Ezekiel 9

Amharic Tigrinya 2011

← Chapter 8 Jump to: Chapter 10 →

1ኣብ ኣእዛነይ ከኣ፡ እቶም ነታ ኸተማ ዚቐጽዑስ፡ ነፍሲ ወከፎም እቲ ዜጥፍኣሉ ኣጽዋር ኣብ ኢዱ ሒዙ ይቕረብ፡ እናበለ ዓው ኢሉ ጨደረ።

2እንሆ ድማ፡ ሹድሽተ ሰብኣይ፡ ነፍሲ ወከፎም እቲ ዚቐትለሉ ኣጽዋር ኣብ ኢዱ ሒዙ፡ ካብቲ መገዲ ናብ ሰሜን ኣቢሉ ዜርኢ ላዕላይ ደገ መጹ። ሓደ ሰብኣይ፡ ካብ ልሕጺ እንጣጢዕ እተገብረ ዓለባ እተኸድነ፡ ናብ ጸሓፊ ቐርኒ ቐለምውን ኣብ ሕቚኡ ዘለዎ፡ ኣብ ማእከሎም ነበረ። ኣትዮም ኣብ ጥቓ እቲ መሰውኢ ነሓሲ ቘሙ።

3ክብሪ ኣምላኽ እስራኤል ካብቲ ዝነበሮ፡ ካብ ልዕሊ ኪሩቤል ተላዕለ፡ ናብቲ ልዳት እታ ቤት ከኣ ኸደ። ነቲ ኻብ ልሕጺ እንጣጢዕ እተገብረ ዓለባ እተኸድነ፡ ናይ ጸሓፊ ቐርኒ ቐለምውን ኣብ ሕቚኡ ዝነበሮ ሰብኣይ ጸውዖ።

4እግዚኣብሄር ከኣ፡ ብማእከል ከተማ፡ ብማእከል የሩሳሌም ሕለፍ እሞ ነቶም ብዛዕባ እቲ ኣብ ማእከላ ዚግበር ዘሎ ጽያፍ ዚጒህዩን ዚትክዙንሲ ኣብ ግምባሮም ማሕተም ግበረሎም፡ በሎ።

5ኣነ እናሰማዕኩ ኸኣ ነቶም ካልኦት በሎም፡ ደድሕሪኡ በታ ኸተማ ሐሊፍኩም ውቕዑ፡ ዓይንኹም ንሓደ እኳ ኣይትንሐፍ ኣይትራሕርሑውን።

6ካብ መቕደሰይ ጀሚርኩም ንኣረገውትን ነጒባዝን ንጐረዙን ንቐለውዕን ንኣንስትን ቅተሉ፡ ኣጽንቱ። ነቶም ማሕተም ዘለዎም ግና ኣይትቕረብዎም። ንሳቶም ከኣ በቶም ኣብ ቅድሚ እታ ቤት ዘለዉ ኣረገውቲ ጀመሩ።

7ንሱ ድማ፡ ነታ ቤት ኣርክስዋ፡ ነቲ ኣጸዳት ከኣ ብምዉታት ምልእዎ፡ ውጹ፡ በሎም። ንሳቶም ወጹ ኣብታ ኸተማውን ይወቕዑ ነበሩ።

8ኰነ ድማ፡ ኪወቕዑ ኸለዉ፡ ኣነ ተረፍኩ። ብገጸይ ወደቕኩ እሞ፡ ኣየ፡ ኣታ እግዚኣብሄር ኣምላኽ፡ ነድርኻ ኣብ የሩሳሌም ኲዒኻዶ ንዂሎም ትርፎፍያ እስራኤል ከተጥፍኦም ኢኻ ኢለ ጨራሕኩ።

9ንሱ ድማ በለኒ፡ ኣበሳ ቤት እስራኤልን ይሁዳን ኣዝዩ ዓብዪ እዩ። እግዚኣብሄር ነዛ ሃገር ሐዲግዋ፡ እግዚኣብሄር ሓንቲ እኳ ኣይርእን እሮኡ፡ ይብሉ ኣለዉ እሞ፡ እታ ሃገር ብደም፡ እታ ኸተማውን ብዓመጽ መሊኤን ኣለዋ።

10ስለዚ ዓይነይ ኣይክትንሕፍን እያ፡ ኣነ ኣይክርሕርሕን፡ መገዶምውን ኣብ ርእሶም ክመልሰሎም እየ።

11እንሆ ኸኣ፡ እቲ ኻብ ልሕጺ እንጣጢዕ እተገብረ ዓለባ እተኸድነ፡ ናይ ጸሓፊ ቐርኒ ቐለምውን ኣብ ሕቚኡ ዝነበሮ፡ ከምቲ ዝኣዘዝካኒ ገበርኩ፡ ኢሉ ጸብጻቡ ሀበ።

← Chapter 8 Jump to: Chapter 10 →