2 Kings 10

Umbundu Bible (Embimbiliya - Bíblia Sagrada em Umbundu)

← Chapter 9 Jump to: Chapter 11 →

1Vo Samaria mua kala akuĩ epanduvali komãla valume va Ahava. Yehu wa soneha ovikanda, wa vi tuma ko Samaria, kolombiali vimbo lokakulu lokomanu vana va kala loku tekula omãla va Ahava, hati,

2Omo omãla va cime cene va kasi lene kuenda vu kasi lakalu lotuvalu, limbo liovimbaka lovimaleho, oco tuli ukanda ulo u pitila kokuene,

3noli pomala va cime cene u wa velapo haeye o sesamela usoma, u tumbiki kocalo ca isiaye, ho yakeli epata lia cime cene.

4Ovo puãi va yokoka calua, vati, Tali, olosoma vivali handi ka via telele oku tamalala laye. Etu hẽ tu tamalala ndati?

5Kalei kelombe la kalei kimbo lakulu le, lavakuakutekula omãla, va tuma ku Yehu vati, Etu tuakuenje vove, cosi o handeleka tu ci linga. Lomue tu vialeka kusoma. Linga ño eci ca ku sungulukila.

6Wa va sonehela ukanda wavali, hati, Nda vu tiamẽla kokuange kuenda vu pokola kondaka yange, ambati ovitue vialume omãla va cime cene, kuenje hela owola ndoyo enjui kokuange ko Yesirele. Omãla va Soma valume va soka akuĩ epanduvali komanu, va kala lomanu vanene vovimbo vana va va tekula.

7Eci va tambula ukanda, va kuata omãla va Soma, va ipa akuĩ aco epanduvali komanu, kuenje va kapa ovitue viavo volohumba, yu va vi tuma kokuaye ko Yesirele.

8Kueya omunga ya sapuila Yehu hati, Va nena ovitue viomala va Soma. Eye hati, Vi ongeki olondunda vivali kombundi, toke omele.

9Omele, eci a tunda wa talama kuenje wa popia lomanu vosi hati, Ene wa pui eko, ame ame nda lingila cime cange usuanji, yu nda wipa. Puãi avandeti vosi, helie wa va ipa?

10Kaliye limbuki okuti layimue polondaka via Yehova yi wila posi, olondaka vina Yehova a popelele epata lia Ahava. Momo Yehova wa linga eci a popele lukuenje waye Eliya.

11Oco Yehu wa kundula vosi vakuepata lia Ahava va supilepo vo Yesirele, omanu vaye vosi vanene, lakamba aye lovitunda viaye, lomue muẽle o supisilapo.

12Wa katuka wa enda ko Samaria. Eci a kala vonjila, ko Betekede yovangombo,

13Yehu wa ñualẽhẽla la vamanja a Ahasiya Soma ya Yuda kuenje hati, Ene velie? Va kumbulula vati, Etu vamanja a Ahasiya, tu ka pasula omãla va Soma lomãla va Inakulu.

14Eye hati, Va kuati lomuenyo. Oco va va kuata lomuenyo, yu va va ipaila kocitunu ca Betekede. Va kala alume akui akuãla la vavali, lomue muẽle a supisapo.

15Eci Yehu a tundako, wa tokekela la Yehonadava omõla a Rekava wa kala loku iya ha ñualehela laye. Yehu wo lama, yu wa popia laye hati, Utima wove wa sungulukila hẽ ndeci utima wange wa ku sungulukila? Yehonadava wa kumbulula hati, Oco muẽle. Yehu hati, Nda oco, nyihe eka liove. Oco wa wiha eka liaye, yu wo londisa vekalu liaye,

16kuenje hati, Ha tu ende, oco o tale ombili ñuetele Yehova. Oco wa enda laye vekalu liaye.

17Eci a pitila ko Samaria, wa ipa vosi va supililepo Ahava vo Samaria, toke wo kundula pe, ndondaka yina Yehova a popele la Eliya.

18Yehu wongolola omanu vosi, wa popia lavo hati, Ahava wa vumba ño naito Baale, Yehu puãi u vumba calua.

19Oco ñovongeli ovaprofeto vosi va Baale la vosi vo fendaila lovitunda viaye viosi. Lomue ka ka kambepo. Momo njongola oku lumbila Baale ocilumba cinene. U wosi wa kambapo, ka kala lomuenyo. Puai Yehu wa ci linga letutu hã ha kundula vakuakufendela Baale.

20Yehu hati, Lalekeli Baale ohongele yimue yi kola. Oco va yi laleka.

21Yehu wa tuma kIsareli yosi, kuenje vosi vakuakufendela Baale veya, lumue wa kambapo okuti keyile. Va iñila vonjo ya Baale, kuenje onjo ya Baale ye yuka to tunde kuvelo toke kosilo.

22Wa popia la kalei kocisoleko covowalo hati, Vosi vakuakufendela Baale, va tundisilamo ovowalo. Oco wa va tundisilamo ovowalo.

23Noke Yehu wa iñila vonjo ya Baale kumue la Yehonadava omõla a Rekava. Wa popia la vakuakufendela Baale hati, Vanji, tali okuti pokati kene ka pa ka kale umue povakuenje va Yehova, te lika vakuakufendela Baale.

24Oco va iñila oku lumba ovilumba vioku pia elisi lovilumba vikuavo. Posamua Yehu wa kapapo akuĩ ecelala kalume, kuenje hati, Nda umue povalume ngeca ndeti povaka ene o puluka, omuenyo wu wo puluisa u lifeta lomuenyo waye.

25Tuli Yehu a mala oku lumba ocilumba coku pia elisi, wa popia lasualali velombe la vakesongo hati, Iñili, va ipayi, lomue ka ka tunde. Oco va va ipa lutuilo wosipata. Asualali velombe lavakesongo va va imbaila posamua yu vamako toke kutala wa Baale.

26Va tundisa oviñumañuma via kala vonjo ya Baale, yu va vi yoka.

27Va lundula ociñumañuma ca Baale, va lundulavo onjo ya Baale va yi linga onjo yoku tundisila, toke etaili lilo.

28Oco Yehu wa kundula Baale kIsareli.

29Haimo lumue Yehu ka litepele lakandu a Yerevoama omõla a Nevata, ana a linga loku kokela Isareli oku lueya, ndokuti olonale viulu vina via kala ko Betele lo ko Dani.

30Yehova wa popia la Yehu hati, Omo wa linga ciwa, wa linga eci ca sunguluka kovaso ange, kuenda wa linga lepata lia Ahava ndeci cosi ca kala vutima wange, oco toke kocitumbulukila cakuãla omala vove va tumãla kocalo ca Isareli.

31Puãi Yehu oku endela vocihandeleko ca Yehova Suku ya Isareli lutima waye wosi, ka co kuatelele. Ka litepele lakandu a Yerevoama ana a linga loku kokela Isareli oku lueya.

32Koloneke viaco Yehova wa fetika oku tepulula ofeka ya Isareli. Hasaele wa yulila Isareli volongave viaye viosi.

33Tunde kutundilo wa Yordão, wa yula ofeka yosi ya Gileada, va Gadi la va Ruvene la va Manase, tunde kAroere kolui Arinone toke ko Gileada la Basiane.

34Ovilinga vikuavo via Yehu levi viosi a linga, lovonene aye, ka via sonehelue hẽ velivulu liasapulo olosoma via Isareli?

35Yehu wa pekela kumue lolosekulu viaye, yu vo kenda vo Samaria. Omolaye Yehoahasi wa piñala komangu yaye.

36Oloneke viosi Yehu a viala kIsareli vo Samaria via soka anyamo akui avali lecelãla.

← Chapter 9 Jump to: Chapter 11 →