2 Kings 7

Umbundu Bible (Embimbiliya - Bíblia Sagrada em Umbundu)

← Chapter 6 Jump to: Chapter 8 →

1Puãi Elisia hati, Yeveleli ondaka ya Yehova. Ca popia Yehova ceci, hati, Hela owola ndoyo, kombundi ya Samaria, ohumba yosema ya fina yi landa osiekele, lolohumba vivali viosevata vi landa osiekele.

2Kesongo una Soma a kunamelele kokuoko kuaye, wa kumbulula omunu wa Suku hati, Elo! Ndaño Muẽle Yehova wa tuiyile olonjanela kilu, ocina eci nda ci teliwa hẽ? Elisia hati, Tala, o ci mõla lovaso ove puãi ku liko.

3Kombundi yimbo kua kala vakuavilundu vakuala. Va livangula pokati vati, Nye tu tumalela kulo toke tu fa?

4Nda tu linga tuti, Tu iñila vimbo, vimbo muli onjala kuenje tu filamo. Nda tu tumãla ño kulo, tu favo. Oco tuendi, tu limbi vocilombo ca va Suria. Nda va tu pulula tu kala lomuenyo, nda va tu ipa tu fa.

5Oco va katuka koluvumbulu, ha va endi kocilombo ca va Suria. Eci va pitila konele yocilombo ca va Suria, ota, lomue o kasimo.

6Momo olohoka via va Suria Yehova wa vi yevisile onjuvungo yakalu lonjuvungo yotuvalu, ndonjuvungo yolohoka vinene. Oco va livangula pokati vati, Ota, Soma ya Isareli wa fetela olosoma via va Hiti lolosoma via va Egito ha vi tu undumuhila.

7Oco va katuka, yu va tila koluvumbulu. Va siapo olombalaka viavo lotuvalu tuavo lovimbulu viavo, locilombo ca siala no ndoto. Va tila ha va popela omuenyo wavo.

8Eci vakuavilundu vaco va pitila konele yocilombo, va iñila võmbalaka yimue, va lia, va nyua, kuenje vopamo opalata lulu luwalo, yu va ka vi solekele. Veya vali, va iñila vombalaka yikuavo, vopamovo vimue, yu va ka vi solekele.

9Oco va livangula pokati, vati, Ka tu kasi loku linga ciwa. Etaili eteke liondaka yiwa yesanju. Etu nda tuha ño ha tu amisapo toke ku ca, ekangiso li laika oku tu wila. Oco tuendi, tu ci sapuili ocikumba ca Soma.

10Yu veya, va vilikiya vakuambundi yimbo. Va va sapuila vati, Tua endele kocilombo ca va Suria, kuenje tala, lomue o kasiko, ndaño ondaka yomunu ka mu yevalela, muli lika otuvalu tua pandekiwa lovimbulu via pandekiwa kuenda olombalaka via lisiala ño.

11Vakuambundi va vilikiya, yu ca yevala velombe lia Soma.

12Kuenje Soma wa pasuka uteke, yu wa popia lakuenje vaye hati, Ndu sapuili eci ca tu linga va Suria. Va kuliha okuti tu kasi lonjala. Oco va tunda vocilombo ha va salama vusenge, vati, Eci va tunda vimbo tu va kuata lomuenyo, ha tu iñila vimbo.

13Umue povakuenje vaye wa kumbulula hati, Vamue va ende lotuvalu tutãlo tua supapo, tuna tua siala vimbo momo tu laika oku linga ndowiñi wosi wa Isareli una wa nyolẽha ale. Oco tu tumiko ha tu kulihisa.

14Oco va nyañula akalu avali kumue lotuvalu tuao, kuenje Soma wa tuma oku landula olohoka via Suria, hati, Kuendi, kulihisi!

15Va va landula toke ko Yordão, kuenje ota, onjila yosi ye yuka lovowalo lovikuata, vina va Suria va inasile poku tila kuavo ehuma. Oco olomunga via tiuka, yu via ci sapuila Soma.

16Omanu va tunda, yu va punda ocilombo ca va Suria kuenje ohumba yosema ya fina ya landa osiekele, lolohumba vivali viosevata via landa osiekele, ndondaka ya Yehova.

17Soma wa eca ocikele coku lava pombundi ku kesongo una a kunamelele kokuoko kuaye, Omanu vo liatelaila pombundi, yu wa fa ndeci omunu wa Suku a popele, cina a popia la Soma weyile kokuaye.

18Momo omunu wa Suku wa popele la Soma hati, Hela owola ndoyo, kombundi ya Samaria, olohumba vivali viosevata vi landa osiekele, lohumba yosema ya fina yi landa osiekele.

19Kesongo puãi wa tambulula omunu wa Suku hati, Elo, ndaño Muẽle Yehova wa tuiyile olonjanela kilu, ocina eci nda ci tẽliwa hẽ? Elisia hati, Tala, o ci mõla lovaso ove puãi ku liko.

20Haico muẽle co sanga, momo omanu vo liatelaila pombundi, kuenje wa fa.

← Chapter 6 Jump to: Chapter 8 →