2 Kings 20

Umbundu Bible (Embimbiliya - Bíblia Sagrada em Umbundu)

← Chapter 19 Jump to: Chapter 21 →

1Koloneke viaco, Hesekiya wa vela kuenje wa sokele oku fa. Uprofeto Isaya, omõla a Amose, weya kokuaye, wa popia laye hati, Ca popia Yehova ceci, hati, Sokiya onjo yove, momo o fa, ku veluka.

2Oco Hesekiya wa pongolokela kocimano, kuenje wa likutilila ku Yehova, hati,

3A Yehova, nda likutilila kokuove. Ivaluka ndeci nda endaila kovaso ove locili kuenda lutima wa sunguluka, loku linga eci ciwa kovaso ove. Kuenje Hesekiya wa lila calua.

4Osimbu Isaya ka tundile handi vocitali covokati, oco ondaka ya Yehova yeya kokuaye yiti,

5Tiuka, popia la Hesekiya, ombiali yomanu vange, huti, Ca popia Yehova, Suku ya so Daviti, ceci, hati, Nda yeva ohutililo yove. Nda mõla asuelela ove. Tala, hu kayisa. Keteke liatatu o lamanela konjo ya Yehova.

6Koloneke viove mbokiyako ekui lianyamo lanyamo atãlo. Hu popela ove muẽle limbo lilo peka lia Soma ya Asuria. Imbo lilo ndi li lisilamelela ame muẽle loku li silamelela ukuenje wange Daviti.

7Isaya hati, Neni etapato liakuyu. Oco va li nena, yu va li kapa kocipumbu caco, kuenje Hesekiya wa kaya.

8Hesekiya wa popia la Isaya hati, Ondimbukiso ye ndimbuka layo okuti Yehova o ñayisa si lamanela konjo ya Yehova keteke liatatu?

9Isaya hati, Ondimbukiso yi tunda ku Yehova o limbuka layo okuti Yehova o linga eci a popia, yeyi, Ulembo wamako ekui liovilala ale, ale u tiukila konyima ekui liovilala?

10Hesekiya wa kumbulula hati, Ca leluka ulembo oku amako ekui liovilala. Hise ulembo u tiukile konyima ekui liovilala.

11Oco uprofeto Isaya wa vilikiya ku Yehova, leye wa tiula ulembo konyima, ekui liovilala, vina ulembo wa pitahalele ale, kololosio ya Ahasi.

12Koloneke viaco Merodake Valadana, omõla a Valadana, Soma yo ko Bavulono, wa tuma ku Hesekiya olomunga viambata ovikanda lombanjaile, omo a yeva okuti Hesekiya wa vela.

13Hesekiya wa va sanjukila, kuenje wa va lekisa onjo yosi omu mua solekiwa ovipako viaye viopalata lulu lolosimbolua kuenda ulela wa tĩla. Wa va lekisavo onjo omu mua kala ovimaleho viaye, levi viosi via kala volonjo vioku soleka ovokuasi aye. Vonjo pamue vuviali waye, ka mua kaile cimue okuti Hesekiya ka va ci lekisile.

14Oco uprofeto Isaya weya ku Soma, wa popia laye hati, Omanu ava vati nye? Eci veya kokuove va tundilila pi? Kuenje Hesekiya hati, Va tunda kofeka yocipala, ko Bavulono.

15Oco wa popia vali hati, Nye va mõla vonjo yove? Hesekiya wa kumbulula hati, Va mõla cosi ci li vonjo yange. Volonjo viange vioku soleka ovokuasi ka muli cimue sia va lekisile.

16Oco Isaya wa popia la Hesekiya hati, Yevelela ondaka ya Yehova, hati,

17Tala kuiya eteke okuti cosi ci kasi vonjo yove, kuenda cosi ca soleka olosekulu viove toke etaili lilo, ci tualiwa ko Bavulono, lacimue ci sialapo. Oco ca popia Yehova.

18Kuenje vamue pokati komãla vove valume, vakuetimba liove, vana ove o cita, vambatiwa ha va lingi anuku velombe liosoma yo ko Bavulono.

19Oco Hesekiya wa popia la Isaya hati, Ondaka ya Yehova yina ove wa popia, ya posoka. Momo eye wa sima hati, Koloneke viange ka ku kala hẽ ombembua kuenda oku salala?

20Ovilinga vikuavo via Hesekiya, lovonene aye osi, lomo a panga ociva lolekua, loku nena ovava vimbo, cosi ka ca sonehelue hẽ velivulu liasapulo olosoma via Yuda?

21Hesekiya wa pekela kumue lolosekulu viaye. Omolaye Manase wa piñala komangu yaye.

← Chapter 19 Jump to: Chapter 21 →