2 Kings 13

Umbundu Bible (Embimbiliya - Bíblia Sagrada em Umbundu)

← Chapter 12 Jump to: Chapter 14 →

1Kunyamo wakui avali latatu wa Yoasi omõla a Ahasiya, Soma ya Yuda, oco Yehoahasi omõla a Yehu a fetika oku viala kIsareli vo Samaria, kuenje wa viala anyamo ekui lepanduvali.

2Wa lingainga eci cĩvi kovaso a Yehova, wa kuama vakandu a Yerevoama omõla a Nevata ana a linga loku kokela Isareli oku lueya. Ka litepele lao.

3Onyeño ya Yehova ya wengukila va Isareli, kuenje wa va eca eca peka lia Hasaele Soma ya Suria lopeka lia Benehadada omõla a Hasaele.

4Yehoahasi wa likutilila ku Yehova, kuenje Yehova wo yeva, momo wa mõla ekangiso lia Isareli, ndomo Soma ya Suria a va kangisa.

5Yehova wa iha Isareli onjovoli kuenje va puluka peka lia va Suria. Va Isareli va tunga volonjo viavo ndeci va kaile ale.

6Haimo ka va litepele lakandu epata lia Yerevoama ana a linga loku kokela Isareli oku lueya. Va endaila vakandu avo, kuenda vo Samaria mua supavo Asera.

7Pomanu vosi va Yehoahasi, Yehova wo supisilapo lika akuĩ atãlo vakuakuendela kotuvalu lekui liakalu lekui liolohulukãi vialume vakuakuendela posi. Momo Soma ya Suria wa va kundula, wa va lingisa ndoneketela yopocimbandi.

8Ovilinga vikuavo via Yehoahasi, levi viosi a linga, lovonene aye, ka via sonehelue hẽ velivulu liasapulo olosoma via Isareli?

9Yehoahasi wa pekela kumue lolosekulu viaye yu vo kenda vo Samaria. Omolaye Yoasi wa piñala komangu yaye.

10Kunyamo wakui atatu lepanduvali wa Yoasi Soma ya Yuda oco Yehoasi omõla a Yehoahasi a fetika oku viala kIsareli vo Samaria, kuenje wa viala anyamo ekui lepandu.

11Wa linga eci cĩvi kovaso a Yehova, ka litepele lakandu osi a Yerevoama omõla a Nevata, ana a linga loku kokela Isareli oku lueya, puãi wa endaila vakandu aco.

12Ovilinga vikuavo via Yoasi levi viosi a linga, lovonene aye cina a liyaka la Amasiya Soma ya Yuda, cosi ka ca sonehelue hẽ velivulu liasapulo olosoma via Isareli?

13Yoasi wa pekela kumue lolosekulu viaye. Yerevoama wa piñala komangu yaye. Yoasi wa kendiwa vo Samaria kumue lolosoma via Isareli.

14Kaliye Elisia wa vela uvei wo lia. Yoasi Soma ya Isareli weya kokuaye, yu wa lilila kovaso aye, hati, A tate, a tate, akalu a Isareli lavakuatuvalu tuaco!

15Elisia wa popia laye hati, Yelula ohonji lovisongo. Yu wa yelula ohonji lovisongo.

16Wa popia la Soma ya Isareli hati, Puila vohonji. Yu wa puilamo, kuenje Elisia wa kapa ovaka aye kilu liovaka a Soma.

17Kuenda wa popia hati, Yikula onjanela yokutundilo. Yu wa yi yikula. Oco Elisia hati, Asa. Yu wasa. Kuenda vali hati, Usongo wa Yehova woku yula, usongo woku yula va Suria! Momo ove o laika oku yula va Suria kAfeke, toke o va malusulapo.

18Elisia hati, Yelula ovisongo. Yu wa vi yelula. Oco wa popia la Soma ya Isareli hati, Vi veta posi. Yu wa vetapo lutatu, kuenje wa liwekapo.

19Omunu wa Suku wo temela kuenje hati, Wa sesamelele oku vetapo lutãlo pamue olonjanja epandu, noke nda wa yulavo va Suria toke o va malusulapo, kaliye puãi va Suria o va yula lika lutatu.

20Elisia wa fa, yu vo kenda. Kaliye pokuca kuolombela, va Moavi veyaiya ovimuka ha va pundi ofeka.

21Eci va kala loku kenda omunu umue, ota kua moleha ocimuka ca va Moavi. Oco va kupuila ocivimbi veyambo lia Elisia. Eci omunu waco a lamba kakepa a Elisia haico muẽle a pinduka kuenje wa talama vilu.

22Hasaele Soma ya Suria wa kangisa Isareli oloneke viosi via Yehoahasi.

23Puãi Yehova wa vombokela, wa va linga ohenda wa va ivaluka mekonda liocisila caye la Avirahama la Isake la Yakoba. Ka yonguile oku va nyõla, ndaño toke cilo lopo ka va takumuĩle kovaso aye.

24Hasaele Soma ya Suria wa fa. Omõlaye Benehadada wa piñala komangu yaye.

25Yehoasi omõla a Yehoahasi wa punda vali peka lia Benehadada, omõla a Hasaele, ovaimbo ana eye a pundile isiaye Yehoahasi kovita. Yoasi wo yula lutatu, kuenje wa tambula ovaimbo a Isareli.

← Chapter 12 Jump to: Chapter 14 →