2 Kings 22

Umbundu Bible (Embimbiliya - Bíblia Sagrada em Umbundu)

← Chapter 21 Jump to: Chapter 23 →

1Yosiya eci a fetika oku viala wa kala lanyamo ecelala, kuenje wa viala anyamo akui atatu lamosi vo Yerusalãi. Onduko ya inaye Yedida omõla a Adaya u Bosekata.

2Wa lingainga eci ca sunguluka kovaso a Yehova, wa endaila vonjila yosi ya isiaye Daviti, ka pambukilile kondio ndaño kepili.

3Kunyamo wekui lecelala wa Soma Yosiya, Soma wa tuma Siafane omõla a Asaliya, omõla a Mesiulama, usonehi, konjo ya Yehova hati,

4Kuende kocitunda cinene Hilikiya, a kongele olombongo via nenelue vonjo ya Yehova, vina vakualombundi va pomuile komanu.

5Va vi ece povaka olondingupange vi songuila upange wonjo ya Yehova. Va vi ece kolondingupange vi kasi vonjo ya Yehova loku tumbulula onjo,

6ndokuti kolokalupindelu lokovakuakutunga lokolopedreiru ha vi landi oviti lovawe a songiwa oku tumbulula onjo.

7Puãi olombongo vi eciwa povaka avo ka vi ka puliliyue ndomo via enda, momo va talavaya lesunga.

8Ocitunda cinene Hilikiya wa popia la Siafane usonehi hati, Nda sanga elivulu liovihandeleko vonjo ya Yehova. Hilikiya wa eca elivulu ku Siafane, leye wa li tanga.

9Siafane usonehi weya ku Soma, wa sapuila Soma hati, Olombongo vina via kala vonjo, akuenje vove va vi sukumulamo, yu va vi eca povaka olondingupange vi songuila upange wonjo ya Yehova.

10Siafane usonehi wa sapuila Soma hati, Ocitunda Hilikiya wa nyiha elivulu. Oco Siafane wa li tangela kovaso a Soma.

11Eci Soma a yeva olondaka vielivulu liovihandeleko, oco wa tola uwalo waye.

12Soma wa tuma ocitunda Hilikiya la Ahikama omõla a Siafane, la Akibore omõla a Mikaya, la Siafane usonehi, la Asaya ukuenje wa Soma, wa popia lavo hati,

13Kuendi ka muliliko ku Yehova ame lomanu, la Yuda yosi, mekonda liolondaka vielivulu lilo lia sangiwa. Onyeño yalua ya Yehova ya tu wengukila, momo olosekulu vietu ka via yevele kolondaka vielivulu eli ha vi lingi ndeci cosi ca tu sonehelua.

14Oco ocitunda Hilikiya la Ahikama la Akibore la Siafane la Asaya, va enda ku Hulida uprofeto haeye ukai wa Sialume omõla a Tikiya, omõla a Harihasa usoleki wovowalo. Eye wa tunga ko Yerusalãi koluvumba luavali. Yu va vangula laye.

15Ukãi wa popia lavo hati, Ca popia Yehova Suku ya Isareli ceci, hati, Sapuili omunu una wo tumisi kokuange hoti,

16Ca popia Yehova ceci, hati, Tala, imbo lilo lava va tungamo, ndi va kokela ohali ndolondaka viosi vielivulu lia tanga Soma ya Yuda.

17Momo va njanduluka, va timihila insensu olosuku vikuavo ha va wengula onyeño yange lovilinga viosi viovaka avo, oco onyeño yange yi felukila imbo lilo, kuenje ka yimiwa.

18Puãi popi la Soma ya Yuda una wo tumi oku u pulilako ku Yehova, hoti, Ca popia Yehova Suku ya Isareli, kolondaka vina wa yeva, ceci, hati,

19Omo utima wove ka wa sivile kuenje wa liketisa kovaso a Yehova eci wa yeva ondaka nda popela imbo lilo lava va tungamo ndokuti va linga ndelunda lesiñalo, kuenda omo wa tola uwalo wove loku lilila kovaso ange, oco lamevo nda ku yeva. Oco ca popia Yehova.

20Oco tala, hu pekelisa kumue lolosekulu viove, va ku tuala keyambo liove lombembua kuenje ovaso ove ka a moli ohali yosi yina ndi laika oku muisa imbo lilo. Oco va tuala ondaka yaco ku Soma.

← Chapter 21 Jump to: Chapter 23 →