bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Umbundu
/
Umbundu Bible (Embimbiliya - Bíblia Sagrada em Umbundu)
/
2 Kings 17
2 Kings 17
Umbundu Bible (Embimbiliya - Bíblia Sagrada em Umbundu)
← Chapter 16
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 18 →
1
Kunyamo wekui lavali wa Ahasi Soma ya Yuda, oco Hosea omõla a Ela a fetika oku viala kIsareli vo Samaria, kuenje wa viala anyamo ecea.
2
Wa lingainga eci cĩvi kovaso a Yehova, puãi handolosoma via Isareliko vina vio tetekela.
3
Sialimanesere Soma ya Asuria wo katukila. Hosea wa linga ukuenje waye, yu wo lambuila.
4
Puãi Soma ya Asuria vutima wa Hosea wa muilamo usuanji, momo wa tumile olomunga ku So, Soma yEgito, kuenda ka lambuilile vali Soma ya Asuria ndeci a lingaile unyamo kunyamo. Oco Soma ya Asuria wo yika, yu wo pandekela vokayike.
5
Soma ya Asuria wa katuka, wa pakasa ofeka yosi, wa lamanela ko Samaria kuenje wa yi ñuala ocingonja anyamo atatu.
6
Kunyamo wecea wa Hosea, Soma ya Asuria wa kuata Samaria. Wa tuala va Isareli kAsuria, wa va tungisa ko Hala lo ko Havore kolui Gosane lovovaimbo a va Media.
7
Cosi eci ceyilila omo va Isareli va lueyela Yehova Suku yavo, una wa vopile vofeka yEgito peka lia Fareo Soma yEgito, kuenda omo va sumba olosuku vikuavo.
8
Va endaila vovituwa violofeka vina Yehova a tundisile kovaso a va Isareli, lovovituwa via sovuiwa lolosoma via Isareli.
9
Va Isareli va lingaila vuyombeki ovina via puiya ku Yehova Suku yavo. Va litungila ovotala okolonumbuko kovaimbo avo osi, ci kale kovikanjo viaño violondavululi, ci kale vovaimbo a pamisua lovimbaka.
10
Va lisembikila olongunji vi kola lAsera kawulu osi asovi lovemehi lioviti viosi via pulika.
11
Kolonumbuko viaco viosi oko va timihaila insensu, ndeci ca lingaile olofeka vina Yehova a tundisile kovaso avo. Va lingainga ovina via vĩha vioku wengula onyeño ya Yehova.
12
Va vumba vumba oviteka, vina Yehova a va lemelele hati, Ko ka ci lingi.
13
Haimo Yehova wa lungola Isareli la Yuda lomẽla wovaprofeto vosi lavakuavitumasuku vosi hati, Tinduki kolonjila viene vĩvi. Lavi ovihandeleko viange lovisila viange loku pokola kovihandeleko viosi vina nda handelekele olosekulu viene haivio ndo tumisi lomẽla wovakuenje vange ovaprofeto.
14
Puãi ka va yonguile oku yevako. Va linga ovimbinde, ndeci ca kaile olosekulu viavo vana ka va kolelele Yehova Suku yavo.
15
Va pembula ovihandeleko viaye locisila caye cina a lisilile lolosekulu viavo kuenda olondaka a va lunguile lavio. Va kuama esanda kuenje va linga vakuesanda. Va setukula olofeka via va ñuala, vina Yehova a va kundikile hati, Ko ka lingi ndovio.
16
Va yanduluka ovihandeleko viosi via Yehova Suku yavo. Va litungila oviñumañuma via itilua ndokuti olonale vivali. Va panga ociñumañuma ca Asera. Va fendela olohoka viosi viokilu kuenda va vumba Baale.
17
Omãla vavo valume lomãla vavo vakãi va va yoka ndovilumba. Va taha taha loku tambula ovombanda. Va lilandisa ovo muẽle koku linga eci cĩvi kovaso a Yehova, ha va wengula onyeño yaye.
18
Oco Yehova wa temela calua Isareli, wa va tundisa kovaso aye. Lomue wa supapo, te lika epata lia Yuda.
19
Va Yuda lavovo ka va lavele ovihandeleko via Yehova Suku yavo, puãi va endaila vovituwa via sovola va Isareli.
20
Yehova wa takumula ombuto yosi ya Isareli, wa va talisa ohali kuenda wa va eca peka liavakuakupunda, toke a va takumula kovaso aye.
21
Momo cina a tepa Isareli kepata lia Daviti, va vialeka Yerevoama omõla a Nevata ha lingi osoma. Yerevoama wa tindula Isareli konjila ya Yehova, haeye wa va kokela oku linga ekandu limue linene.
22
Va Isareli va endaila vakandu osi a linga Yerevoama. Ka va litepele lao,
23
toke Yehova a tundisa Isareli kovaso aye ndeci a popele lomẽla wovakuenje vaye vosi ovaprofeto. Oco va Isareli vopiwa vofeka yavo, va tualiwa kAsuria, toke etaili lilo.
24
Soma ya Asuria wopa omanu ko Bavulono lo ko Kuta lo kAva lo ko Hamati lo ko Sefariwayi yu wa va tungisa vovaimbo a Samaria muna mua kaile va Isareli. Va tambula Samaria, kuenje va tunga vovaimbo aco.
25
Oco, eci va fetika oku tungako, ka va sumbilile Yehova. Oco Yehova wa tuma olohosi pokati kavo, yu via ipapo omanu vamue.
26
Va popia la Soma ya Asuria vati, Omanu vana wa sondolola yu wa va kapa vovaimbo a Samaria, ka va kulihile ocituwa ca Suku yofeka. Oco wa tuma olohosi pokati kavo kuenje tala vi li loku va ipa, momo ka va kulihile ocituwa ca Suku yofeka.
27
Soma ya Asuria wa handeleka hati, Ka tualiko umue povitunda ndopileko. A ende, a tungeko ha va longisa ocituwa ca Suku yofeka.
28
Oco umue povitunda vina vopile ko Samaria wa enda, wa tunga ko Betele, kuenje wa va longisa ndomo va sesamela oku sumbila Yehova.
29
Haimo lumue omanu vofeka lofeka va lipangela olosuku viavo muẽle. Va vi kapa vatambo olonumbuko ana va Samaria va tungile. Omanu vofeka lofeka va ci linga ndoco vovaimbo muna va tunga.
30
Omanu vo ko Bavulono va panga Sukote Benote. Omanu vo ko Kuta va panga Nerigali. Omanu vo ko Hamati va panga Asima.
31
Va Ava va panga Nivihasi la Taritaka. Va Sefariwayi va yoka omãla vavo vondalu kefendelo lia Adirameleke la Anameleke, olosuku via Sefariwayi.
32
Va sumbila vo Yehova, va linolela pokati kavo muẽle ovitunda violonumbuko, kuenje ovio via va lumbailako vatambo olonumbuko.
33
Va sumbila Yehova, puãi va vumbavo olosuku viavo muẽle ndocituwa colofeka kuna vopilue.
34
Toke etaili lilo va linga ndovituwa viavo viosimbu. Ka va sumbila Yehova, kuenda ka va pokola kovisila viavo lokoviholo viavo lokovihandeleko pamue kondaka yina Yehova a handeleka omãla va Yakoba, una a luka Isareli.
35
Yehova wa lisila lavo ocisila, wa va kundika hati, Ko ka sumbi olosuku vikuavo, ko ka vi fendeli, ndaño oku vi vumba pamue oku vi lumbila ovilumba,
36
Puãi sumbi Yehova una wa wupi vofeka yEgito lunene walua lokuoko kuoloha. Eye u fendeli haeye u lumbili ovilumba.
37
Olonjanja viosi lingi lutate ovisila lovihõlo lovihandeleko, londaka yina o soneheli. Ko ka sumbi olosuku vikuavo.
38
Ko ka ivali ocisila nda lisila lene. Ko ka sumbi olosuku vikuavo.
39
Puãi sumbi Yehova Suku yene. Leye u popela peka liovanyali vene vosi.
40
Haimo ka va pokuile, puãi va lingainga ndovituwa viavo viosimbu.
41
Oco omanu vaco va sumbila Yehova, va vumbavo oviñumañuma viavo via songiwa. Haico ca linga omãla vavo lomãla vomãla vavo, ndeci ca lingaile olosekulu viavo haico va linga toke etaili lilo.
← Chapter 16
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 18 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25