Ezekiel 1

Ilonggo (Maayong Balita nga Biblia (2012))

Jump to: Chapter 2 →

1Sa ikalima nga adlaw sang ikap-at nga bulan sang ika-30 nga tuig, samtang ako kaupod sang mga bihag nga Judio sa ubay sang Suba sang Kebar sa Babilonia, ang langit nag-abri, kag nakita ko ang Dios sa isa ka palanan-awon.

2Sa ikalima nga adlaw sang bulan sa ikalima nga tuig sang pagbihag kay Haring Joaquin,

3ako, si Ezequiel nga pari, anak ni Buzi, nakabati sa Ginoo nga naghambal sa akon didto sa Babilonia sa ubay sang Suba sang Kebar, kag didto nabatyagan ko ang gahom sang Ginoo.

4Nagtangla ako, kag nakita ko ang isa ka bagyo nga nagapadulong halin sa aminhan. Ang kilat nagakirab gikan sa madamol nga gal-om kag ang langit sa palibot sini nagabanaag. Sa diin ang kilat nagakirab, may nagasiga nga daw bronsi.

5Sa tunga sang bagyo may nakita ako nga apat ka daw mga tinuga nga buhi. May mga dagway sila sang tawo,

6pero ang tagsatagsa sa ila may apat ka mga guya kag apat ka mga pakpak.

7Ang ila mga tiil tadlong, pero ang ila mga kuko kaangay sang mga kuko sang baka. Ang mga tinuga nagaidlak kaangay sang napahining nga bronsi.

8Wala labot sang ila apat ka mga guya kag apat ka mga pakpak, ang tagsatagsa sa ila may apat ka mga kamot sang tawo sa ila mga kilid sa idalom sang ila mga pakpak.

9Ang duha ka mga pakpak sang tagsa ka tinuga nahumlad sa bagay nga ang mga tinuga nagaporma sing kwadrado, nga ang mga punta sang ila mga pakpak nagadut-anay. Kon maglakat sila, nagalakat sila sing dungan nga wala nagaliso ang ila mga lawas.

10Ang tagsa ka tinuga nga buhi may apat ka nagakalainlain nga mga guya: sa atubangan guya sang tawo; sa tuo guya sang leon; sa wala guya sang baka; kag sa likod guya sang agila.

11Ang duha ka mga pakpak sang tagsa ka tinuga nahumlad sa bagay nga nagadut-anay ang mga punta sang mga pakpak sang madason nga mga tinuga, samtang ang isa ka pares sang mga pakpak nagatabon sa ila mga lawas.

12Ang tagsa ka tinuga nagaatubang sa tagsa ka direksyon, gani wala na sila nagaliso bisan diin sila luyag magkadto.

13Sa tunga sini nga mga tinuga may yara nga daw nagadabdab nga sulo nga wala nagauntat sa paghulag. Ang kalayo nagaibwal, kag nagakirab ang kilat gikan sa sini.

14Ang mga tinuga nagapakadto pakari nga daw kilat.

15Sa akon pagtulok sa apat ka mga tinuga, nakita ko ang apat ka mga rueda nga nagaduot sa duta, isa ka rueda sa tupad sang tagsa sa ila.

16Ang tanan nga mga rueda palareho kag nagaidlak kaangay sang malahalon nga bato. Sa tagsa ka rueda may isa pa gid ka rueda sa sulod sini,

17sa bagay nga ang mga rueda makatiyog sa apat ka mga direksyon.

18Ang palibot sang mga rueda hil-ob sing mga mata.

19Kon ang mga tinuga maglakat, ang mga rueda nagaupod man sa ila, kag kon ang mga tinuga mag-alsa halin sa duta, ang mga rueda nagaalsa man.

20Ang mga tinuga nagakadto bisan diin ang luyag nila kag ang mga rueda nagaupod man sa ila, tungod kay ang mga tinuga nagagahom sa ila.

21Kon ang mga tinuga maglakat ukon magdulog ukon mag-alsa halin sa duta, ang mga rueda nagaupod man.

22Sa ibabaw sang mga ulo sang mga tinuga, may yara nga daw arko nga nahimo sa masilaw nga kristal.

23Sa idalom sang arko nagatindog ang mga tinuga nga ang tagsa ka sapat nagahumlad sang duha nila ka mga pakpak nga nagadut-anay sa isa kag isa, samtang ang duha nila ka mga pakpak nagatabon sang ila mga lawas.

24Nabatian ko ang gahod sang ila mga pakpak sang nagalupad sila. Kaangay ini sang daguhob sang dagat, kaangay sang ginahod sang madamo nga mga hangaway, kaangay sang tingog sang Dios nga Makagagahom. Kon wala na sila nagalupad, ginakipot nila ang ila mga pakpak,

25pero may gahod gihapon nga nagahalin sa ibabaw sang arko sa ibabaw sang ila mga ulo.

26Sa ibabaw sang arko, may yara nga daw isa ka trono nga nahimo sa sapiro, kag may isa nga daw dagway sang tawo nga nagapungko sa trono.

27Ang dagway daw nagabanaag kaangay sang bronsi sa tunga sang kalayo. Nagabanaag ini sa bug-os nga palibot nga may kasilaw.

28Ang kasanag may mga kolor pareho sang isa ka balangaw sa mga panganod sa maulanon nga adlaw. Amo ini ang masilaw nga kapawa nga nagapahayag sang presensya sang Ginoo.

Jump to: Chapter 2 →