Deuteronomy 5

Sotho 1951 (BIBELE)

← Chapter 4 Jump to: Chapter 6 →

1Gomme Moshe a bitša Baisiraele ka moka a bolela le bona a re: Isiraele, theetša melao le mekgwa ye nna ke e bolelago ditsebeng tša lena lehono; le ithuteng yona; le e hlokomeleng gore le dire ka mo e bolelago ka gona.

2Morena Modimo wa lena o dirile kgwerano le rena kua thabeng ya Horebe.

3Kgwerano yeo ga a ka a e dira le botatawešo; o e dirile le rena ba re sa lego gona lehono re sa phela ka moka ga rena.

4Morena o boletše le lena difahlogo di lebane a le thabeng gare ga mollo.

5Mohla woo nna ke be ke eme gare ga lena le Morena, gore ke le botše se Morena a se bolelago, ka gobane le be le boifa mollo, la se ke la rotogela thabeng. Morena a re:

6Ke nna Morena Modimo wa gago, e a go ntšhišego nageng ya Egipita ngwakong wa bohlanka.

7Ke se ke ka bona o na le medimo e šele.

8O se ke wa itirela modimo wa go betlwa, le ge e le seswantšho se sengwe sa tše di lego kua legodimong, le ge e le sa tše di lego mono lefaseng, le sa tše di lego meetseng ka tlase ga lefase.

9O se ke wa di khunamela; o se ke wa di direla; ka gobane nna Morena Modimo wa gago ke Modimo yo bogale, e a latago bokgopo bja botatagobana go bana ba bona go fihla molokong wa boraro le wa bone mo go ba ba ntlhoilego.

10Gomme ge e le ba ba nthatago, ba ba hlokomelago melao ya ka, ke ba dira ka botho go iša melokong e sekete.

11O se ke wa bolela leina le Morena Modimo wa gago ka lefela, ka gobane e a bolelago leina la gagwe ka lefela Morena a ka se ke a mo lesa a sa otlwe.

12O hlokomele letšatši la go khutša, o le kgethe, ka mokgwa wo Morena Modimo wa gago a go laetšego ka gona.

13O sware mediro ka matšatši a selelago, o phethe mešomo ya gago ka moka.

14Ge e le letšatši la go šupa ke la go khutša, ke la Morena Modimo wa gago. Ka lona o se ke wa swara modiro le o tee, le ge e ka ba wena, goba morwa wa gago, goba morwedi wa gago, goba molata wa gago wa monna le ge e le wa mosadi, le pholo ya gago, le diruiwa tša gago ka moka, le modiiledi e a lego dikgorong tša geno, gore molata wa gago wa monna le wa mosadi ba khutše bjalo ka wena.

15O se lebale gobane o be o le mohlanka kua nageng ya Egipita; mme Morena Modimo wa gago a go ntšha ka seatla se maatla le ka letsogo le le emišitšwego. Ke ka baka leo Morena Modimo wa gago a go laetšego go hlokomela letšatši la go khutša.

16Godiša tatago le mmago, bjalo ka ge Morena Modimo wa gago, a go laetše, gore o phele galelele, o be le mahlatse nageng ye Morena Modimo wa gago a go fago yona.

17O se ke wa bolaya.

18O se ke wa otswa.

19O se ke wa utswa.

20O se ke wa bolela bohlatse bja lefela go wa geno.

21O se ke wa duma mosadi wa wa geno. O se ke wa kganyoga ngwako wa wa geno, le ge e le tšhemo ya gagwe, le ge e le molata wa gagwe wa monna goba wa mosadi, le ge e le pholo ya gagwe, le ge e le pokolo ya gagwe, le tšohle tše e lego tša wa geno.

22Ke ona mantšu a Morena a a boletšego le phuthego a le thabeng gare ga mollo, le lerung, le bosong, ka lentšu le legolo, a se ke a eketša ka le lengwe; a a ngwala maatlapeng a mabedi a nneela.

23Gomme lena, ge le ekwa lentšu le legolo le etšwa leswiswing, le bona thaba e tuka mollo, la tla go nna, balaodi ba meloko ya lena le bagolo ba lena,

24la re: Morena Modimo wa rena bjale o re bontšhitše letago la gagwe le bogolo bja gagwe, a re kwiša lentšu la gagwe a le mollong; lehono ke gona ge re bone ge Modimo a bolela le motho mme motho a šala a phela.

25Bjale gomme re sa hwelang, gobane mollo o mogolo woo o ka re fiša; ge rena re hlwa re ekwa lentšu la Morena Modimo wa rena, re ka hwa.

26Ka gobane mo go batho ka moka ga go na motho e a kago phela a kwile lentšu la Modimo e a phelago le bolela le etšwa gare ga mollo, bjalo ka ge rena re le kwile.

27A go batamele wena, o kwe tšohle tše Morena Modimo wa rena a di bolelago; gomme e be wena e a tlogo anegela rena tšohle tše Morena Modimo wa rena a go botšago tšona. Re tlo theetša, ra di dira.

28Ya re ge Morena a ekwa le hlaboša mantšu la realo le bolela le nna, a nthera a re: Mantšu ao setšhaba se bego se go goeletša ona, ke a kwile; tšohle tše ba go boditšego tšona ke tše botse.

29A dipelo tša bona e ka be e le tše bjalo ka mehla, ba mpoifa, ba hlokomela ditaelo tša ka ka moka; ke mo ba ka bego ba dula ba thabile, bona le bana ba bona neng le neng.

30Bjale sepela o ba botše o re ba boele mešašeng ya bona.

31Gomme wena o tlo šala fa o eme hleng ga ka, gore ke go botše ditaelo tša ka ka moka, le melao le mekgwa ye o tlogo ba ruta yona, gore ba dire ka yona kua nageng ye ke tlogo ba fa yona, ya ba ya bona.

32Hlokomelang gee, gore le dire ka mo Morena Modimo wa lena a le laetšego ka gona, gomme le se ke la arogela go le letona le ge e le go la ntsogošo.

33Tsela le sware yona yeò fela ye Morena Modimo wa lena a le laetšego yona; ke mo le tlogo phela, la ba le mahlatse; ke mo matšatši a lena a tlogo ba a mantši le dutše nageng ye le yago go e tšea.

← Chapter 4 Jump to: Chapter 6 →