ba moloko wa gagwe, rena re lebeletše.

23Rena a re ntšha gona moo, a re tliša fa, a re fa naga ye a e enetšego botatawešo.

24Ke yena Morena e a re laetšego a re re dire ka yona melao ye ka moka, a re re boife Morena Modimo wa rena, gore re be le mahlatse ka mehla, gore a re phediše; le lehono go sa le bjalo.

25E tlo ba gona go loka ga rena, ge re hlokomela ditaelo tšeo ka moka ra dira ka tšona pele ga Morena Modimo wa rena ka mo a re laetšego ka gona.

← Chapter 5 Jump to: Chapter 7 →