Ezekiel 42

Ilonggo (Maayong Balita nga Biblia (2012))

← Chapter 41 Jump to: Chapter 43 →

1Dayon gindala ako sang tawo sa nagwa nga pasiyuhan pakadto sa balay sa naaminhan nga kilid sang Templo, nga indi malayo sa balay nga yara sa nakatundan nga punta sang Templo.

2Ini nga balay 168 ka tapak ang kalabaon kag otsentay kwatro ka tapak ang kasangkaron.

3Ang isa nga kilid sini nagaatubang sa bakante nga lugar nga trayntay kwatro ka tapak ang kasangkaron sa tupad sang Templo, kag ang pihak nga kilid nagaatubang sa dalan nga bato sa nagwa nga bahin sang pasiyuhan. Tatlo ini ka panalgan, kag ang naibabaw nga panalgan mas magamay sang sa naubos.

4Sa naaminhan nga kilid sini nga balay may alagyan nga desi-sais ka tapak ang kasangkaron kag 168 ka tapak ang kalabaon kag may mga pwertahan sa sini nga bahin.

5Ang mga kwarto sa naibabaw nga panalgan mas makitid sang sa natunga kag naidalom nga panalgan kag mas magamay ini sang sa naidalom.

6Ang mga kwarto sa tatlo ka mga panalgan natungtong sa mga balkon kag wala ini ginatukod sang mga haligi pareho sang iban nga mga balay sa pasiyuhan.

7Sa naidalom nga panalgan ang nagwa nga pader sang balay otsentay kwatro ka tapak ang kalabaon kag may mga kwarto sa nabilin nga otsentay kwatro ka tapak. Sa naibabaw nga panalgan may mga kwarto sa bug-os nga kalabaon sang balay.

9Sa nasidlangan nga punta sang balay, sa idalom sini nga mga kwarto, diin nagasugod ang pader sang pasiyuhan, may pwertahan pakadto sa nagwa nga pasiyuhan. Sa nabagatnan nga kilid sang Templo, may balay nga pareho man sini nga indi malayo sa balay sa nakatundan nga punta sang Templo.

11Sa atubangan sang mga kwarto may isa ka alagyan nga pareho sang sa naaminhan nga kilid. Pareho man ang takos sini, pareho ang korte, kag pareho ang mga pwertahan.

12May isa ka pwertahan sa idalom sang mga kwarto sa nabagatnan nga kilid sang balay, sa nasidlangan nga punta sa diin nagasugod ang pader.

13Ang tawo nagsiling sa akon, “Ining duha ka mga balay balaan. Diri sini, ang mga pari nga nagasulod sa presensya sang Ginoo nagakaon sang labing balaan nga mga dulot. Tungod kay ini nga mga kwarto balaan, ang mga pari magabutang sang labing balaan nga mga dulot diri: ang mga halad nga kalan-on, kag ang mga halad nga ginadulot tungod sa sala kag paglapas.

14Kon ang mga pari maggwa sa Templo kag luyag sila magkadto sa nagwa nga pasiyuhan, kinahanglan ibilin nila sa sini nga mga kwarto ang balaan nga mga bayu nga ila ginsuksok samtang nagaalagad sila sa Ginoo. Kinahanglan mag-ilis sila sing iban nga bayu sa wala pa sila makagwa sa lugar sa diin nagatipon ang mga tawo.”

15Sang matapos sang tawo ang pagtakos sang nasulod nga bahin sang Templo, gindala niya ako sa gwa paagi sa nasidlangan nga pwerta, kag dayon gintakos niya ang nagwa nga bahin.

16Ginkuha niya ang inugtakos nga lipak kag gintakos niya ang nasidlangan nga kilid: 840 ka tapak ini.

17Dayon gintakos niya ang naaminhan, ang nabagatnan, kag ang nakatundan nga kilid, kag palareho ang kalabaon sini: 840 ka tapak.

20Gani ang pader 840 ka tapak kwadrado sa tagsa ka kilid. Ang pader nagaseparar sang balaan sa indi balaan.

← Chapter 41 Jump to: Chapter 43 →