2 Kings 5

Umbundu Bible (Embimbiliya - Bíblia Sagrada em Umbundu)

← Chapter 4 Jump to: Chapter 6 →

1Namana, kesongo liolohoka via Soma ya Suria, wa kala omunu unene kovaso a cime caye, haeye wa sumbilua momo Yehova eye a yulisa laye Suria. Haeye ulume wa pama, ukuotoi, puãi ukuavilundu.

2Va Suria va tundile ovimuka, yu va kuata okofeko kamue kofeka ya Isareli. Eye wa vumba ukãi wa Namana.

3Wa popia la ndona yaye, hati, Nda cime cange wa kaile kumue luprofeto wo ko Samaria, nda hise! Momo nda wo kayisa ovilundu viaye!

4Namana wa iñila ku cime caye, yu wo sapuila hati, Ufeko wokofeka ya Isareli wa sapuila ongandi longandi.

5Soma ya Suria hati, Kuende ño, kuenda numa ukanda ku Soma ya Isareli. Oco wa katuka, wambata ekui liolotalendo viopalata lolohulukãi epandu violosiekele viulu, lekui liovowalo oku lipongolola.

6Wa tuala ukanda ku Soma ya Isareli, owo wuti, Eci ukanda ulo u pitila kokuove, limbuka okuti nda ku tumisa ukuenje wange Namana hu u kayisa ovilundu viaye.

7Eci Soma ya Isareli a tanga ukanda, wa tola uwalo waye, kuenje hati, Ame nga Suku, nẽla nga oku ipa loku muisa omuenyo okuti omunu u o tuma kokuange oku kayisa umue ovilundu viaye? Tali ya, kuenda limbuki ndomo a sanda oku yuela lame.

8Puãi eci Elisia, omunu wa Suku, a yeva okuti Soma ya Isareli wa tola uwalo waye, oco wa tuma ku Soma hati, Nye wa towila uwalo wove? Eye ño kokuange, oco a limbuke okuti kIsareli kuli uprofeto.

9Oco Namana weya lotuvalu tuaye lakãlu aye, yu wa talama kuvelo wonjo ya Elisia.

10Elisia wa tuma omunga kokuaye, hati, Kuende ka lisukule vo Yordão olonjanja epanduvali. Ositu yove yu ku iya vali, kuenda o yela.

11Namana puãi wa tema, wa tundako kuenje hati, Tala, nda simile okuti eye muẽle o tunda heya kokuange, ha talama loku vilikiya onduko ya Yehova Suku yaye, loku pekuila leka liaye kepute ha mbeluisa kovilundu.

12Olondui via Damasko, Avana la Faripari, ka via velelepo hẽ ovava osi o kIsareli? Sia tẽlele hẽ oku yuamo si yeli? Oco wa ñualapo, yu wa tundako loku fungula.

13Akuenje vamako, yu va popia laye vati, A tate, nda uprofeto wa ku tumile oku linga cimue ca tĩla, nda kua ci lingile hẽ? Kaliye o ci tokoka omo a popia love hati, Ka lisukule hu yeli?

14Oco wa lokilako, yu wa liyaveka olonjanja epanduvali vo Yordão, ndeci ca popele omunu wa Suku. Oco ositu yaye ya wiya vali, ya linga ndositu yokamola, yu wa yela.

15Namana wa tiukila komunu wa Suku, eye kumue lendo liaye liosi. Weya kuenje wa talama kovaso aye, wa popia hati, Tala, kaliye nda kulĩha okuti kilu lieve liosi ka kuli Suku, te kIsareli lika. Oco kaliye, hu pinga, tambula ombanjaile kukuenje wove.

16Puãi Elisia hati, La Yehova o kasi lomuenyo, haeye ndukuakuvumba, si tambula cimue. Namana wo peya oku tambula, eye puãi ka tavele

17Oco Namana hati, Ndaño oco, haimo hu pinga, ukuenje wove va wiheko eve liambatiwa lolomula vivali. Momo tunde opo ukuenje wove ka lumbila vali olosuku vikuavo ocilumba coku pia elisi pamue vali ocilumba cikuavo, te lika Yehova.

18Kondaka eyi Yehova a ecele ukuenje wove: eci cime cange a iñila vonjo ya Rimone oku fendelamo, leci a kunamela kokuoko kuange, ndi petamelavo vonjo ya Rimone. Oco Yehova a ecele ukuenje wove kondaka eyi, eci ndi petamela vonjo ya Rimone.

19Elisia wa popia laye hati, Kuende lombembua. Eci Namana a tunda ku Elisia kuenda wa kala ale okacipala,

20Gehasi ukuenje wa Elisia omunu wa Suku, wa popia hati, Tala, u Suria u, Namana, cime cange wa weca ño muẽle, ka tambuile povaka aye eci o nenela. La Yehova o kasi lomuenyo, ndu lupukila, si tambula cimue kokuaye!

21Oco Gehasi wa landula Namana. Eci Namana a mõla umue o li loku u lupukila, wa loka kekalu liaye, kuenje wo pula hati, Cosi ciwa?

22Eye hati, Cosi ciwa! Cime cange wa numa hati, Tala, kaliye muẽle kolomunda vi Efarimi kua njiyilila amalehe vavali vopocisoko covaprofeto. Hu pinga, va ihako otalendo yopalata lovowalo avali oku lipongolola.

23Namana hati, Tava oku tambula olotalendo vivali. Wo peya, yu wo kutila olotalendo vivali viopalata volonjeke vivali, kumue lovowalo avali oku lipongolola. Wa vi tuika akuenje vaye vavali, yu va pita kovaso aye, va vi ambata.

24Eci va pitila kokamunda, wa va vi tambula, yu wa vi soleka vonjo. Wa tiula omanu vaco, yu va enda.

25Noke wa iñila ku cime caye, wa talama kovaso aye. Elisia wa popia laye hati, Waile pi a Gehasi? Eye hati, Ukuenje wove lakumue a endele.

26Puãi Elisia wa popia laye hati, Espiritu liange ka lia endele hẽ kumue love, cina ulume a tuluka vekalu liaye ha ñualẽhẽla love? Yilo hẽ otembo yoku tambula olombongo, loku tambula ovowalo loviumbo violiveira loviumbo viayuva lolomeme lolongombe lapika valume lapika vakãi?

27Oco ovilundu via Namana vi ku kuata ove lombuto yove otembo ka yi pui. Oco Gehasi wa tunda tupu kovaso a Elisia wa yela tue ndocikokoto.

← Chapter 4 Jump to: Chapter 6 →