2 Kings 9

Umbundu Bible (Embimbiliya - Bíblia Sagrada em Umbundu)

← Chapter 8 Jump to: Chapter 10 →

1Uprofeto Elisia wa kovonga umue pocisoko covaprofeto, wa popia laye hati, Litika vombunda yove, ambata ocekele eci culela peka liove, kuende ko Ramote Gileada.

2Eci o pitilako, sandiliya Yehu omõla a Yehosafata omõla a Nimisi, kuenje iñila, u katula pokati kavakuavo, kuende laye vohondo yo vokati.

3Kuenje nyañula ocekele culela, itila kutue waye, kuenda popia huti, Ca popia Yehova ceci, hati, Nda ku waveka hu lingi osoma kIsareli. Noke yikula epito, tila, ku ka talamele.

4Oco umalehe, ukuenje wuprofeto, wa enda ko Ramote Gileada.

5Eci a pitilako, ota, vakesongo volohoka va kala loku linga onjango. Wa popia hati, Ñuete ondaka yimue love, a Kesongo. Yehu hati, Pokati ketu vosi, helie o kuete laye ondaka? Eye hati, Love muẽle a Kesongo.

6Oco Yehu wa votoka, yu wa iñila vonjo. Umalehe wa itila ulela kutue waye kuenje wa popia laye hati, Ca popia Yehova Suku ya Isareli ceci, hati, Nda ku waveka hu lingi osoma yomanu va Yehova, hu lingi osoma kIsareli.

7Ove o kundula epata lia cime cove Ahava, si fetuluinyila Isevele osonde yovakuenje vange ovaprofeto losonde yovakuenje vosi va Yehova.

8Epata liosi lia Ahava li nyoleha. Omãla vosi valume vepata ha Ahava kIsareli, ndi va kundulako, ci kale upika, ci kale omamale.

9Epata lia Ahava ndi li lingisa ndepata lia Yerevoama omõla a Nevata kuenda ndepata lia Baasia omõla a Ahiya.

10Olombua vi takilila Isevele vepia lia Yiserele, kuenje lomue u kenda. Oco umalehe wa yikula epito, yu wa tila.

11Eci Yehu a tunda heya kakuenje va cime caye, umue wo pula hati, Cosi ciwa? Eyui eli lieyilile nye kokuove? Wa popia lavo hati, Ene wa kulihi omunu waco lombangulo yaye.

12Ovo vati, Esanda, tu sapuileko yapa! Oco Yehu hati, Wa popia lame ongandi longandi, hati, Ca popia Yehova ceci, hati, Nda ku waveka hu lingi osoma kIsareli.

13Oco va yayulako, yu va kuata omunu omunu onanga yaye kuenje va yi kapa vemi liolomai viaye kosikata yaño, kuenda va sika olumbeta vati, Yehu eye Soma!

14Oco Yehu omõla a Yehosafata omõla a Nimisi wa lingila Yorama usuanji. Yorama puãi wa kala loku lava Ramote Gileada, eye kumue la Isareli yosi, mekonda lia Hasaele Soma ya Suria.

15Puãi Soma Yorama wa tiukilile ko Yesirele ha kayisua kolombole vio lemehele va Suria cina a liyaka la Hasaele Soma ya Suria. Oco Yehu hati, Nda oco ocisimilo cene, lomue ka ka siosiolohe vimbo ha endi oku ci sapula ko Yesirele.

16Yehu wa londa vekãlu kuenje wa enda ko Yesirele, momo Yorama oko a langi. Kuenda Ahasiya, Soma ya Yuda, haiko a kala loku pasula Yorama.

17Ondavululi ya talama kilu liombonge ya Yesirele, ya mõla ohoka ya Yehu yo yiya, kuenje hati, Ndete ohoka yimue. Yorama hati, Pañinya ukuakuendela kotuvalu, u tuma oku ñualẽhẽla lavo, a pule hati, Ombembua?

18Oco umue wa enda lokavalu oku ñualẽhẽla laye, hati, Ca popia Soma ceci, hati, Ombembua? Yehu hati, O kuete nye lombembua? Ñuame vonyima. Ondavululi ya sapula yiti, Omunga ya pitila kokuavo, puãi ka yi kasi loku tiukako.

19Yorama wa tuma omunga yavali yukuakuendela kokavalu. Oku iya kokuavo hati, Ca popia Soma ceci, hati Ombembua? Yehu wa kumbulula hati, O kuete nye lombembua? Ñuame vonyima.

20Ondavululi ya sapula yiti, Wa pitila muẽle kokuavo, puãi ka kasi loku tiukako. Kuenda okuendisa kuaco otuvalu huti ño okuendisa kua Yehu, omõla a Nimisi, momo endisa ndeyui.

21Yorama hati, Angiliya ekalu. Oco vangiliya ekalu liaye. Yorama Soma ya Isareli la Ahasiya Soma ya Yuda va tunda, omunu omunu vekalu liaye ha va ñualẽhẽla la Yehu, kuenje vo sanga vepia lia Navote u Yesirele.

22Eci Yorama a mõla Yehu, wo pula hati, A Yehu, ombembua? Wa kumbulula hati, Ombembua ye, osimbu ukahonga lovombanda a nyõho Isevele a siata?

23Oco Yorama wa ñualisapo otuvalu, wa tila kuenje wa popia la Ahasiya hati, A Ahasiya, usuanji!

24Yehu wa puila vohonji longusu yaye yosi, wasa Yorama pokati kovoko, kuenje usongo wa pita olusole vutima waye, yu wa litumãla vekalu liaye.

25Yehu wa popia la kesongo kaye Bidikare hati, U yelulamo, wimba vepia lia Navote, u Yesirele. Ivaluka ndomo Yehova o popela ocitumasuku cina ove lame tua endelele kotuvalu, yu tua kuamele vonyima ya isiaye Ahava.

26Yehova hati, Ocili hela nda mõla osonde ya Navote kuenda osonde yomala vaye. Yehova hati, Hu fetuluinyila vepia lilo. Oco u yelula, wimba vepia ndondaka ya Yehova.

27Eci Ahasiya Soma ya Yuda a ci mõla, wa tila lonjila yo ko Bete Hagane. Yehu wo landula kuenje hati, Waselivo vekalu. Yu va wasela kowulu wa Guru, ocipepi la Ivileama. Wa tilila ko Megido, kuenda haiko a fila.

28Akuenje vaye va wambata vekalu liaye toke ko Yerusalãi. Vo kenda veyambo liaye kumue lolosekulu viaye vimbo lia Daviti.

29Kunyamo wekuĩ la mosi wa Yorama omõla a Ahava, oco Ahasiya a fetika oku viala ko Yuda.

30Eci Yehu a pitila ko Yesirele, Isevele wa ci yeva. Yu wa liyukula vovaso, wa limiangulula kutue, wa vanjela ponjanela.

31Eci Yehu a iñila kombundi, Isevele hati, Ove a Simiri, amondi ya cime cove, ombembua, ale?

32Oco wa petuila ovaso aye konjanela kuenje hati, Helie a niamela? Helie? Kuenje akuenje velombe vavali pamue vatatu vo vanjela ponjanela.

33Yehu hati, U leñuili posi. Oco vo leñuila posi. Osonde yaye ya samohaila vocimano lokotuvalu, yu tuo kosa lakonjo.

34Noke wa iñila, wa lia, wa nyua kuenje hati, Kaliye ka tali ukãi waco siñaliwa ndeti, u kendi momo omõla osoma

35Yu va enda oku u kenda, puaĩ lacimue cetimba liaye va sangapo, te like ekolokolo lolomai lakanda ovaka aye.

36Oco va tiuka yu vo ci sapuila. Leye hati, Ci kasi ondaka ya Yehova, yina a popele lukuenje waye Eliya u Tisibi, hati, Olombua vi ka takilila Isevele vepia lia Yesirele.

37Ocivimbi ca Isevele ci linga ndelombo vepia, vusenge wa Yesirele, oco ka va ka popie vati, U Isevele.

← Chapter 8 Jump to: Chapter 10 →