2 Kings 23

Umbundu Bible (Embimbiliya - Bíblia Sagrada em Umbundu)

← Chapter 22 Jump to: Chapter 24 →

1Soma wa pañinya, yu wongoluila pamuamue akulu vosi va Yuda la Yerusalãi.

2Kuenje Soma wa lamanela vonjo ya Yehova kumue lalume vosi va Yuda lolonungi viosi via Yerusalãi, lovitunda, lovaprofeto, lomanu vosi vatito lava vanene. Yu wa va tangela olondaka viosi vielivulu liocisila lina lia sangiwa vonjo ya Yehova.

3Soma wa talama pongunji, kuenje wa lisila ocisila kovaso a Yehova coku kuama Yehova loku lava ovihandeleko viaye lovovangi aye lovisila viaye lutima waye wosi, lomuenyo waye wosi, ha pokola kolondaka viocisila, vina via sonehiwa velivulu liaco. Omanu vosi va wilavo vocisila caco.

4Soma wa tuma ocitunda cinene Hilikiya lovitunda viocisoko cavali lolondavululi viombundi ha va tundisa vonembele ya Yehova ovikuata viosi via pangelelue Baale la Asera lolohoka viosi viokilu. Wa vi tundisa vo Yerusalãi, yu wa vi yokela vovisenge via Kedrone kuenje etiko liaco wa li tuala ko Betele.

5Wa tundisa ovitunda vioviteka, vina olosoma via Yuda via tumbikilile oku timiha insensu kovotala okolonumbuko, vovaimbo a Yuda, lovovaimbo a ñuala Yerusalãi. Wa tundisavo vakuakutimihila insensu Baale, lekumbi, losãi, lolombungululu, lolohoka viosi viokilu.

6Wopa ociñumanuma ca Asera vonjo ya Yehova. Wa ci tundisa vo Yerusalãi, toke kolui Kedrone, wa ci yokela kolui Kedrone, wa ci keleketa toke ca linga oneketela. Oneketela yaco wa yimba kayambo omanu vaño.

7Wa leñula olonjo viavakuokahonga walume lalume vina via kala vonjo ya Yehova, muna akãi va tutaila olonanga via Asera.

8Wa tundisa ovitunda viosi vovaimbo osi a Yuda. Tunde ko Geva toke ko Beresieva, wa vihisa ovotala okolonumbuko kuna ovitunda via timihaila insensu. Wa lundula olonumbuko vioviñumañuma violohombo via kala kuvelo wombundi ya Yehosua, onguluvulu yimbo, kepili liombundi yimbo.

9Haimo ovitunda viokolonumbuko ka vieyile kutala wa Yehova ko Yerusalãi puãi via lila ombolo ka yi kuete etumbisa pokati kavangandiavo.

10Soma wa vihisa Tofete yi kasi vocimbota ca va Hinomi, oco lomue ka ka yoke vali vondalu omolaye ulume pamue omolaye ukãi ho lumbila Moleke.

11Wopa otuvalu tuna olosoma via Yuda via tumbikilile ekumbi, kombundi yonjo ya Yehova, konele yohondo ya kalei Natane Meleke, ya kala volongave. Wa yoka akalu ekumbi vondalu.

12Ovotala a kala kolusoka luosapalalo ya Ahasi, ana olosoma via Yuda via tungile, kuenda ovotala ana Manase a tungilile vovitali vivali vionjo ya Yehova, Soma wa a kupuila posi, wa a nyanyola. Oneketela yao wa yimba volui Kedrone.

13Soma wa vihisavo olonumbuko via kala kovaso ya Yerusalãi, kondio yomunda yeviho, vina Salomone Soma ya Isareli a tungilile Asitorete umbondo wa va Sitono, la Kemosi umbondo wa va Moavi, la Milikome umbondo wa va Amoni.

14Wa nyanyola oviñumañuma wa timbula Asera. Apa via kala wa lundikapo akepa omanu.

15Kuenda vali utala wo ko Betele lonumbuko yina ya pangele Yerevoama omõla a Nevata, una wa kokela Isareli oku lueya, utala waco lonumbuko yaco, wa vi leñula. Wa yoka onumbuko, wa yi keleketa toke ya linga oneketela. Wa yokavo Asera.

16Eci Yosiya a ñualapo, wa mõla ayambo a kala vomunda. Yu wa tuma oku upa akepa kayambo aco, wa a yokela kutala kuenje wo vihisa, ndondaka ya Yehova yina ya popele omunu wa Suku, una wa sapuile ovina evindeti.

17Yosiya wa popia hati, Eci ndete, ca tungiwa ndoto, nye? Vakuimbo vo sapuila vati, Oco eyambo liomunu wa Suku wa tundile ko Yuda, yu wa sapula ovina evi ove wa linga lutala wa Betele.

18Soma hati, A kale. Lomue ka ka lambe kakepa aye. Oco va siapo akepa aye kumue lakepa uprofeto una wa tundile ko Samaria.

19Olonjo viosi violonumbuko viovovaimbo a Samaria, vina olosoma via Isareli via tungilile oku wengula onyeño ya Yehova, Yosiya wa vi leñulavo, wa linga lavio ndeci cosi a lingile ko Betele.

20Ovitunda viosi violonumbuko via kalapo, wa vipaila kovotala. Wa yokelako akepa omanu. Yu wa tiukila ko Yerusalãi.

21Soma wa pañinya omanu vosi hati, Lingili Yehova Suku yene o Pascoa, ndeci ca sonehiwa velivulu eli liocisila.

22Ocili tunde koloneke violonganji vina via tetulowaila Isareli, pamue koloneke viosi violosoma via Isareli lolosoma via Yuda, ka kua la kala o Pascoa ya linga ndeyi.

23Kunyamo wekui lecelala wa Soma Yosiya, oco o Pascoa eyi ya lingilua Yehova vo Yerusalãi.

24Kuenda vali Yosiya wa tundisa vakualondele, lovimbanda, lotumbonya, loviteka, lovombondo osi a moleha vofeka ya Yuda la Yerusalãi, ha kolisa olondaka viovihandeleko via sonehiwa velivulu lina ocitunda Hilikiya a sanga vonjo ya Yehova.

25Polosoma viosi, ci kale evi vio tetekela, ci kale evi vio kuama, ka pa kaile wa lisoka laye koku tiamẽla ku Yehova lutima waye wosi, lomuenyo waye wosi, lolohõlo viaye viosi, ndomo ca sonehiwa vovihandeleko viosi via Mose.

26Haimo Yehova ka tindukile konyeño yaye yalua ya tokota, haiyo ya felukilila Yuda ovina viosi via linga Manase, via wengula onyeño yaye.

27Yehova wa popia hati, Nundisavo Yuda kovaso ange ndeci nda tundisa Isareli. Nakumula imbo lilo Yerusalãi, hailio nda nolele kumue lonjo nda popele siti, Mu kala onduko yange.

28Ovilinga vikuavo via Yosiya, levi viosi a linga, ka via sonehelue hẽ velivulu liasapulo olosoma via Yuda?

29Koloneke viaye, Fareo Neko Soma ya Egito wa katukila Soma ya Asuria, ha endi kolui Ferati. Soma Yosiya wo katukila, leye wa wipaila ko Megido, eci o mõla.

30Akuenje vaye vambata ocivimbi caye vekalu tunde ko Megido, yu va ci nena ko Yerusalãi. Vo kenda veyambo liaye muẽle. Omanu vofeka va vialeka Yehoahasi, omõla a Yosiya, vo waveka kuenje vo piñalisa komangu ya isiaye.

31Yehoahasi eci a fetika oku viala wa kala lanyamo akui avali la atatu, kuenje wa viala olosãi vitatu vo Yerusalãi. Onduko ya inaye Hamutala, omõla a Yeremiya u Livina.

32Wa linga eci cĩvi kovaso a Yehova, ndeci cosi ca lingaile olosekulu viaye.

33Fareo Neko wo kuta likolo ko Rivila vofeka ya Hamati, oco ka ka viale vali ko Yerusalãi. Wa kisika ofeka ulambu wocita colotalendo viopalata lotalendo yulu.

34Fareo Neko wa vialeka Eliakimi omõla a Yosiya, ha piñala komangu ya isiaye Yosiya. Onduko yaye wa yi pongolola Yehoyakimi. Wopako Yehoahasi leye wa enda kEgito, haiko a fila.

35Yehoyakimi wa eca opalata lulu ku Fareo. Puãi wa fetisa ofeka olombongo viaco, ndocihandeleko ca Fareo. Wa kisika opalata lulu komanu vofeka, omunu lomunu ndeci co tukuilua, ha lambuila Fareo Neko.

36Yehoyakimi eci a fetika oku viala wa kala lanyamo akui avali la atãlo, kuenje wa viala anyamo ekui lamosi vo Yerusalãi. Onduko ya inaye Sevida, omõla a Pedaya u Ruma.

37Wa lingainga eci cĩvi kovaso a Yehova ndeci cosi ca lingaile olosekulu viaye.

← Chapter 22 Jump to: Chapter 24 →